అనౌష్క పొద్దార్. వయసు పదమూడేండ్లు. సొంతగా ‘శ్నాజ్’ అనే బ్రాండ్ని లాంచ్ చేసింది. లక్షల్లో సంపాదిస్తోంది కూడా. ప్రస్తుతానికి ముంబైకే పరిమితమైన శ్నాజ్ ప్రొడక్ట్స్ని, త్వరలో ఇండియా మొత్తం తీసుకురానుందట ఈ చిన్నారి. అసలు ఇంత చిన్న వయసులో సొంతంగా వ్యాపారమేంటి? అన్నదేగా ప్రశ్న. దీనికి సమాధానం ‘నాకు ఎదురైన సమస్యే’ అని చెప్తోంది ఈ చిన్నారి. ఆ సమస్యకి సొల్యూషనే నా శ్నాజ్ ప్రొడక్ట్స్ అంటోంది.
సమస్య వచ్చిపోగానే హమ్మయ్య! అని రిలాక్స్ అయిపోతారు మనలో చాలామంది. కానీ, కొందరు మాత్రం ఆ ప్రాబ్లంకే పెద్ద తలనొప్పిగా మారతారు. దాన్ని పిండి పిప్పి చేసి డస్ట్ బిన్లో పడేస్తారు. ఆ సమస్య మరొకరి దరిదాపుల్లోకి రాకుండా కాపలా కాస్తారు. ఆ కోవకే వస్తుంది ఈ చిన్నారి కూడా. తనకి ఎదురైన స్కిన్ సమస్యలు మరొకరికి వద్దని ఏకంగా కంపెనీయే స్టార్ట్ చేసింది. అసలు ఈ ఆలోచన వెనకున్న కథేంటని అడిగితే ఈ యంగ్ ఎంట్రప్రెనూర్ ఏం చెప్పిందంటే..
అలాంటి ప్రొడక్ట్ ఒక్కటీ లేదు
‘‘పన్నెండు నుంచి ఇరవై నాలుగేండ్ల వయసున్న 80 శాతం అమ్మాయిలు యాక్నె, తామర, వైట్ హెడ్స్ .. ఇలా రకరకాల స్కిన్ ప్రాబ్లమ్స్తో ఇబ్బంది పడుతున్నారు. వాళ్లలో నేనూ ఒకదాన్ని. అందరి అమ్మాయిల్లానే స్కిన్ అలర్జీ వచ్చినప్పుడు చాలా భయపడ్డా. కానీ, అమ్మమ్మ, నానమ్మ ‘పసుపు రాస్తే పోతుంది. ఉప్పు రాస్తే చాలు’ అంటూ వంటింటి చిట్కాలన్నీ చెప్పారు. అవి నా స్కిన్పై ఎలాంటి రిజల్ట్ చూపించలేదు. అమ్మ ఫేమస్ బ్రాండ్ ప్రొడక్ట్స్ అన్నీ ట్రై చేసింది. అయినా అలర్జీ తగ్గలేదు. నా ఫ్రెండ్స్ని అడిగితే... ‘మా సమస్య కూడా ఇదేనం’టూ ఒక్కొక్కరూ ఒక్కోటి చెప్పారు. నా రీసెర్చ్లో తేలింది ఏంటంటే... పిల్లలు, పెద్దల స్కిన్ కోసం మార్కెట్లో చాలా బ్రాండ్స్ ఉన్నాయి. కానీ, టీనేజర్స్ కోసం అందుబాటులో ఉన్న పర్సనల్ కేర్ ప్రొడక్ట్స్ని వేళ్ల మీద లెక్కపెట్టొచ్చని. దాంతో ఈ సమస్యకి సొల్యూషన్ నానుంచే మొదలవ్వాలి అనుకున్నా.
వాళ్ల ఇన్స్పిరేషన్తో...
చిన్నప్పట్నించీ ఎలన్ మస్క్ , స్టీవ్ జాబ్స్, బిల్గేట్స్ నా ఇన్స్పిరేషన్. వాళ్లలా పెద్ద బిజినెస్ నెట్వర్క్స్ని బిల్డ్ చేయాలన్నదే నా కల. అందుకే నా సమస్యకి సొల్యూషన్గా సొంతంగా నేనే ప్రొడక్ట్స్ తయారు చేయాలనుకున్నా. టీనేజర్స్ కోసం పర్సనల్ కేర్ సొల్యూషన్స్ని తీసుకురావాలనుకున్నా. ఆ ఆలోచనతోనే ‘థాపర్ ఎంట్రప్రెనూర్ అకాడమీ’లో చేరా. అక్కడ సేల్స్, మార్కెటింగ్ , ఫైనాన్షియల్ మేనేజ్మెంట్, సప్లయ్ చైన్ లాంటి బేసిక్ బిజినెస్ స్కిల్స్ నేర్చుకున్నా. నా టీచర్స్, తెలిసినవాళ్లు, ఇండస్ట్రీ ఎక్స్పర్ట్స్ సజెషన్స్ కూడా తీసుకున్నా. మార్కెట్లో ఉన్న పాపులర్ బ్రాండ్స్ ఫార్ములాలని స్టడీ చేశా. నా మీద నాకు నమ్మకం వచ్చాక నాన్నతో చెప్తే ఆయన క్షణం ఆలోచించకుండా చెక్ చేతికిచ్చారు. ఇదంతా ఒకెత్తు అయితే నా ప్రొడక్ట్స్కి కరెక్ట్ ఫార్ములేషన్ కత్తి మీద సాములా మారింది. ఈ విషయంలో ఒక ముంబై బేస్డ్ మ్యాను ఫ్యాక్చరింగ్ కంపెనీ నాకు అండగా నిలిచింది. చాలా రకాల టెస్ట్లు, ప్రొటో టైప్స్, ట్రయల్స్ తర్వాత ల్యాబ్ సైంటిస్ట్లు పర్ఫెక్ట్ ఫార్ములాతో ‘శ్నాజ్’ షాంపూలు, కండిషనర్స్ తయారుచేశారు.
పాన్ ఇండియా..
‘ బీ వాట్ యు వాంట్’ ట్యాగ్ లైన్తో శ్నాజ్ నుంచి మొదట ‘యాపిల్ అడిక్షన్’ షాంపూ, ‘ఆర్గాన్ అంబీర్’ అనే కండిషనర్ని కిందటి ఏడాది లాంచ్ చేశాం. సల్ఫేట్, పాథాలెట్స్, పారాబెన్స్ లాంటి కెమికల్స్ లేకుండా పూర్తిగా నేచురల్ ఇంగ్రిడియెంట్స్తో తయారుచేశాం వీటిని. ప్రస్తుతం శ్నాజ్ వెబ్సైట్, ఇన్స్టాగ్రామ్ ద్వారా మాత్రమే సేల్ చేస్తున్నా. అది కూడా కేవలం ముంబైలో.
రానున్న నెలల్లో అమెజాన్, ఫ్లిప్కార్ట్, నైకా లాంటి వెబ్సైట్స్ ద్వారా ఇండియా మొత్తం మా ప్రొడక్ట్స్ని అందుబాటులోకి తీసుకురానున్నా. అలాగే స్కిన్ ప్రొడక్ట్స్ని ఇంట్రడ్యూస్ చేయబోతున్నా.’’
