న్యూఢిల్లీ : తెలంగాణ డిస్కంల నుంచి రావాల్సిన విద్యుత్ బకాయిలు చెల్లించేలా ఆ రాష్ట్ర సర్కార్ కు ఆదేశాలివ్వాలని ఏపీ సీఎం జగన్ కేంద్రానికి విజ్ఞప్తి చేశారు. ఈ మేరకు సోమవారం ప్రధాని నరేంద్ర మోడీ, కేంద్ర విద్యుత్ శాఖ మంత్రి ఆర్కే సింగ్ను కలిసి విజ్ఞప్తి చేశారు. ఢిల్లీలో ప్రధానితో అరగంటపాటు భేటీ అయిన జగన్.. ఏపీకి చెందిన పలు అంశాలతోపాటు తెలంగాణ నుంచి రావాల్సిన విద్యుత్ బకాయిలను ఆయన దృష్టికి తీసుకెళ్లారు. దాదాపు రూ.6,756 కోట్ల బకాయిలు ఉన్నాయని, 8 ఏండ్లుగా ఈ సమస్య పరిష్కారం కావడం లేదని వివరించారు. ఈ మొత్తం ఇప్పిస్తే కష్టాల్లో ఉన్న రాష్ట్ర విద్యుత్ కంపెనీలు ఒడ్డున పడతాయని, ఉత్పత్తిదారులకు బకాయిలు చెల్లించే వీలు కలుగుతుందని చెప్పారు. అలాగే, విభజన సమయంలో ఇచ్చిన హామీలను అమలు చేయాలని కూడా జగన్ విజ్ఞప్తి చేశారు. విభజన వల్ల రాష్ట్రం తీవ్రంగా నష్టపోయిందని, పార్లమెంటు సాక్షిగా ఇచ్చిన హామీలు అమలు చేయాలని కోరారు. ఏపీకి స్పెషల్ స్టేటస్ ఇవ్వాలని విజ్ఞప్తి చేశారు. అనంతరం మధ్యాహ్నం 12:30కు రాష్ట్రపతి ద్రౌపది ముర్మును కలిసి శుభాకాంక్షలు తెలిపారు. మధ్యాహ్నం 1:30కు కేంద్ర విద్యుత్ శాఖ మంత్రి ఆర్కే సింగ్ ను కలిశారు. ఆయనతోనూ తెలంగాణ చెల్లించాల్సిన విద్యుత్ బకాయిలపై చర్చించారు.
ఏపీకి తెలంగాణ రాష్ట్రం బకాయిలు చెల్లించాలి: కేంద్ర మంత్రి
తెలంగాణ సర్కారు దాదాపు రూ.6 వేల కోట్లు ఏపీకి విద్యుత్ బకాయిలు చెల్లించాల్సి ఉందని కేంద్ర విద్యుత్ శాఖ మంత్రి ఆర్కే సింగ్ వెల్లడించారు. జగన్తో భేటీ తర్వాత ఆయన మీడియాతో మాట్లాడారు. బకాయిల విషయం సొలిసిటర్ జనరల్ వద్ద ఉందని, త్వరలోనే దీనిపై నిర్ణయం తీసుకుంటామని చెప్పారు. చట్టం ప్రకారమే బకాయిల అంశాన్ని పరిష్కరిస్తామన్నారు. పవర్ ఎక్స్చేంజీలలో కొనుగోళ్లు, బకాయిలపై సమాచారంలో ఎంటువంటి పొరపాట్లు జరగలేదన్నారు. విద్యుత్ కొనకుండా ఏ రాష్ట్రంపై నిషేధం విధించలేదని చెప్పారు.
