తిరుమల తిరుపతి దేవస్థానం (టీటీడీ) 2026 ఏప్రిల్ నెలకు సంబంధించి వివిధ దర్శనాలు, ఆర్జిత సేవలు, వర్చువల్ సేవలు, గదుల కోటాల విడుదల షెడ్యూల్ను ప్రకటించింది. షెడ్యూల్ ను జనవరి 19న ఉదయం 10 గంటలకు టీటీడీ ఆన్లైన్లో విడుదల చేయనుంది. ఏప్రిల్ నెల దర్శన కోటా వివరాలు ఈ కింది విధంగా ఉన్నాయి.
ఆర్జిత సేవా టికెట్లు:
తిరుమల శ్రీవారి ఆర్జిత సేవా టికెట్లు (సుప్రభాతం, తోమాల, అర్చన, అష్టదళ పాదపద్మారాధన సేవ) ఏప్రిల్ నెలకు సంబంధించిన కోటాను జనవరి 19న ఉదయం 10 గంటలకు టీటీడీ ఆన్లైన్లో విడుదల చేయనుంది.
ఈ సేవా టికెట్ల కోసం ఎలక్ట్రానిక్ డిప్కు జనవరి 21 ఉదయం 10 గంటల వరకు నమోదు చేసుకోవచ్చు. టికెట్లు పొందిన వారు జనవరి 21 నుంచి 23 మధ్యాహ్నం 12 గంటలలోపు చెల్లించాల్సి ఉంటుంది. చెల్లింపు పూర్తి చేసిన వారికి టికెట్లు మంజూరు చేయబడతాయి.
ఇతర ఆర్జిత సేవలు:
కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్రదీపాలంకార సేవ, శ్రీవారి సాలకట్ల వసంతోత్సవాల టికెట్లను జనవరి 22న ఉదయం 10 గంటలకు ఆన్లైన్లో విడుదల చేస్తారు.
వర్చువల్ సేవలు:
వర్చువల్ సేవలు, వాటి దర్శన స్లాట్లకు సంబంధించిన కోటాను జనవరి 22న మధ్యాహ్నం 3 గంటలకు విడుదల చేయనున్నారు.
అంగ ప్రదక్షిణ, శ్రీవాణి దర్శనం:
అంగ ప్రదక్షిణ టోకెన్ల కోటాను జనవరి 23న ఉదయం 10 గంటలకు విడుదల చేస్తారు.
శ్రీవాణి ట్రస్టు దర్శన టికెట్ల కోటాను అదే రోజు ఉదయం 11 గంటలకు విడుదల చేయనున్నారు.
వృద్ధులు, దివ్యాంగులకు ప్రత్యేక దర్శనం:
వయోవృద్ధులు, దివ్యాంగులు, దీర్ఘకాలిక వ్యాధులు ఉన్నవారికి ఉచిత ప్రత్యేక దర్శన టోకెన్ల కోటాను జనవరి 23న మధ్యాహ్నం 3 గంటలకు టీటీడీ ఆన్లైన్లో విడుదల చేయనుంది.
ప్రత్యేక ప్రవేశ దర్శనం:
ప్రత్యేక ప్రవేశ దర్శన టికెట్ల కోటాను జనవరి 24న ఉదయం 10 గంటలకు విడుదల చేస్తారు.
గదుల కోటా:
తిరుమల, తిరుపతిలలో గదుల కోటాను జనవరి 24న మధ్యాహ్నం 3 గంటలకు ఆన్లైన్లో విడుదల చేయనున్నారు.
శ్రీవారి సేవా, పరకామణి సేవ:
మార్చి నెలకు సంబంధించిన శ్రీవారి సేవా, పరకామణి సేవల కోటాను జనవరి 27న మధ్యాహ్నం 3 గంటలకు విడుదల చేస్తారు.
పూర్తి వివరాల కోసం: https://ttdevasthanams.ap.gov.in వెబ్సైట్ ను సంప్రదించగలరు.
