అంతర్జాతీయ టీ20 క్రికెట్‌లో నెంబర్ వన్ బ్యాటర్ గా కొనసాగుతున్న అభిషేక్ శర్మ.. దేశవాళీ క్రికెట్ లో అంతకు మించి చెలరేగాడు. డొమెస్టిక్ టీ20 టోర్నీ సయ్యద్ ముస్తాక్ అలీ ట్రోఫీలో వీర ఉతుకుడు ఉతికాడు. ఆదివారం (నవంబర్ 30) హైదరాబాద్‌లోని జింఖానా గ్రౌండ్‌లో బెంగాల్‌పై 32 బంతుల్లో సెంచరీ చేసి తుఫాన్ ఇన్నింగ్స్ ఆడాడు. పంజాబ్ జట్టుకు కెప్టెన్‌గా వ్యవహరించిన అభిషేక్.. ఓవరాల్ గా 52 బంతుల్లో 148 పరుగులు చేసి సెంచరీ తర్వాత కూడా తన విధ్వంసాన్ని కొనసాగించాడు. అభిషేక్ ఇన్నింగ్స్ లో 8 ఫోర్లు, 16 సిక్సర్లు ఉండడం విశేషం.
ఈ మ్యాచ్ లో హాఫ్ సెంచరీ చేయడానికి ఈ పంజాబ్ ఓపెనర్ కు కేవలం 12 బంతులే అవసరమయ్యాయి. దీంతో టీ20 ఫార్మాట్‌లో 12 బంతుల్లో అర్ధ సెంచరీ నమోదు చేసిన ఐదో బ్యాటర్ గా నిలిచాడు. 2007 టీ20 వరల్డ్ కప్ లో యువరాజ్ సింగ్ ఇంగ్లాండ్ పై ఈ ఘనతను అందుకున్నాడు. 2016 జనవరిలో అడిలైడ్ స్ట్రైకర్స్‌తో జరిగిన మ్యాచ్‌లో మెల్‌బోర్న్ రెనెగేడ్స్ తరపున బిగ్ బాష్ లీగ్ లో క్రిస్ గేల్.. 2018 అక్టోబర్‌లో ఆఫ్ఘనిస్తాన్ ప్రీమియర్ లీగ్ మ్యాచ్‌లో హజ్రతుల్లా జజాయ్ కూడా 12 బంతుల్లో హాఫ్ సెంచరీ మార్క్ అందుకున్నారు. ఆ ఆ తర్వాత 32 బంతుల్లో సెంచరీ.. ఓవరాల్ గా 52 బంతుల్లో 148 పరుగులు చేసి బెంగాల్ బౌలర్లకు చుక్కలు చూపించాడు.
అభిషేక్ శర్మ ధనాధన్ బ్యాటింగ్ తో పాటు ప్రభ్‌సిమ్రాన్ (35 బంతుల్లో 70) రాణించడంతో మొదట బ్యాటింగ్ చేసిన పంజాబ్ నిర్ణీత 20 ఓవర్లలో 5 వికెట్ల నష్టానికి 310 పరుగులు చేసింది. సయ్యద్ ముస్తాక్ అలీ ట్రోఫీలో ఇది రెండో అత్యధిక స్కోర్ కావడం విశేషం. 2024 డిసెంబర్ లో సిక్కింపై బరోడా 5 వికెట్లకు 349 పరుగులు చేసి అగ్ర స్థానంలో ఉంది. 311 పరుగుల భారీ టార్గెట్ తో బరిలోకి దిగిన బెంగాల్ నిర్ణీత 20 ఓవర్లలో 198 పరుగులకు ఆలౌట్ అయింది. దీంతో పంజాబ్ 112 పరుగుల భారీ తేడాతో విజయం సాధించింది.
టీ20 క్రికెట్‌లో అత్యంత వేగవంతమైన సెంచరీ చేసిన భారత ఆటగాళ్లు:
28 బంతులు - ఉర్విల్ పటేల్ vs త్రిపుర, 2024
28 బంతులు - అభిషేక్ శర్మ vs మేఘాలయ, 2024
31 బంతులు - ఉర్విల్ పటేల్ vs సర్వీసెస్, 2025
32 బంతులు - అభిషేక్ శర్మ vs బెంగాల్, 2025
32 బంతులు - రిషబ్ పంత్ vs హిమాచల్, 2018
అత్యధిక టీ20 సెంచరీలు చేసిన భారత ఆటగాళ్ళు:
9 - విరాట్ కోహ్లీ (397 ఇన్నింగ్స్‌లు)
8 - అభిషేక్ శర్మ (157 ఇన్నింగ్స్‌లు)*
8 - రోహిత్ శర్మ (450 ఇన్నింగ్స్‌లు)
7 - కెఎల్ రాహుల్ (226 ఇన్నింగ్స్‌లు)
6 - సంజు శాంసన్, శుభ్‌మన్ గిల్, రుతురాజ్ గైక్వాడ్, సూర్యకుమార్ యాదవ్
Abhishek Sharma is unstoppable in T20 cricket. He smashed century in just 32 balls against Bengal in SMAT.
— Tejash (@Tejashyyyyy) November 30, 2025
- 50 in 12 balls
- 100 in 32 balls
He smashed against bengal's bowler like Mohammad Shami, Akash Deep and Shahbaz Ahmed 🔥🗿pic.twitter.com/HDyAOG952z
