- ఫారిన్ టూర్లలో మాత్రం జట్టు వెంటే ఉంటున్న అజిత్
- ప్రతిభావంతులకు అన్యాయం చేస్తున్నాడన్న విమర్శలు
సొంతగడ్డపై న్యూజిలాండ్‌, సౌతాఫ్రికా జట్ల చేతిలో వైట్‌‌‌‌వాష్‌ ఎదుర్కొని, టెస్టు క్రికెట్‌‌‌‌లో గతంలో ఎన్నడూ లేనంతగా డీలాపడ్డ టీమిండియా తీరు అభిమానులను ఆందోళనలోకి నెట్టేసింది. స్వదేశంలో ఇండియా అజేయం అనే రికార్డు కళ్ళముందే కరిగిపోతుంటే.. హెడ్ కోచ్ గౌతమ్ గంభీర్ వ్యూహాలతో పాటు, చీఫ్ సెలెక్టర్ అజిత్ అగార్కర్ సెలెక్షన్ విధానాలపై తీవ్ర విమర్శలు వెల్లువెత్తుతున్నాయి. ముఖ్యంగా డొమెస్టిక్ క్రికెట్ పట్ల చీఫ్ సెలెక్టర్ నిర్లక్ష్య వైఖరిపైనే ఇప్పుడు ప్రధాన చర్చ నడుస్తోంది. గత 12 నెలల అగార్కర్ షెడ్యూల్‌‌‌‌ను పరిశీలిస్తే.. ఆస్ట్రేలియా, దుబాయ్, ఇంగ్లండ్, మళ్లీ దుబాయ్, ఆస్ట్రేలియా.. ఇలా టీమిండియా ఎక్కడ పర్యటిస్తే అక్కడ చీఫ్ సెలెక్టర్ వాలిపోతున్నాడు. జట్టు జెర్సీ ధరించి నెట్ సెషన్లలో హల్‌చల్ చేయడం, ఆ వెంటనే గోల్ఫ్ కోర్సుల్లో సేద తీరడం, ప్రముఖ రెస్టారెంట్లకు వెళ్లడం పరిపాటిగా మారింది. తోటి సెలెక్టర్ శివసుందర్ దాస్‌‌‌‌ను వెంటేసుకుని ఫారిన్ టూర్లలో బిజీగా ఉంటున్న అగార్కర్‌‌‌‌కు, ఇండియా క్రికెట్‌‌‌‌కు పునాది లాంటి రంజీ ట్రోఫీ మ్యాచ్‌‌‌‌లను గ్రౌండ్‌‌‌‌కు వెళ్లి చూసే తీరిక మాత్రం ఉండటం లేదు. అగార్కర్ చివరగా గతేడాది చెన్నైలో జరిగిన తమిళనాడు–-కర్నాటక రంజీ మ్యాచ్‌‌‌‌ను స్వయంగా వీక్షించాడు. ఆ మ్యాచ్‌‌‌‌లో భారీ సెంచరీ కొట్టిన దేవదత్ పడిక్కల్ ప్రతిభను కళ్లారా చూశాడు కాబట్టే, కేఎల్ రాహుల్ స్థానంలో అతనికి టెస్ట్ అరంగేట్రం అవకాశం దక్కింది. దీన్ని బట్టి సెలెక్టర్లు నేరుగా రంజీ మ్యాచ్‌‌‌‌లకు వెళ్తే ఇంకెందరో పడిక్కల్‌‌‌‌లు వెలుగులోకి వచ్చేవారని విశ్లేషకులు అంటున్నారు. కానీ ఆ తర్వాత అగార్కర్ రంజీ వైపు కన్నెత్తి చూడలేదన్నది చేదు నిజం.
ప్లేయర్లకో న్యాయం.. సెలెక్టర్‌‌‌‌‌‌‌‌కో న్యాయమా?
