‘Chase your dreams.. success will follow you’ ఇంగ్లీష్లో పాపులర్ కోట్. ఇది తరచూ మనిషి పెట్టుకొనే గోల్స్ ను గుర్తు చేస్తుంటుంది. మలయాళ యాక్టర్ ‘శ్రీనాథ్ భాసి’ లైఫ్లో అచ్చం ఇలాంటి ‘ఛేజింగ్’ ఉంటుంది. కళల వెనుక అతను చేసిన ప్రయాణం మాలీవుడ్లో పాపులర్ యాక్టర్గా నిలిపింది. రేడియో జాకీ నుంచి సక్సెస్ఫుల్, టాలెంటెడ్ యాక్టర్గా పేరుతెచ్చుకున్న శ్రీనాథ్ గురించి...
ప్రతి ఒక్కరికీ ఒక ఇంట్రెస్ట్ ఉంటుంది. పట్టువిడువక దాన్ని డెవలప్ చేసుకున్నప్పుడే సక్సెస్ వస్తుంది. అలా శ్రీనాథ్కు మ్యూజిక్ అంటే చాలా ఇష్టం. చిన్నప్పటి నుంచి మ్యూజిక్ ప్యాషన్. గిటార్ పట్టుకొని ప్రపంచం అంతా తిరగాలని కలలు కన్నాడు. మ్యూజిక్ మీద తనకున్న ఇంట్రెస్ట్కు తగ్గట్టు.. తను పుట్టి పెరిగిన కొచ్చి సిగ్నేచర్ స్టయిల్ ఫ్యాషన్ను మెంటెయిన్ చేసేవాడు. శ్రీనాథ్ కొచ్చిలోని కేంద్రీయ విద్యాలయంలో స్కూలింగ్ పూర్తి చేశాడు. ఆ టైంలోనే అతను హిమాలయాలకు టూర్ వెళ్లే ఛాన్స్ వచ్చింది. స్కూల్ నుంచి వెళ్తున్న టీమ్లో శ్రీనాథ్ కూడా ఉన్నాడు. అప్పుడే అతని ప్రయాణం మొదలైనట్టు అనిపించింది. ప్రపంచం అంతా తిరగాలన్న కోరిక అప్పుడే మొదలైంది. స్కూల్ ఫ్రెండ్స్తో పదకొండు రోజుల ఆ టూర్ ఇప్పటికీ తన కెరీర్ లో మరిచిపోలేనిది అంటాడు శ్రీనాథ్.
ఆ తర్వాత శ్రీనాథ్ కేరళలోని ఎంజీ యూనివర్సిటీలో గ్రాడ్యుయేషన్ పూర్తి చేశాడు. కాలేజీ లైఫ్ మ్యూజిక్ ఇంట్రెస్ట్కు సెంటర్గా మారింది. కాలేజీలో ‘క్రిమ్సన్ వుడ్’ అనే మెటల్ బ్యాండ్‌ టీమ్లో పని చేసేవాడు. కాలేజీ చదువులు అయిపోయాక.. రెడ్ ఎఫ్ఎంలో చేరి రేడియో జాకీగా కెరీర్ స్టార్ చేశాడు. అదే టైంలో ‘కిరణ్’ టీవీలో వీడియో జాకీగా కూడా చేశాడు. కాలేజీ, రెడ్ఎఫ్ఎం ఫ్లాట్ఫామ్లు అతనికి మ్యూజిక్, సాంగ్స్ మీద మరింత ఇంట్రెస్ట్ పెంచేలా చేశాయి. రెడ్ ఎఫ్ఎంలో చేస్తూనే కొన్ని సినిమాలకు ప్లే బ్యాక్ సింగర్గా పని చేశాడు. దీంతో పాటు కేరళలో మోడల్గా కూడా పేరు తెచ్చుకున్నాడు శ్రీనాథ్.
