రంగారెడ్డి కలెక్టరేట్, వెలుగు: పెండింగ్లో ఉన్న ఫీజు రీయింబర్స్‌‌‌‌మెంట్, స్కాలర్షిప్ బకాయిలను వెంటనే విడుదల చేయాలంటూ ఏబీవీపీ ఆధ్వర్యంలో నేతలు ర్యాలీగా వచ్చి రంగారెడ్డి జిల్లా కలెక్టరేట్ముందు మంగళవారం ధర్నా చేపట్టారు. అనంతరం జిల్లా అడిషనల్ కలెక్టర్తిరుపతి రావుకు వినతిపత్రాన్ని అందజేశారు. ఈ సందర్భంగా ఏబీవీపీ రాష్ట్ర వర్కింగ్ కమిటీ సభ్యుడు కందాడి శ్రీరామ్ మాట్లాడుతూ.. రాష్ట్ర ప్రభుత్వం సకాలంలో ఫీజు రీయింబర్స్‌‌‌‌మెంట్, స్కాలర్షిప్ విడుదల చేయకుండా స్టూడెంట్లకు అన్యాయం చేస్తోందన్నారు.
ఎంతో మంది పేద, మధ్యతరగతి స్టూడెంట్లు ఫీజు రీయంబర్స్‌‌‌‌మెంట్, స్కాలర్షిప్పైన ఆధారపడి చదువుతున్నారని, అవి వారికి సకాలంలో రాకపోవడంతో కాలేజీల మేనేజ్మెంట్లు ఫీజు కట్టిన తర్వాతే సర్టిఫికెట్లు ఇస్తామంటూ అనేక రకాలుగా వారిని ఇబ్బందులకు గురిచేస్తున్నారని తెలిపారు. పేద స్టూడెంట్లు ఫీజులు కట్టలేక, సర్టిఫికెట్లు తీసుకోలేక ఉన్నత విద్యకు దూరమవుతున్నప్పటికీ ప్రభుత్వం పట్టించుకోకపోవటం దుర్మార్గమన్నారు. పెండింగ్లో ఉన్న బకాయిలను వెంటనే విడుదల చేయాలన్నారు. కార్యక్రమంలో గ్రేటర్ హైదరాబాద్ సంఘటన మంత్రి విష్ణువర్ధన్, మహేశ్, జాయింట్ సెక్రటరీ సంజీవ రెడ్డి, విభాగ్ కన్వీనర్లు పాల్గొన్నారు.
