ఆగస్టు నెల సినీ ప్రియులకు పండగే పండుగ. బాక్సాఫీస్ ను కొల్లగొట్టేందుకు సౌత్ ఇండియా సినిమాలు విడుదలకు సిద్ధంగాఉన్నాయి. ముఖ్యంగా బిగ్గెస్ట్ క్లాష్ ఆఫ్ ది ఇయర్ గా చెప్పుకుంటున్న రజినీకాంత్ ( Rajinikanth ) నటించిన 'కూలీ' ( Coolie ), జూనియర్ ఎన్టీఆర్ ( Jr NTR ), హృతిక్ రోషన్ ( Hrithik Roshan ) ప్రధాన పాత్రలో తెరకెక్కిన 'వార్ 2' ( War 2 ) ఒకే రోజు తలపడనున్నాయి. ఇవి రెండు ఆగస్టు 14న ప్రపంచవ్యాప్తంగా సందడి చేయనున్నాయి. భారీ బడ్జెట్స్ తో తెరకెక్కిన ఈ రెండు చిత్రాలపై అంచనాలు తారాస్థాయి చేరిఉన్నాయి. వీటితో పాటు ఆగస్టు నెలలో ప్రేక్షకుల ముందుకు రాబోతున్న సినిమాల పూర్తి వివరాలను తెలుసుకుందాం..
ఆగస్టు 1: థ్రిల్లింగ్ ఆరంభం!
ఆగస్టు నెల తొలి రోజే కొన్ని ఆసక్తికరమైన చిత్రాలు సందడి చేయనున్నాయి. శివకార్తికేయన్ ప్రొడక్షన్స్ సమర్పణలో తెరకెక్కిన కామెడీ-హారర్ చిత్రం 'హౌస్ మేట్స్' ( House Mates )ఆగస్టు 1న విడుదలవుతోంది. టి. రాజా వేల్ దర్శకత్వం వహించిన ఈ చిత్రంలో దర్శన్ ( Darshan ) , కాళి వెంకట్ ( Kali Venkat ) ప్రధాన పాత్రల్లో నటించారు. ఒక దెయ్యం పట్టిన అపార్ట్‌మెంట్ కాంప్లెక్స్, దాని వల్ల నివాసితులు ఎదుర్కొనే సమస్యల చుట్టూ ఈ కథ తిరుగుతుంది. హాస్యం, భయం కలగలిసిన ఈ చిత్రం ప్రేక్షకులకు వినోదాన్ని పంచుతుంది.
అదే రోజు( ఆగస్టు 1 , 2025 ) న జీవీ ప్రకాష్ నటించిన తమిళ చిత్రం 'బ్లాక్‌మెయిల్' ( Blackmail ) కూడా థియేటర్లలోకి వస్తుంది. ము. మారన్ దర్శకత్వం వహించిన ఈ చిత్రం ఒక థ్రిల్లర్ కావడంతో, ప్రేక్షకుల్లో ఆసక్తి నెలకొంది. మలయాళంలో, అర్జున్ అశోకన్ నటించిన హారర్ కామెడీ చిత్రం 'సుమతి వలవు' ( Sumathi Valavu ) కూడా ఆగస్టు 1న విడుదల కానుంది. విష్ణు శశి శంకర్ దర్శకత్వం వహించిన ఈ చిత్రంలో సైజు కురుప్, బాలు వర్గీస్, శివదా కీలక పాత్రల్లో నటించారు.
ఆగస్టు 14: బిగ్గెస్ట్ క్లాష్ ఆఫ్ ది ఇయర్!
ఆగస్టు 14న బాక్సాఫీస్ వద్ద ఒక పెద్ద యుద్ధమే జరగనుంది. రజినీకాంత్ అభిమానులు ఎంతగానో ఎదురుచూస్తున్న లోకేష్ కనగరాజ్ దర్శకత్వంలో తెరకెక్కిన 'కూలీ' అదే రోజున విడుదల కానుంది. ఈ చిత్రంలో రజనీకాంత్‌తో పాటు నాగార్జున, ఉపేంద్ర రావు, సౌబిన్ షాహిర్, బాలీవుడ్ స్టార్ ఆమిర్ ఖాన్ వంటి భారీ తారాగణం ఉండటం సినిమాపై అంచనాలను మరింత పెంచింది. యాక్షన్, డ్రామా, వినోదం కలగలిసిన ఈ చిత్రం ప్రేక్షకులకు ఒక విజువల్ ట్రీట్‌గా నిలవనుంది.
