- గాఫ్ గ్రాండ్ సలాం..
- యూఎస్ ఓపెన్ టైటిల్ సొంతం
- 19 ఏండ్లకే గ్రాండ్స్లామ్ నెగ్గిన అమెరికన్ కోకో
- ఫైనల్లో సబలెంకపై విక్టరీ
న్యూయార్క్ : అమెరికా టీనేజ్ స్టార్ కోకో గాఫ్.. యూఎస్ ఓపెన్ విమెన్స్ సింగిల్స్ టైటిల్ను సొంతం చేసుకుంది. శనివారం అర్ధరాత్రి జరిగిన టైటిల్ ఫైట్లో ఆరోసీడ్ గాఫ్ 2–6, 6–3, 6–2తో రెండో సీడ్ అరినా సబలెంక (బెలారస్)పై సంచలన విజయం సాధించింది. దీంతో 19 ఏండ్ల వయసులోనే తొలి గ్రాండ్ స్లామ్ టైటిల్ను గెలుచుకుంది. అలాగే సెరెనా విలియమ్స్ (1999) తర్వాత యూఎస్ ఓపెన్ నెగ్గిన అమెరికా టీనేజర్గా రికార్డులకెక్కింది. 15 ఏండ్లకే వింబుల్డన్ క్వాలిఫయర్స్ ఆడిన గాఫ్.. 2019లో తొలి ప్రయత్నంలోనే గ్రాండ్స్లామ్లో నాలుగో రౌండ్కు చేరి టెన్నిస్ విశ్లేషకులను ఆశ్చర్యపరిచింది. గతేడాది ఫ్రెంచ్ ఓపెన్ ఫైనల్కు చేరి రన్నరప్తో తన సత్తా ఏంటో టెన్నిస్ ప్రపంచానికి చాటింది. అయితే జూలైలో జరిగిన వింబుల్డన్లో తొలి రౌండ్లోనే ఇంటిముఖం పట్టిన గాఫ్ సొంత గడ్డపై తన రాకెట్ పవర్ చూపెట్టింది. అప్పటి నుంచి ఆడిన 19 మ్యాచ్ల్లో 18 గెలిచింది. ఇందులో వరుసగా 12 గెలవడం మరో విశేషం. విజేతగా నిలిచిన గాఫ్కు ట్రోఫీ, రూ. 24 కోట్ల 93 లక్షల ప్రైజ్మనీ లభించింది.
తొలి సెట్ ఓడినా..
అమెరికా లెజెండ్స్ సెరెనా, వీనస్ బాటలో టెన్నిస్లోకి వచ్చిన గాఫ్ తనకు మంచి కెరీర్ ఉందని నిరూపించుకుంది. ఓవైపు సబలెంక పవర్ షాట్స్తో విరుచుకుపడుతున్నా తనకు ఉన్న అతి తక్కువ అనుభవంతో ఆమెను కట్టడి చేసింది. 2 గంటల 6 నిమిషాల టైటిల్ ఫైట్లో గాఫ్ తొలిసెట్ను చేజార్చుకుంది. దీంతో సబలెంక ఈజీగా టైటిల్ నెగ్గుతుందని అంచనా వేశారు. కానీ వాటిని తారుమారు చేస్తూ గాఫ్ తన రాకెట్ పవర్ను చూపెట్టింది. నిర్ణయాత్మక మూడో సెట్లో 4–0 లీడ్లో ఉన్న దశలో ‘కమాన్’ అంటూ గాఫ్ పెట్టిన కేక ఆర్థర్ యాష్ స్టేడియాన్ని ఊపేసింది. తర్వాత తన సర్వ్లను కాపాడుకుని చిరస్మరణీయ విజయాన్ని సొంతం చేసుకుంది. ఇక మేజర్ టోర్నీల్లో 23–2తో రికార్డు, ఈ ఏడాది ఆస్ట్రేలియన్ ఓపెన్ విన్నర్గా ఆట మొదలుపెట్టిన సబలెంక చివరి రెండు సెట్లలో తీవ్రంగా నిరాశపర్చింది. గాఫ్ క్రాస్ కోర్టు విన్నర్ల ముందు తేలిపోయింది. 46 అన్ఫోర్స్డ్ ఎర్రర్స్ చేసి మూల్యం చెల్లించుకుంది. కోకో 19 అనవసర తప్పిదాలు మాత్రమే చేసింది. 9 బ్రేక్ పాయింట్లలో గాఫ్ 5 కాపాడుకోగా, సబలెంక 10లో నాలుగింటినే సద్వినియోగం చేసుకుంది. మ్యాచ్ మొత్తంలో గాఫ్ 2 ఏస్లు, 5 డబుల్ ఫాల్ట్స్ చేయగా, సబలెంక 4 ఏస్లు, 6 డబుల్ ఫాల్ట్స్ చేసింది.
మూడో ర్యాంక్కు..
ఈ విజయంతో కోకో డబ్ల్యూటీఏ ర్యాంక్ కూడా మెరుగుపడనుంది. వరల్డ్ నంబర్వన్గా ఉన్న ఇగా స్వైటెక్ రెండో ప్లేస్కు పడిపోగా, సబలెంక టాప్ ర్యాంక్లోకి వెళ్లనుంది. గాఫ్ మూడో ర్యాంక్లోకి రానుంది.
రాత్రి 1 వరకు బాయ్ ఫ్రెండ్తో చాట్
గ్రాండ్స్లామ్ ఫైనల్ అంటేనే విపరీతమైన ఒత్తిడి, ఆందోళన ఉంటాయి. లెజెండ్స్ సైతం ఫైనల్ ఆడే ముందు చాలా ప్రశాంతంగా ఉండేందుకు ప్రయత్నిస్తారు. ఫ్రెష్ మైండ్, స్ట్రాటజీలతో స్టేడియంలోకి అడుగుపెడతారు. కానీ కోకో గాఫ్ మాత్రం వీటన్నింటికి పూర్తి భిన్నం. మ్యాచ్కు ముందు రోజు రాత్రి ఒంటి గంట వరకు తన బాయ్ ఫ్రెండ్తో చాట్ చేసింది. ఇక తుదిపోరు కోసం కోర్టులోకి అడుగుపెట్టే పది నిమిషాల ముందు కూడా లాకర్ రూమ్లో తన మొబైల్లో చాట్స్, సోషల్ మీడియా మీమ్స్ చూస్తూ గడిపింది. ఓ టీనేజర్గా చేయాల్సిన అన్ని పనులను చేస్తూనే కెరీర్లో అతి పెద్ద విజయాన్ని అవలీలగా సాధించడం యంగ్ సెన్సేషన్ గాఫ్ స్పెషాలిటీ.