డొమెస్టిక్ క్రికెట్ ఆడలేదన్న కారణంతో ఇషాన్ కిషన్, శ్రేయస్ అయ్యర్ వంటి స్టార్ల సెంట్రల్ కాంట్రాక్టులను బీసీసీఐ రద్దు చేసింది. పాండ్యా, రోహిత్, కోహ్లీలను కూడా రంజీల్లో ఆడాలని అగార్కర్ ఆదేశించాడు. ప్లేయర్లు డొమెస్టిక్ క్రికెట్ ఆడకపోతే శిక్షలు వేస్తున్న చీఫ్ సెలెక్టర్, స్వయంగా ఆ మ్యాచ్‌‌‌‌లను చూడకపోవడం ఎంతవరకు న్యాయమని మాజీలు ప్రశ్నిస్తున్నారు.
అర్హులకు అన్యాయం!
ప్రస్తుత సెలెక్షన్ కమిటీ తీరు గందరగోళంగా ఉంది. దేశవాళీ క్రికెట్‌‌‌‌లో పరుగుల వరద పారిస్తున్న సర్ఫరాజ్ ఖాన్, అభిమన్యు ఈశ్వరన్, బాబా ఇంద్రజిత్ వంటి వారికి దక్కాల్సిన ప్రాధాన్యత దక్కడం లేదు. అదే సమయంలో ఫస్ట్ క్లాస్ క్రికెట్‌‌‌‌లో పెద్దగా అనుభవం లేని నితీష్ రెడ్డి, ధ్రువ్ జురెల్, సాయి సుదర్శన్ వంటి వారిని గట్ ఫీలింగ్ (నమ్మకం) పేరుతో ఎంపిక చేస్తున్నారు. వీరి ఎంపిక ఫలితాలను ఇచ్చినప్పటికీ, పద్ధతి మాత్రం సరైనది కాదన్నది విశ్లేషకుల మాట. గ్రౌండ్‌‌‌‌లో ఆటను చూడకుండా కేవలం ఐపీఎల్ లేదా షార్ట్ టర్మ్ పెర్ఫామెన్స్ ఆధారంగా టెస్టులకు ఎంపిక చేయడం రంజీ వ్యవస్థను అవమానించడమే అనొచ్చు.
యాప్ చూసి సెలెక్షనా?
ఈ విమర్శలపై ఓ బీసీసీఐ అధికారి ఇచ్చిన సమాధానం మరింత విస్మయం కలిగిస్తోంది. ‘ దేశవాళీ మ్యాచ్‌‌‌‌ల స్కోర్లు బీసీసీఐ, ఇతర యాప్స్‌లో వస్తున్నాయి కదా, అవి చూస్తే సరిపోతుంది’ అని వ్యాఖ్యానించాడు. మరి యాప్‌‌‌‌లో అంకెలు చూసి జట్టును ఎంపిక చేయడానికి లక్షల జీతాలిచ్చి సెలెక్టర్లు ఎందుకు? ఆ పని ఏఐ ఇంకా బాగా చేస్తుంది కదా? ఒక బ్యాటర్ క్లిష్టమైన పిచ్‌‌‌‌పై చేసిన 70 రన్స్ ఫ్లాట్ పిచ్‌‌‌‌పై చేసిన 120 కంటే విలువైనవి. ఇది మైదానంలో ఆట చూస్తేనే తెలుస్తుంది. ఈ విషయం సెలెక్టర్లకు తెలియంది కాదు. గతంలో ముంబై చీఫ్ సెలెక్టర్గా ఉన్నప్పుడు కూడా అగార్కర్ లోకల్ మ్యాచ్‌‌‌‌లను చూడటం లేదన్న విమర్శలతో పాటు టీమ్‌ సెలెక్షన్స్‌ వివాదం కావడంతో రాజీనామా చేయాల్సి వచ్చింది. ఇప్పుడు నేషనల్ చీఫ్ సెలెక్టర్గా ‘వర్క్ ఫ్రమ్ అబ్రాడ్’ పంథాను కొనసాగిస్తుండటం ఇండియా క్రికెట్ భవిష్యత్తుకు ప్రమాదకరం. ఇప్పటికైనా అగార్కర్ ఫారిన్ టూర్లు తగ్గించి దేశవాళీ కుర్రాళ్ళ కష్టాన్ని దగ్గరుండి
గమనించాలి.