'కూలీ'కి పోటీగా 'వార్2'
'కూలీ'కి పోటీగా అదే రోజున యష్ రాజ్ ఫిలిమ్స్ నిర్మించిన భారీ యాక్షన్ థ్రిల్లర్ 'వార్ 2' కూడా వస్తోంది. అయాన్ ముఖర్జీ దర్శకత్వం వహించిన ఈ చిత్రంలో హృతిక్ రోషన్, జూనియర్ ఎన్టీఆర్, కియారా అద్వానీ ప్రధాన పాత్రల్లో నటించారు. YRF స్పై యూనివర్స్‌లో ఆరో చిత్రమైన 'వార్ 2', 'వార్ (2019)' చిత్రానికి సీక్వెల్. ఈ చిత్రం తమిళం, తెలుగు, హిందీ భాషల్లో విడుదల కానుంది. జూనియర్ ఎన్టీఆర్ బాలీవుడ్‌లోకి అడుగు పెడుతున్న తొలి చిత్రంగా 'వార్ 2'పై తెలుగు ప్రేక్షకుల దృష్టి కూడా ఎక్కువగా ఉంది. ఈ రెండు భారీ చిత్రాల మధ్య పోటీ రసవత్తరంగా మారనుంది.
మాస్ ఎంటర్‌టైనర్స్, ఫీల్-గుడ్ చిత్రాలు!
ఆగస్టు చివరి వారం కూడా కొన్ని ఆసక్తికరమైన విడుదలలకు వేదిక కానుంది. తెలుగు సినిమా మాస్ మహారాజా రవితేజ ( Ravi Teja ) తన 75వ చిత్రమైన 'మాస్ జాతర' ( Mass Jathara ) తో అభిమానులను అలరించడానికి సిద్ధంగా ఉన్నాడు. శ్రీలీల హీరోయిన్ గా నటించిన ఈ యాక్షన్-ప్యాక్డ్ ఎంటర్‌టైనర్ గణేష్ చతుర్థి వేడుకలకు ముందు, ఆగస్టు 27, 2025న థియేటర్లలోకి వస్తుంది.
మరో వైపు మలయాళంలో, మోహన్‌లాల్( Mohanlal ) నటించిన 'హృదయపూర్వం' ( Hridayapoorvam )చిత్రం ఆగస్టు 28న విడుదల కానుంది. సత్యన్ అంతిక్కాడ్ దర్శకత్వం వహించిన ఈ చిత్రంలో మాళవిక మోహనన్, సంగీత్ ప్రతాప్ కూడా నటించారు. ఇది ఒక ఫీల్-గుడ్ చిత్రంగా ప్రేక్షకులను ఆకట్టుకుంటుందని మూవీ మేకర్స్ అంచనా వేస్తున్నారు. కేరళలో ప్రధాన పండగ అయిన ఓనం సందర్భంగా ఆగస్టు 29న, హృదు హరూన్, ప్రీతి ముకుందన్ నటించిన కామెడీ డ్రామా చిత్రం 'మైనే ప్యార్ కియా' ( Maine Pyar Kiya )విడుదల కానుంది.
మొత్తం మీద, ఆగస్టు నెల సినీ ప్రియులకు పండగేనని చెప్పొచ్చు. భారీ బడ్జెట్ తో తెరకెక్కిన 'కూలీ', 'వార్ 2' పై ప్రపంచవ్యాప్తంగా అంచనాలు భారీగానే ఉన్నాయి. ఈ నెలలో అటు చిన్న చిత్రాలు కూడా సందడి చేస్తున్నాయి. మరి ఏ సినిమాలు బాక్సాఫీస్‌ను షేక్ చేస్తాయో, ఏ సినిమాలు ప్రేక్షకుల మన్ననలు పొందుతాయో చూడాలి మరి!
