యాపిల్ ఆపరేటింగ్ సిస్టమ్ లేటెస్ట్ వెర్షన్ ‘ఐఓఎస్13’. యాపిల్ అభిమానులు ఎదురుచూస్తున్న ఈ అప్డేటెడ్ వెర్షన్ త్వరలోనే విడుదలకు సిద్ధమవుతోంది. వచ్చే నెల మూడు నుంచి ఏడు వరకు క్యాలిఫోర్నియాలో జరగనున్న ‘వరల్డ్వైడ్ డెవలపర్స్ కాన్ఫరెన్స్–19’(డబ్ల్యూడబ్ల్యూడీసీ–19)లో ‘ఐఓఎస్–13’కు సంబంధించిన వివరాల్ని యాపిల్ వెల్లడించనుంది.
స్మార్ట్ఫోన్స్, ల్యాప్టాప్స్, మ్యాక్ బుక్స్, ట్యాబ్లెట్స్, ఇతర పరికరాలను రూపొందిస్తున్న ‘యాపిల్’ తమ సంస్థకు సంబంధించిన ప్రణాళికలు, విశేషాలను ప్రతిఏటా డబ్ల్యూడబ్ల్యూడీసీలో వెల్లడిస్తుంది. ఈ ఏడాదికి సంబంధించి వచ్చే నెలలో ఈ కాన్ఫరెన్స్ జరగనుంది. దీనిలో యాపిల్ సంస్థకు చెందిన ప్రతినిధులు, డెవలపర్లు పాల్గొంటారు. ఈ కాన్ఫరెన్స్లో అన్నింటికంటే ఎక్కువగా ఆకర్షిస్తున్న అంశం ‘ఐఓఎస్–13’. దీని కోడ్ నేమ్ ‘యుకాన్’. ఈ కొత్త ఆపరేటింగ్ సిస్టమ్ ఎప్పుడు అందుబాటులోకి వస్తుంది.. ఫీచర్లు.. వంటివాటి గురించి వివరిస్తారు. ఈ ఏడాది సెప్టెంబర్ తర్వాత విడుదలయ్యే ఐఫోన్ లెవెన్, తర్వాతి మోడల్స్ కొత్త ఐఓఎస్తోనే విడుదలయ్యే అవకాశం ఉంది.
అదే సమయంలో మిగతా ఫోన్లకూ అప్డేట్వస్తుంది. టెక్ నిపుణుల అంచనా ప్రకారం ‘ఐఓఎస్–13’లో ఉండబోయే కొన్ని ఫీచర్లు.
డార్క్ మోడ్
ఆండ్రాయిడ్ ‘క్యూ’ వెర్షన్లో డార్క్ మోడ్ను ప్రవేశపెడుతున్నట్లు ఇటీవలే గూగుల్ ప్రకటించింది. దీంతో ఇదే ఫీచర్పై యాపిల్ కూడా దృష్టి సారించింది. యాపిల్ కూడా రాబోయే అప్డేట్లో డార్క్మోడ్ను అందుబాటులోకి తేనుంది. పైగా ఈ ఫీచర్ను ఈజీగా యాక్సెస్ చేసేలా రూపొందిస్తోంది. ఐఫోన్లలో హోమ్ బటన్ పైకి స్వైప్ చేయడం ద్వారా డార్క్మోడ్ ఆన్ అవుతుంది.
స్వైప్ కీబోర్డ్
ఈసారి స్వైప్ కీబోర్డును యాపిల్ యాడ్ చేస్తోంది. ఇది గూగుల్ ‘జీబోర్డ్ కీ’లాగా, ‘స్విఫ్ట్ కీ’లాగా పని చేస్తుంది. ఐపాడ్ స్క్రీన్ను మ్యాక్ బుక్కు సెకండ్ స్క్రీన్గా వాడుకునే వీలుంది. ఇది ఇంతకుముందు ‘డ్యుయెట్ డిస్ప్లే’ యాప్ ద్వారా అందుబాటులో ఉండేది. అలాగే ‘ఐపాడ్ ప్రొ’ యూజర్లకు మౌస్ సపోర్ట్ లభించనుంది.
యాప్ అప్డేట్స్
ఐఓఎస్13తో యాపిల్ యాప్స్ అప్డేట్ అవుతాయి కాబట్టి కొత్త ఫీచర్లు అందుబాటులోకి వస్తాయి. యాపిల్ మెసేజింగ్ యాప్ ‘ఐమెసేజెస్’. దీనికి వాట్సాప్లాగే డిస్ప్లే నేమ్, ప్రొఫైల్ ఫొటో పెట్టుకునే అవకాశం కలగనుంది. మ్యాప్స్, రిమైండర్స్ యాప్స్ మరిన్ని కొత్త ఫీచర్లతో పనిచేస్తాయి. క్లాక్స్ యాప్లో ‘స్లీప్ మోడ్’ మరింత బాగా పనిచేస్తుంది. ఒక్కసారి ‘డునాట్ డిస్టర్బ్’ ఆన్ చేస్తే లాక్ స్క్రీన్ డార్క్గా మారిపోతుంది. కంట్రోల్ సెంటర్ నుంచి నోటిఫికేషన్స్ కూడా మ్యూట్ అవుతాయి. స్క్రీన్ టైమ్ కూడా అప్డేట్ అవుతోంది. దీనివల్ల పేరెంట్స్ తమ పిల్లలు ఎంత సేపు స్క్రీన్ వాడుకోవాలో నిర్ణయించుకోవచ్చు.
మరిన్ని ఫీచర్లు
- ‘సిరి’లో కూడా మార్పులు చేస్తున్నారు. కాల్ వచ్చినప్పుడు ఆన్సర్ చేయకపోతే, దానికి రీజన్ చెప్తూ మెసేజ్ను కాలర్కు పంపుతుంది.
- సాఫ్ట్వేర్లో మార్పులు చేయడం ద్వారా నైట్ షూటింగ్ మోడ్ను మార్పు చేస్తున్నారు. దీనివల్ల రాత్రిపూట ఫొటోలు, వీడియోలు మరింత స్పష్టంగా వస్తాయి.
- ఐ ఫోన్, ఐప్యాడ్స్పై మల్టీపుల్ యూజర్అకౌంట్స్ యాక్సెస్ చేయొచ్చు. ఒక్కరికంటే ఎక్కువ మంది ఒకే డివైజ్ను వేర్వేరు పర్సనల్ డివైజెస్గా వాడుకోవచ్చు.
- స్మార్ట్ వై–ఫై అనే కొత్త ఫీచర్ అందుబాటులోకి వస్తుంది. దీని ద్వారా ఒక ప్రదేశంలో వై–ఫై ఆన్ చేసినప్పుడు, ఆ ప్రదేశం మారగానే ఆటోమేటిగ్గా వై–ఫై ఆఫ్ అవుతుంది. దీని వల్ల బ్యాటరీ ఎక్కువ సేపు వస్తోంది.
- కాంటాక్ట్ యాప్లో నచ్చిన వ్యక్తులను ‘ఫేవరెట్’గా సెట్ చేసుకోవచ్చు. కాంటాక్ట్స్లో ఉన్న వ్యక్తులు ఎక్కడున్నారు? కాల్స్ తీసుకోగలరా.. లేదా? అనే సమాచారం తెలుసుకోవచ్చు. అయితే ఇది ఐఫోన్ యూజర్ల సమాచారాన్నే అందిస్తుంది.
