రాఖీ పండగ పూట జగిత్యాల జిల్లాలో వీధి కుక్కలు స్వైర విహారం చేశాయి. ఒకరు కాదు, ఇద్దరు కాదు ఏకంగా 24 మందిపై దాడి చేశాయి కుక్కలు. గురువారం ( ఆగస్టు 27 ) జరిగిన ఈ ఘటనకు సంబందించిన వివరాలిలా ఉన్నాయి.. జిల్లాలోని కోరుట్ల పట్టణంలోని రామ్ నగర్ బిలాల్పుర కాలనీలో జరిగింది ఈ ఘటన. రాఖీ పండగ సందర్భంగా రాఖీ కట్టేందుకు వచ్చిన తల్లులు పిల్లలపై దాడి చేశాయి వీధి కుక్కలు.
వీధి కుక్కలు ఇవాళ ఉదయం నుండి సాయంత్రం వరకు దాదాపు 24 మందిని కరిచినట్లు తెలుస్తోంది. క్షహతగాత్రులను ఆసుపత్రికి తరలించి చికిత్స అందిస్తున్నారు. ఈ ఘటనలో ఒకరిద్దరు మినహా ఎవరికీ తీవ్ర గాయాలవ్వలేదు. మునిసిపల్ అధికారులు వీధి కుక్కలను నియంత్రించి తమ ప్రాణాలను కాపాడాలని కోరుతున్నారు కాలనీ వాసులు.
ఇదిలా ఉండగా.. నిజామాబాద్ జిల్లాలో కూడా ఓ పిచ్చి కుక్క స్వైర విహారం చేసింది.జిల్లాలోని మోర్తాడ్ మండల కేంద్రంలో పిచ్చి కుక్క దాడిలో 13మంది తీవ్రంగా గాయపడ్డారు. గాయపడ్డవారిలో ఎనిమిదేళ్ల బాలుడు కూడా ఉన్నాడు/ క్షతగాత్రులను ఆసుపత్రికి తరలించి చికిత్స అందిస్తున్నారు. వీధి కుక్కలను నియంత్రించి తమ ప్రాణాలను కాపాడాలని కోరుతున్నారు మోర్తాడ్ ప్రజలు.
