ఆటలంటే అందరికీ ఇష్టమే. కాకపోతే ఒక్కొక్కరికీ ఒక్కో ఆటలో స్పెషల్ ఇంట్రెస్ట్ ఉంటుంది. కానీ, ఈ ఊళ్లో ఒక్కరో ఇద్దరో కాదు అందరి ఇంట్రెస్ట్ ఒక్కటే. అదే కబడ్డీ. ఇక్కడ ఏ ఇంటికెళ్లినా కబడ్డి.. కబడ్డి.. కూతే వినపడుతుంది. ఉడుం పట్లు కనిపిస్తాయి. ప్లేయర్లు జర్రున రైడర్ని అందుకుంటుంటే..చూసేవాళ్లకే చెమటలు పడతాయి. వాళ్ల ప్రతిభ ఆ ఊరికే పరిమితం కాలేదు. రాష్ట్ర, జాతీయ స్థాయి పోటీల్లోనూ సత్తా చాటారు. ఎన్నో పతకాలు గెలుచుకున్నారు. కబడ్డీ కూతతో మారు మోగుతున్న ఈ ఊరి పేరు బురదపల్లి.
నిర్మల్ జిల్లా మామడ మండలంలో ఉన్న ఓ మారుమూల ఆదివాసీ గూడెం బురదపల్లి. గోండు బిడ్డలు ఉండే ఈ ఊరిని ఒకప్పుడు అన్నలకు షెల్టర్ జోన్గా పిలిచేవాళ్లు. అలాంటి ఊరు ఇప్పుడు స్పోర్ట్స్ విలేజ్గా మారింది. దీనికి కారణం కబడ్డీ ఆటని వీళ్లు తమ ఊరి ఆనవాయితీల్లో ఒకటిగా చూడటమే. ఆ ఆనవాయితీనే ఇప్పుడు ఈ ఊరి కుర్రాళ్లని పతకాల వైపు పరుగులు పెట్టిస్తోంది. అయితే దీనంతటికి కారణమైన కోచ్ ఆడే రాములు గురించి ప్రత్యేకంగా చెప్పుకోవాలి.
పతకాలు గెలుచుకుంటున్నరు
కబడ్డీ ఇక్కడ ఎప్పుడు మొదలైందో తెలియదు. కానీ.. ఈ ఊరి ఆటకి ప్రాణం పోసింది మాత్రం రాములు. తన తండ్రి నుంచి వారసత్వంగా కబడ్డీ నేర్చుకున్నాడు రాములు. లోకల్ పోటీల్లోనూ పాల్గొన్నాడు. తనలా కబడ్డీని ప్రేమించేవాళ్ల కోసం ఇరవైయేండ్ల కిందట కోచ్గా కూడా మారాడు. అది కూడా ఫ్రీగా. ఊళ్లో దాదాపు ఆరు టీమ్లు తయారుచేశాడు. అలా రాములు దగ్గర కోచింగ్ తీసుకున్న మనోజ్కుమార్ ఉత్తరప్రదేశ్ లో జరిగిన జాతీయస్థాయి కబడ్డీ పోటీల్లో పతకం గెలుచుకున్నాడు. అలాగే మరో ప్లేయర్ ఆడే రవి జార్ఖండ్లో జరిగిన జాతీయ స్థాయి కబడ్డీ పోటీల్లో రాష్ట్ర జట్టు తరఫున మెడల్స్ సాధించాడు . సిడాం రంభ అనే అమ్మాయి కూడా కబడ్డీలో జిల్లాస్థాయిలో మెడల్స్ గెలుచుకుంది.
కాంపిటీషన్స్
బురదపల్లి సర్పంచ్తో పాటు ఆదివాసీ కులపెద్ద పటేల్ కూడా కబడ్డీ ప్లేయరే. దాంతో ఈ ఊరి పిల్లలకి కబడ్డీ మరింత దగ్గరైంది. వాళ్ల సాయంతో ఊరిలో పోటీలు కూడాపెడుతున్నాడు రాములు. పండుగలు, సెలవు రోజుల్లో ఊళ్లోని టీమ్ల మధ్య కబడ్డీ పోటీలుపెడుతున్నాడు. ముఖ్యంగా ఈ ఊళ్లో గణేశ్ నవరాత్రులకి వారం రోజులు జరిగే కబడ్డీ టోర్నమెంట్ చాలా ప్రత్యేకం. ఈ టోర్నమెంట్కు చుట్టుపక్కల గ్రామాల్లోని గిరిజనులంతా వస్తారు. పోటాపోటీగా జరిగే ఆ కాంపిటీషన్ చూసేవాళ్ల గుండె చప్పుడు వేగం పెరగడం ఖాయం. రానున్న రోజుల్లో మరింత మందిని కబడ్డీ వైపు నడిపిస్తా అంటున్నాడు రాములు.
::: జె.మనోజ్ కుమార్ ,నిర్మల్, వెలుగు
