- ఈనెల 13న ప్రారంభించనున్న డిప్యూటీ సీఎం, మంత్రులు
లక్సెట్టిపేట, వెలుగు: లక్సెట్టిపేట పట్టణంలో 30 పడకలతో నిర్మించిన ప్రభుత్వ ఆస్పత్రి భవనం ప్రారంభానికి సిద్ధమైంది. కార్పొరేట్ హాస్పిటల్స్కు దీటుగా అన్ని సౌకర్యాలతో నిర్మించిన ఈ ఆస్పత్రిని ఈనెల 13న డిప్యూటీ సీఎం భట్టి విక్రమార్క, హెల్త్ మినిస్టర్ దామోదర రాజనర్సింహతోపాటు మంత్రులు ప్రారంభించనున్నారు. ఈ ఆస్పత్రి అందుబాటులోకి రానుండడంతో లక్సెట్టిపేటతోపాటు దండేపల్లి, జన్నారం, ఇతర మండలాల ప్రజలకు వైద్య సదుపాయాలు మరింత మెరుగుపడనున్నాయి.
రూ.11.53 కోట్లతో నిర్మించిన ఆస్పత్రిలో రోగులకు అవసరమైన అన్ని వైద్య సౌకర్యాలతో పాటు సామగ్రిని సమకూర్చారు. 8 మంది డాక్టర్లను కేటాయించారు. వీరిలో నలుగురు స్పెషలిస్టులున్నారు. గైనిక్, పిల్లలు, జనరల్, వైద్యం కోసం ఇక్కడి ప్రజలకు ఇతర ప్రాంతాలకు వెళ్లడం తప్పుతుంది. హాస్పిటల్లో అన్ని రకాల సౌకర్యాలు అందుబాటులో ఉన్నాయని, రోగులకు పూర్తిస్థాయిలో వైద్యం అందిస్తామని సూపరింటెండెంట్ డాక్టర్ ఆకుల శ్రీనివాస్ తెలిపారు. ఈ ఆస్పత్రికి 55 మంది సిబ్బంది అవసరమని, ఇందుకోసం అధికారులకు నివేదికలు పంపించామని అన్నారు.
