పర్వతగిరి (గీసుగొండ), వెలుగు: వరంగల్ జిల్లా గీసుగొండ మండలం కాకతీయ మెగాటెక్స్ టైల్ పార్కులోని కైటెక్స్ కంపెనీలో 1800 స్టిచ్చింగ్ పోస్టులు ఉన్నట్లు కలెక్టర్ సత్యశారద తెలిపారు. మంగళవారం పోస్టుల భర్తీకి సంబంధించిన సమీక్షలో ఆమె మాట్లాడుతూ టైలరింగ్ పై పట్టు ఉన్న మహిళలకు, స్థానిక యువతకు ఉపాధి అవకాశాలు కల్పించే లక్ష్యంతో నియామక ప్రక్రియను పారదర్శకంగా, సమర్థవంతంగా నిర్వహించాలని అధికారులను ఆదేశించారు.
ఈ ఉద్యోగాలకు నెలకు రూ.12,300 నుంచి రూ.21,800 వరకు వేతనం ఉంటుందని తెలిపారు. 18 నుంచి 35 సంవత్సరాల మధ్య వయస్సు గల మహిళలకు ఈ ఉపాధి లభిస్తుందన్నారు. వరంగల్ ప్రజలకు ప్రాధాన్యత ఉంటుందని, ఉద్యోగ నియామకాలకు సంబంధించి విస్తృత ప్రచారం చేపట్టాలని అధికారులను ఆదేశించారు. కాకతీయ మెగా టెక్స్టైల్ పార్క్ ద్వారా వరంగల్ జిల్లాలో ఉపాధి అవకాశాలు మరింత పెరుగుతాయని, స్థానిక యువత ఈ అవకాశాలను సద్వినియోగం చేసుకోవాలని కలెక్టర్ సూచించారు.
