భద్రాద్రికొత్తగూడెం జిల్లాలో ఖరీఫ్​ ప్రణాళిక ఖరారు

• భద్రాద్రికొత్తగూడెం జిల్లాలో 4,87,312 ఎకరాల్లో పంటల సాగు
• ఈసారి సాధారణ వర్షపాతం ఉంటుందని వాతావరణ శాఖ వెల్లడి
• గతేడాది కంటే ఈసారి అదనంగా 27,512 ఎకరాల్లో సాగుకు ప్లాన్​

భద్రాద్రికొత్తగూడెం, వెలుగు : భద్రాద్రికొత్తగూడెం జిల్లాలో ఖరీఫ్​ ప్రణాళికను వ్యవసాయశాఖాధికారులు ఫైనల్​ చేశారు. వానాకాలం సాగులో భాగంగా జిల్లాలో దాదాపు 4,87,312 ఎకరాల్లో పలు పంటలను సాగు చేసే అవకాశం ఉందని అగ్రికల్చర్​ డిపార్ట్​మెంట్​అంచనా వేసింది. ఇందుకు గానూ విత్తనాలు ఎంత మేర అవసరమో ప్రభుత్వానికి అధికారులు నివేదించారు. గతేడాది కంటే దాదాపు 27,512 ఎకరాల మేర అదనంగా ఈ సారి సాగు అయ్యే అవకాశం ఉందని వ్యవసాయ శాఖాధికారులు అంచనాలు రూపొందించారు. 

2,16,625 ఎకరాల్లో పత్తి సాగు..

ఈ ఏడాది సాధారణ వర్షపాతం ఉంటుందని వాతావరణశాఖాధికారులు పేర్కొనడంతో డిమాండ్​ ఉన్న పంటలను గతం కంటే కొంత ఎక్కువగా సాగు చేసేందుకు రైతులు సిద్ధమవుతున్నారు. ప్రస్తుతం వేసవి దుక్కులు దున్నడంలో రైతులు బిజీగా ఉన్నారు. వానాకాలం పంటల సాగు, విత్తనాలు, ఎరువులపై ఇప్పటికే వ్యవసాయశాఖాధికారులు, డీలర్లతో కలెక్టర్​ ఇటీవల సమీక్షించారు. జిల్లాలో పత్తి పంట పెద్ద ఎత్తున సాగు కానుంది. జిల్లా వ్యాప్తంగా 4,87,312 ఎకరాల్లో పత్తి, వరి, పెసలు, కంది, మొక్కజొన్న, వేరుశనగ, మిర్చితో పాటు పలు పంటలను రైతులు సాగు చేయనున్నారు. 

గతేడాది వానాకాలం సీజన్​లో జిల్లాలో 4,59,793 ఎకరాలు ఆయా పంటలను రైతులు సాగు చేశారు. గతేడాది కంటే ఈసారి అదనంగా దాదాపు 27,512 ఎకరాల సాగు విస్తీర్ణం పెరగనుంది. గతేడాది జిల్లాలో 2,02,262 ఎకరాల్లో పత్తి సాగు కాగా, ఈ సీజన్​లో 2,16,625 ఎకరాల్లో సాగు కానుంది. ఇందుకు గానూ 5,41,560 ప్యాకెట్ల పత్తి విత్తనాలు అవసరం కానున్నాయి. గతేడాది వరి పంట సాగు 1,61,157 ఎకరాల్లో కాగా, ఈ సారి 1,65,854 ఎకరాల్లో సాగు కానుంది. 

41,464 క్వింటాళ్ల వరి విత్తనాలు అవసరం ఉందని అధికారులు అంచనా వేశారు. గతేడాది మొక్కజొన్న 59,185 ఎకరాల్లో సాగు కాగా, ప్రస్తుత సీజన్​లో 60,200 ఎకరాల్లో సాగు కానుంది. 29,694 ఎకరాల్లో గతేడాది మిర్చిని రైతులు సాగు చేయగా, ఈ సారి 32,168 ఎకరాల్లో పండించనున్నారు. వేరుశనగ 3,296 ఎకరాల్లో గతేడాది సాగు చేయగా, ఈసారి 2,359 ఎకరాల్లో సాగుకే పరిమితం కానుంది. ఇవే కాకుండా పెసలు, కందులు లాంటి పంటలను రైతులు సాగు చేయనున్నారు.

 నాసిరకం విత్తనాలపై అలర్ట్​గా ఉండాలి

నాసిరకం విత్తనాలపై రైతులు అలర్ట్​గా  ఉండాలి. డిమాండ్​ ఉన్న పంటలను సాగు చేసేందుకు రైతులు ముందుకు వస్తున్నారు. పత్తి విత్తనాలు అందుబాటులో ఉన్నాయి. 60శాతం రాయితీపై పచ్చిరొట్ట విత్తనాలను సొసైటీల్లో దొరుకుతున్నాయి. విత్తనాలను అధిక ధరలకు అమ్మే వారిపై చర్యలు తీసుకుంటాం.
- బాబూరావు, జిల్లా వ్యవసాయశాఖాధికారి, భద్రాద్రికొత్తగూడెం