చిన్నపిల్లలకు డైపర్లు ఎక్కువ సేపు వేయడం వల్ల కొన్నిసార్లు వాళ్లకు ర్యాష్ వస్తుంది. దీన్నే ‘ఇరిటెంటె డైపర్ డెర్మటైటిస్’ అంటారు. ఇదొక సాధారణ స్కిన్ ఇన్ఫ్లమేషన్. చాలావరకు తడి వల్ల ఈ ర్యాష్ వస్తుంది. మామూలుగా అయితే రెండు రోజుల్లో తగ్గిపోతాయి. అలాకాకుండా రెండు రోజుల తర్వాత కూడా డైపర్ ర్యాష్ తగ్గకుంటే పిల్లల్ని డాక్టర్కి చూపించాలి అంటున్నారు పిడియాట్రిషియన్స్. డైపర్ వేసినప్పుడు పిల్లల చర్మం తడిగా ఉంటే దురద పెడుతుంది. తడి వల్ల ఒక్కోసారి డైపర్ శరీరానికి రాసుకున్నప్పుడు చర్మం మంట పుడుతుంది. దాంతో ర్యాష్ మొదలవుతుంది. ఇవి పిరుదులు, తొడలు, జననాంగాల మీద ఎక్కువగా ఏర్పడతాయి. చిన్నగా ఎరుపు రంగులో ఉండి దురద పెడతాయి. డైపర్ ర్యాష్ని పట్టించుకోకుంటే ఈస్ట్ ఇన్ఫెక్షన్లు, సోరియాసిస్, ఎగ్జిమా వంటి స్కిన్ డిజార్డర్లు వచ్చే ప్రమాదం ఉంది. సెన్సిటివ్ స్కిన్ ఉన్న పిల్లల్లో డైపర్ ర్యాష్ ఎక్కువ.
ర్యాష్ రాకుండా..
పిల్లల బరువుని బట్టి వాళ్లకు సరిపోయే డైపర్ వేయాలి. డైపర్ వేసేముందు పిల్లల శరీరం తడిగా ఉండకూడదు. డైపర్లని తరచుగా మార్చడం, కొత్తవి వేయడం చాలాముఖ్యం. లేదంటే చర్మం మురికిగా అవుతుంది. ర్యాష్ ఉన్నదగ్గర టవల్తో రుద్దితే ఆ ప్రాంతం మరింత నొప్పి పెడుతుంది. అందుకని టవల్తో నెమ్మదిగా అద్దాలి.
