- ప్రెస్మీట్లో ఆర్మూర్ బీఆర్ఎస్ కౌన్సిలర్లు
- ప్రత్యర్థులే తప్పుడు ప్రచారం చేస్తున్నారని మండిపాటు
- ‘హైకమాండ్ ఆదేశాల మేరకే కౌన్సిలర్ల ప్రకటనలంటూ చర్చ
నిజామాబాద్/ఆర్మూర్, వెలుగు: ఆర్మూర్ మున్సిపాలిటీలో బీఆర్ఎస్ కౌన్సిలర్లు రెండు గ్రూప్లుగా విడిపోయారన్న వార్తలు జిల్లాలో హాట్ టాఫిక్గా మారిన నేపథ్యంలో శనివారం కౌన్సిలర్లు ఆర్మూర్లో ప్రెస్మీట్పెట్టారు. ఈ సందర్భంగా వారు మాట్లాడుతూ..అభివృద్ధి నిధుల కోసమే ఎమ్మెల్యేను కలిశామని,తమ మధ్య ఎలాంటి మనస్పర్థలు లేవని ప్రకటించారు. బీఆర్ఎస్ను దెబ్బతీసేందుకు ప్రత్యర్థులు కుట్ర చేశారని, ఈ కుట్రలను పట్టించుకోకుండా ముందుకు సాగుతామని స్పష్టం చేశారు. మున్సిపాలిటీలో బీఆర్ఎస్ కౌన్సిలర్లు చైర్పర్సన్పై తిరుగుబాటు చేశారని, అసమ్మతితో ఉన్నారని వచ్చిన వార్తలు అబద్ధమని ఖండించారు. చైర్ పర్సన్ పై తమకు ఎలాంటి కోపం లేదని, అవిశ్వాస తీర్మానం పెడుతున్నామనడం నిజం కాదన్నారు. ఆర్మూర్ అభివృద్ధికి ఎమ్మెల్యే రూ.200 కోట్లతో ప్రణాళికలు రూపొందిస్తున్నారని, అభివృద్ధి పనుల కోసమే తాము ఎమ్మెల్యేను కలిశామన్నారు. వైస్ చైర్మన్ షేక్ మున్ను, కౌన్సిలర్లు గంగా మోహన్ చక్రు, ఆకుల రాము, సీనియర్ నాయకులు ఖాందేశ్ శ్రీనివాస్, సుంకరి రంగన్న, రవి గౌడ్ , రెహ్మాన్ తదితరులు పాల్గొన్నారు.
హైకమాండ్ ఆదేశాల మేరకే..!
చైర్పర్సన్పై అసమ్మతి గళం వినిపించిన 26 మంది కౌన్సిలర్లు సడెన్గా ఐక్యతా రాగం అందుకోవడం హైకమాండ్ఆదేశాలేనన్న చర్చ సాగుతోంది. ఎన్నికలు సమీపిస్తున్న తరుణంలో పార్టీలో గ్రూపులకు బీజం పడితే ఇతర ప్రాంతాల్లోనూ వర్గపోరు తెరపైకి వస్తుందని ఎమ్మెల్యే సర్ది చెప్పారని తెలుస్తోంది. అయితే చైర్పర్సన్ పండిత్వినీత షాడోలుగా భర్త, బావలు తయారయ్యారని, మున్సిపాలిటీలో వెంచర్లకు అక్రమ అనుమతులు, అడ్డగోలు వసూళ్లు, ఖాళీ స్థలాలకు ఇంటి నంబర్లను కేటాయించడం, వివాదాస్పద స్థలాల్లో నిర్మాణాలు లాంటి అక్రమాలకు పాల్పడుతూ భారీగా డబ్బులు వసూలు చేస్తున్నారని కౌన్సిలర్లు హైదరాబాద్కు వెళ్లి ఎమ్మెల్యేకు ఆధారాలతో సహా వివరించారని తెలిసింది. చైర్పర్సన్ను ఎట్టి పరిస్థితుల్లోనూ మార్చాలని పట్టుబట్టినట్లు తెలుస్తోంది. ఈ నేపథ్యంలో ఎమ్మెల్యే వచ్చే వారంలో జిల్లాకు వచ్చి చైర్పర్సన్ కుటుంబ సభ్యులతో మీటింగ్ ఏర్పాటు చేస్తానని సర్ధిచెపినట్టు తెలుస్తోంది.
