ఎండలు మండిపోయే వేసవిలో మన దాహాన్ని తీర్చి, శరీరానికి చల్లదనాన్ని ఇచ్చే అద్భుతమైన పండు తాటి ముంజలు. వీటిని ఇంగ్లీష్లో 'ఐస్ ఆపిల్' అని, తమిళంలో 'నుంగు' అని, మరాఠీలో 'తడ్గోల' అని పిలుస్తారు. ప్రకృతి సిద్ధంగా లభించే ఈ పండు కేవలం రుచికరమైనదే కాదు, ఆరోగ్యానికి ఎంతో మేలు చేస్తుంది.
అసలు ఐస్ ఆపిల్ అంటే ఏంటి ?
ఇది తాటి చెట్టుకు కాసే పండు. పైన గోధుమ రంగు తొక్కను తీస్తే, లోపల తెల్లగా, మెత్తగా, జెల్లీలా ఉండే ముంజలు కనిపిస్తాయి. వీటి రుచి లేత కొబ్బరిలా కొద్దిగా తీపిగా ఉండి, తినగానే నోట్లో కరిగిపోతాయి. వీటిలో నీటి శాతం చాలా ఎక్కువగా ఉండటం వల్ల వేసవిలో ఇవి ఉత్తమమైన ఆహారం.
పోషకాల గని
ఐస్ ఆపిల్లో విటమిన్ సి, కె, ఇ తో పాటు ఐరన్, కాల్షియం, కార్బోహైడ్రేట్లు, ఫైటోన్యూట్రియెంట్లు పుష్కలంగా ఉంటాయి. ఇందులో కేలరీలు తక్కువగా ఉండటం వల్ల బరువు తగ్గాలనుకునే వారికి కూడా ఇది మంచి అప్షన్. దీని వల్ల ఎటువంటి అలెర్జీలు రావు కాబట్టి అందరూ తినవచ్చు.
తాటి ముంజల వల్ల కలిగే అద్భుత ప్రయోజనాలు:
1. సహజమైన చలువ
పుచ్చకాయలాగే ఇందులో కూడా నీటి శాతం ఎక్కువ ఉంటుంది. ఇది శరీరంలోని ఎలక్ట్రోలైట్లను బ్యాలెన్స్ చేస్తుంది. ఎండలో తిరగడం వల్ల వచ్చే వడదెబ్బ నుండి మనల్ని కాపాడుతుంది.
2. రోగనిరోధక శక్తి పెంపు
ఇందులోని విటమిన్లు, ఖనిజాలు మన రోగనిరోధక వ్యవస్థను బలంగా చేస్తాయి. అన్ని కాలల్లో వచ్చే చిన్నపాటి వ్యాధుల నుండి మనల్ని రక్షిస్తాయి.
3. జీర్ణక్రియ మెరుగుపడుతుంది
ఇందులో పీచు పదార్థం (Fiber) ఎక్కువగా ఉండటం వల్ల కడుపు ఉబ్బరం, వికారం, ఎసిడిటీ, మలబద్ధకం వంటి సమస్యల నుండి ఉపశమనం కలిగిస్తుంది. జీర్ణవ్యవస్థను శుభ్రంగా ఉంచుతుంది.
4. వృద్ధాప్య ఛాయలను తగ్గిస్తుంది
ఐస్ ఆపిల్లో ఉండే యాంటీఆక్సిడెంట్లు చర్మం త్వరగా ముడతలు పడకుండా చూస్తాయి. చర్మం యవ్వనంగా కనిపించేలా చేస్తాయి.
5. బరువు తగ్గడానికి సహాయపడుతుంది
ముంజలు తిన్నప్పుడు కడుపు నిండుగా అనిపిస్తుంది. దీనివల్ల మనం ఇతర ఆహారాలను అతిగా తినకుండా ఉంటాము. తక్కువ కేలరీలు ఉండటం వల్ల బరువు అదుపులో ఉంటుంది.
►ALSO READ | ఆపిల్ను మించిన చైనీస్ సూపర్ ఫ్రూట్.. షుగర్ పేషెంట్లకు గొప్ప వరం.. తింటే ఎన్ని లాభాలో
6. చర్మ సమస్యలకు పరిష్కారం
వేసవిలో ఎండ వల్ల వచ్చే చెమటకాయలు, దద్దుర్లు ఇతర చర్మ అలెర్జీలకు ముంజల గుజ్జు అద్భుతంగా పనిచేస్తుంది. ఆ గుజ్జును చర్మానికి రాస్తే మంట తగ్గి చల్లగా ఉంటుంది.
7. గర్భిణీలకు, బాలింతలకు మేలు
గర్భిణీ స్త్రీలకు, పాలిచ్చే తల్లులకు అవసరమైన పోషకాలను ఇది అందిస్తుంది. గర్భధారణ సమయంలో వచ్చే జీర్ణ సమస్యలను తగ్గించడంలో ఇది తోడ్పడుతుంది.
8. కాలేయ ఆరోగ్యానికి మంచిది
ఇందులో ఉండే పొటాషియం కాలేయం (Liver) ఆరోగ్యాన్ని కాపాడుతుంది. కాలేయ సంబంధిత సమస్యలతో బాధపడేవారు వేసవిలో వీటిని తీసుకోవడం వల్ల వేగంగా కోలుకోవడానికి అవకాశం ఉంటుంది. ప్రకృతి ఇచ్చిన ఈ సమ్మర్ గిఫ్ట్ మిస్ అవ్వకండి. రోజుకు రెండు మూడు ముంజలు తినడం వల్ల మీ శరీరం తాజాగా, శక్తివంతంగా ఉంటుంది!
