విషమంగానే ప్రశాంత్ పరిస్థితి
యాదాద్రి, వెలుగు : యాదాద్రి జిల్లా భువనగిరిలోని గురుకులంలో శుక్రవారం రాత్రి ఫుడ్ పాయిజన్ కారణంగా పలువురు విద్యార్థులు అస్వస్థతకు గురైన సంగతి తెలిసిందే. ఇందులో ప్రశాంత్అనే స్టూడెంట్ఆరోగ్యం ఇంకా మెరుగుపడలేదు. పరిస్థితి విషమంగా ఉండడంతో ఇతడిని హైదరాబాద్ రెయిన్బో హాస్పిటల్ఐసీయూ వార్డులో ఉంచి ట్రీట్మెంట్ అందిస్తున్నారు. ఆదివారం వరకూ ఆరోగ్యం విషమంగానే ఉందని డాక్టర్లు చెప్పారు. మరోవైపు కృష్ణ అనే విద్యార్థిని ఉప్పల్లోని ఓ ప్రైవేట్ హాస్పిటల్కు తరలించగా కోలుకున్నట్టు తెలిసింది. భువనగిరి ఏరియా హాస్పిటల్లో 11 మంది చికిత్స పొందుతున్నారు. ఇద్దరు హైదరాబాద్లోని ఉస్మానియా హాస్పిటల్లో చికిత్స పొందుతున్నారు.
రిపోర్టు తర్వాత చర్యలు
గురుకులంలో ఫుడ్ పాయిజన్ ఘటనపై ఉన్నతాధికారులు విచారణకు ఆదేశించారు. దీంతో గురుకుల విద్యాలయ సంస్థ సెక్రెటరీ అనంతలక్ష్మి ఆధ్వర్యంలో పెనేషియా ఓఎస్డీ ప్రశాంతి, విజిలెన్స్ఆఫీసర్ హుస్సేన్ ఎంక్వైరీ చేయనున్నారు. ఈ కమిటీ నివేదిక ఇచ్చిన తర్వాత బాధ్యులపై చర్యలు తీసుకోనున్నారు.
