- ఓపెన్ కేటగిరి నుంచి ఎస్టీలకు 4 రోస్టరు పాయింట్లు
- 10 శాతానికి పెంచిన రిజర్వేషన్ల ప్రకారం సబార్డినేట్ సర్వీస్
- రూల్స్ లో మార్పులు.. సీఎస్ సోమేశ్ కుమార్ ఉత్తర్వులు
హైదరాబాద్, వెలుగు : పెంచిన రిజర్వేషన్లకు అనుగుణంగా ఎస్టీలకు ఉద్యోగ నియామకాల్లో రోస్టర్ పాయింట్లను ప్రభుత్వం ఖరారు చేసింది. 6 శాతం నుంచి 10 శాతానికి రిజర్వేషన్లు పెంచిన దానికి అనుగుణంగా కొత్తగా 4 రోస్టర్ పాయింట్లను ఒపెన్ కేటగిరి నుంచి ఎస్టీలకు కేటాయించింది. ఈ మేరకు రాష్ట్ర ప్రభుత్వం తెలంగాణ స్టేట్ అండ్ సబార్డినేట్ సర్వీస్ రూల్స్ 1996లో మార్పులు చేసింది. రూల్ 22కు సవరణ చేస్తూ సీఎస్ సోమేశ్ కుమార్ బుధవారం ఉత్తర్వులు జారీ చేశారు. దీంతో నియామకాల్లో 10 శాతం రిజర్వేషన్లు ఎస్టీలకు వర్తించనున్నాయి.
ప్రతి వందలో ఎస్టీలకు 8,15, 25, 33, 42, 58, 67, 75, 83, 92 రోస్టర్ పాయింట్లు కేటాయించారు. అయితే సర్వీస్ రూల్స్లో 50 శాతం రిజర్వేషన్లను పరిగణనలోకి తీసుకోవాల్సిన అవసరం లేదని సీఎస్ ఆ ఉత్తర్వుల్లో స్పష్టం చేశారు. కాగా ఆరు శాతం రిజర్వేషన్లు అమల్లో ఉన్నప్పుడు ప్రతి వందలో 8, 25, 33, 58, 75, 83 స్థానాలను ఎస్టీలకు రోస్టర్ ఇచ్చారు. అయితే పది శాతం రిజర్వేషన్ల ప్రకారం ఒపెన్ కేటగిరి నుంచి 15, 42, 67, 92 ఉన్న రోస్టర్ పాయింట్లను ఇప్పుడు ఎస్టీలకు కేటాయించారు. అదే సమయంలో పాత రోస్టర్ పాయింట్లలో ఎస్టీ (జనరల్) లకు కేటాయించిన 33, 75 రోస్టర్లను ఇప్పుడు ఎస్టీ మహిళలకు మార్చారు. ఎస్టీ వుమెన్ఉన్న 58వ రోస్టర్ను ఎస్టీ జనరల్ కు మార్చారు.
ప్రతి వందలో ఎస్టీల రిజర్వేషన్కు కొత్త రోస్టర్ ఇదే
8,15, 25, 33, 42, 58, 67, 75, 83, 92 (ఇం దులో 8, 33, 75 రోస్టర్ పాయింట్లు ఎస్టీ వుమెన్)
