పూర్వం ఇళ్లలో పాలను మరిగిస్తే పైన మందంగా మీగడ ఏర్పడేది. ఆ మీగడను కొన్ని రోజుల పాటు సేకరించి ఇంట్లోనే వెన్న, నెయ్యి, పాలకోవా వంటి పదార్థాలను తయారు చేసుకునేవారు. కానీ ఇప్పుడు మార్కెట్లో దొరికే పాలలో మీగడ చాలా తక్కువగా వస్తోందని చాలామంది చెబుతున్నారు. దీంతో ఇంట్లో వెన్న, నెయ్యి తయారు చేసుకోవడం కాస్త కష్టంగా మారింది. అయితే కొన్ని చిన్న చిట్కాలు పాటిస్తే పాలపై మంచి మందపాటి మీగడ వచ్చేలా చేసుకోవచ్చు. ఇందుకు పాలను ఎలా మరిగించాలి ? ఎలా చల్లార్చాలి ? ఫ్రిజ్లో ఎలా పెట్టాలి ? అనే విషయాలు తెలుసుకుందాం....
1. ఫుల్ క్రీమ్ పాలను తీసుకోండి
పాలపై ఎక్కువగా మీగడ రావాలంటే ముందుగా మంచి ఫుల్ క్రీమ్ పాలను తీసుకోవాలి. ఇందుకోసం ఒకటిన్నర నుంచి రెండు లీటర్ల పాలను తీసుకోండి. అందులో అర గ్లాసు నీళ్లు కలిపి స్టవ్పై పెట్టండి. పాలను మరీ ఎక్కువ మంటపై కాకుండా తక్కువ మంటపై మరిగించాలి. ఇలా చేయడం వల్ల పాలు అడుగున అంటుకోకుండా ఉంటాయి. అలాగే పైన మీగడ ఏర్పడటానికి అవకాశం ఉంటుంది.
2. గిన్నె అంచులకు కొద్దిగా నెయ్యి రాయండి
పాలు మరిగించడానికి ఉపయోగించే గిన్నె అంచులకు కొద్దిగా నెయ్యి రాయండి. ఇలా చేయడం వల్ల పాలు త్వరగా పొంగి బయటకు రాకుండా ఉంటాయని సంప్రదాయంగా చెబుతారు. అయితే నెయ్యి ఎక్కువగా రాయకుండా కొద్దిగా మాత్రమే ఉపయోగించాలి.
3. పాలలో కొన్ని బియ్యం గింజలు వేయండి
పాలు మరిగే సమయంలో అందులో 7 నుంచి 8 బియ్యం గింజలు వేసి కలపాలని చిట్కాగా సూచిస్తున్నారు. బియ్యంలో ఉండే పిండి పదార్థం వల్ల మీగడ చిక్కగా మారుతుందని చెబుతారు. అయితే బియ్యం వేయడం వల్ల మీగడ ఎక్కువగా వస్తుందని కాదు. కాబట్టి ఇది ఒక చిట్కా మాత్రమేనని గుర్తుంచుకోవాలి.
4. పాలు మరిగిన వెంటనే మూత పెట్టకండి
పాలు బాగా మరిగిన తర్వాత వెంటనే గట్టిగా మూత పెట్టకూడదు. ఇందుకు గాలి వెళ్లేలా ఉండే జల్లెడ మూతను ఉపయోగించవచ్చు. పాలు మరిగిన తర్వాత వాటిని పదే పదే కలపకండి. అలాగే కదపకుండా గది ఉష్ణోగ్రతకు వచ్చే వరకు పక్కన పెట్టండి. ఇలా చేయడం వల్ల పాలపై మీగడ పొర ఏర్పడటానికి అవకాశం ఉంటుంది.
5. పాలను ఫ్రిజ్లో పెట్టండి
పాలు పూర్తిగా చల్లారిన తర్వాత వాటిని ఫ్రిజ్లో పెట్టాలి. కనీసం 5 నుంచి 6 గంటలు లేదా రాత్రంతా ఫ్రిజ్లో ఉంచితే పైన మీగడ పొర ఏర్పడుతుంది. తరువాత రోజు ఉదయం చూస్తే పాలపై మీగడ గట్టిపడి కనిపిస్తుంది. దానిని ఒక చెంచాతో నెమ్మదిగా తీసి వేరే గిన్నెలో వేసుకోవచ్చు. ముఖ్యమైన విషయం పాలను గది ఉష్ణోగ్రత వద్ద ఎక్కువసేపు ఉంచకండి. చల్లారిన వెంటనే ఫ్రిజ్లో పెట్టడం మంచిది.
6. మీగడతో వెన్న, నెయ్యి తయారు చేసుకోండి
పైన ఏర్పడిన మీగడను రోజూ సేకరించి ఫ్రిజ్లో శుభ్రమైన మూత ఉన్న డబ్బాలో నిల్వ చేసుకోవచ్చు. తగినంత మీగడ సేకరించిన తర్వాత దానిని ఉపయోగించి ఇంట్లోనే వెన్న, నెయ్యి తయారు చేసుకోవచ్చు. వెన్న తయారు చేయాలంటే సేకరించిన మీగడకు పెరుగు కలిపి కొంతసేపు పులియనివ్వాలి. ఆ తర్వాత చిలికితే వెన్న వేరుపడుతుంది. ఈ వెన్నను తక్కువ మంటపై వేడి చేస్తే స్వచ్ఛమైన నెయ్యి తయారవుతుంది.
చిన్న చిట్కాలతో ఇంట్లోనే మీగడ, వెన్న!
ఇలా పాలను సరైన పద్ధతిలో మరిగించి, చల్లార్చి, ఫ్రిజ్లో నిల్వ చేయడం ద్వారా పాలపై ఏర్పడే మీగడను సేకరించుకోవచ్చు. అయితే మీగడ ఎంత వస్తుందనేది పాలలోని కొవ్వు శాతం, పాల నాణ్యతపై ఆధారపడి ఉంటుంది. ముఖ్యంగా ఫుల్ క్రీమ్ పాలతో మంచి ఫలితం వచ్చే అవకాశం ఉంటుంది.
