వేములవాడరూరల్, వెలుగు: రానున్న అసెంబ్లీ ఎన్నికల్లో 65 నుంచి 70 సీట్లు గెలిచి అధికారంలోకి వచ్చేది కాంగ్రెస్సేనని ఏఐసీసీ సెక్రటరీ క్రిస్టోఫర్ తిలక్, వేములవాడ కాంగ్రెస్ అభ్యర్థి ఆది శ్రీనివాస్ అన్నారు. రాజన్న సిరిసిల్ల జిల్లా చందుర్తి మండల కేంద్రంలో సోమవారం కార్యకర్తల సమావేశం నిర్వహించారు. ఈ సందర్భంగా వారు మాట్లాడుతూ వచ్చే ఎన్నికల్లో కాంగ్రెస్ అధికారంలోకి వస్తుందని సర్వేలు చెబుతున్నాయన్నారు.
కేంద్రంలో మోదీ ఏటా రెండు కోట్ల ఉద్యోగాలు, తెలంగాణలో సీఎం కేసీఆర్2 లక్షలు ఉద్యోగాలు ఇస్తామని అధికారంలోకి వచ్చి నిరుద్యోగులను మోసం చేశారన్నారు. 10 ఏళ్ల లో బీఆర్ఎస్ గ్యాస్సిలిండర్రూ.400 కు ఎందుకు ఇవ్వలేదన్నారు. సమావేశంలో జడ్పీటీసీ నాగం కుమార్, లీడర్లు రామస్వామి, శ్రీనివాస్, గణేశ్‌, రేణుక, రాంరెడ్డి, ముకుంద రెడ్డి, మధు, పద్మ, రవీందర్‌‌‌‌రెడ్డి, మల్లేశం పాల్గొన్నారు.
ఒక్క అవకాశం ఇవ్వండి..
వేములవాడ: డబ్బుల ప్రలోభాలకు ప్రజలు లొంగొద్దని, 20 ఏండ్లుగా మీ కష్టా సుఖాల్లో తోడున్నానని, ఒక్క అవకాశం ఇచ్చి గెలిపించాలని వేములవాడ కాంగ్రెస్అభ్యర్థి ఆది శ్రీనివాస్ అన్నారు. వేములవాడ పట్టణంలోని హరిమల గార్డెన్స్ లో ఆయన మీడియాతో మాట్లాడారు. కాంగ్రెస్ అధికారంలోకి రాగానే రాజన్న ఆలయాన్ని పర్యాటక కేంద్రంగా మారుస్తామన్నారు. వెనకబడిన వేములవాడను ముందుకు తీసుకుపోవడానికి అవకాశం ఇవ్వాలని కోరారు.
