కోల్బెల్ట్, వెలుగు : గత ఎన్నికల్లో ఇచ్చిన హామీలను నెరవేర్చకుండా మరోసారి లబ్ది పొందేందుకు ప్రజలను చెన్నూరు ఎమ్మెల్యే బాల్క సుమన్ మభ్యపెడుతున్నాడని బీజేపీ నియోజకవర్గ ఇన్చార్జి అందుగుల శ్రీనివాస్ ఆగ్రహం వ్యక్తం చేశారు. స్వచ్ఛతా హీ సేవా ప్రోగ్రాంలో భాగంగా ఆదివారం మంచిర్యాల జిల్లా చెన్నూరు నియోజకవర్గం క్యాతనపల్లి మున్సిపాలిటీలోని గద్దెరాగడిలో శ్రమదానం చేశారు. ఈ సందర్భంగా ఆయన మాట్లాడుతు మంత్రి కేటీఆర్ పర్యటన విడ్డూరంగా ఉందన్నారు. రాష్ట్ర నాయకులను ఇక్కడి తీసుకవస్తున్నారంటే స్థానిక ఎమ్మెల్యే సుమన్ ఎలాంటి పనిచేయలేదని అర్థమవుతోందన్నారు.
మందమర్రి, క్యాతనపల్లి మున్సిపాలిటీల్లో డబుల్ బెడ్ రూమ్ ఇండ్లు అసంపూర్తిగా ఉన్నాయని తెలిపారు. ఆరు వేల అప్లికేషన్లు వస్తే కేవలం 575 ఇండ్లు మాత్రమే నిర్మించారన్నారు. వీటిని కూడా తన అనుచరులకు ఇచ్చేందుకు బాల్క సుమన్ మంత్రి చేత ప్రారంభింపజేశారని ఆరోపించారు. చెన్నూరు పట్టణంలో ఇప్పటి వరకు ఒక ఇంటిని కూడా నిర్మించలేదన్నారు. నియోజకవర్గ అభివృద్ధికి బాల్క సుమన్ ఎలాంటి కృషి చేయలేదని చెప్పారు.
మంత్రి పర్యటన సందర్భంగా తమ పార్టీ లీడర్లు, కార్యకర్తలను ముందస్తు అరెస్టు చేయించడం ఎంతవరకు సమంజసమన్నారు. నియోజకవర్గంలో సుమన్ ఇసుక మాఫియాను ప్రోత్సాహిస్తున్నారని, దోపిడీ, ఆరాచకాలకు అడ్డగా మార్చారని ఆరోపించారు. సింగరేణి కారుణ్య నియామకాల్లో పైరవీలు సాగుతున్నాయన్నారు. స్థానిక యువతకు ఉపాధి కోసం లెదర్పార్కును వెంటనే ప్రారంభించాలని డిమాండ్ చేశారు. కార్యక్రమంలో బీజేపీ నియోజకవర్గ కన్వీనర్ అక్కల రమేశ్ తదితరులు పాల్గొన్నారు.