టీవీలో వీడియో జాకీగా చేస్తున్న శ్రీనాథ్కు 2012లో యాక్టింగ్ చాన్స్ వచ్చింది. మోహన్లాల్ నటించిన ‘ప్రణయం’ అనే సినిమాకి మొదటి ఆడిషన్లోనే సెలక్ట్ అయ్యాడు శ్రీనాథ్. ఆ సినిమా తర్వాత కామెడీ థ్రిల్లర్ ‘హనీ బీ’ సినిమాలో నటించి యాక్టింగ్ స్కిల్స్ను నిరూపించుకున్నాడు. ఆ సినిమా తర్వాతే శ్రీనాథ్కు అనేక ఆఫర్లు రావడం మొదలయ్యాయి. ఆ తర్వాత 2014లో ‘బివేర్ ఆఫ్ డాగ్స్’ సినిమాలో లీడ్ రోల్లో నటించాడు. ఈ సినిమాలో మంచి యాక్టింగ్ స్కిల్స్ చూపించి మాలీవుడ్ డైరక్టర్లను తనవైపు తిప్పుకున్నాడు. 2012 నుంచి ‘ప్రణయం, అరికే ( సో క్లోజ్), 22 ఫిమేల్ కొట్టాయం, బివేర్ ఆఫ్ డాగ్స్, ఉస్తాద్ హోటల్’ తర్వాత అనేక సినిమాల్లో సపోర్టింగ్ రోల్స్ చేశాడు. దుల్కర్ సల్మాన్, ఫహద్ ఫాజిల్ వంటి స్టార్ యాక్టర్లతో నటించి మంచి పేరు తెచ్చుకున్నాడు. అప్పటికీ రేడీయో జాకీగా, సపోర్టింగ్ ఆర్టిస్ట్గా ఫ్యాన్ ఫాలోయింగ్ను పెంచుకున్న శ్రీనాథ్కు హీరోగా అవకాశాలు వచ్చాయి. 2016 ఫాజిల్ మహ్మద్ తీసిన ‘వన్స్ అపాన్ ఎ టైమ్ దేర్ వాజ్ ఏ కల్లన్’లో హీరోగా చేశాడు శ్రీనాథ్. ఆ టైంలో ఈ రోల్ గురించి శ్రీనాథ్ షాక్ అయ్యాడు. ‘నేను హీరో అవుతున్నా అంటే నాకే నవ్వొచ్చింది’ అని చాలా ఇంటర్వ్యూల్లో చెప్పాడు. ‘నేను కేవలం మ్యూజిక్ బ్యాక్గ్రౌండ్తో పాపులర్ సింగర్ అవ్వాలనుకున్నా. ప్రపంచ యాత్ర చేద్దాం అనుకున్నా. కానీ ఇలా హీరో అవుతానని అనుకోలేదు’ అంటాడు శ్రీనాథ్.
‘ పరవ, కుంబలంగి నైట్స్, వైరస్, ట్రాన్స్, కప్పెలా, హోమ్’ సినిమాల్లో కీ రోల్స్లో నటించాడు. తాజాగా మమ్ముటీకి సపోర్ట్ క్యారెక్టర్గా చేసిన ‘భీష్మ పర్వం’ సినిమా రిలీజ్కు రెడీగా ఉంది. అలాగే శ్రీనాథ్ హీరోగా నటించిన ‘సుమేష్ , రమేష్’ సినిమా జనవరిలో పూర్తై రిలీజ్కు రెడీగా ఉంది. ‘ రేపు ఏం జరుగుతుందో చెప్పలేం. అలా అని దాన్ని ఊహించుకొని ఈరోజు టైం వేస్ట్ చేయలేను. మనకు అన్నీ తెలుసు అనుకొని రాబోయే రోజుల్ని ప్రెడిక్ట్ చేయడం నాకు తెలియదు. ఉన్న టైంను హాయిగా గడపాలి. ప్రజెంట్ టైం అనేది గిఫ్ట్గా భావించాలి.సినిమాల్లో మంచి అవకాశాలు వచ్చాయి. ఫ్యాన్స్ కూడా మెచ్చుకుంటున్నారు. కానీ నాకు జర్నీ చేయడం అంటే మహా ఇష్టం. ఇప్పటికీ అది నెరవేరలేదు. వీలైనంత త్వరగా ప్రపంచమంతా జర్నీ చేయాలి’
