- బతుకమ్మ ఆడే మహిళలకు ప్రత్యేక చీరలు
- 28న ఎల్బీ స్టేడియంలో వేడుకలు
హైదరాబాద్ సిటీ, వెలుగు: ఈసారి బతుకమ్మ ఉత్సవాలను గిన్నిస్ బుక్ రికార్డు లక్ష్యంగా అంగరంగ వైభవంగా నిర్వహించేందుకు ఏర్పాట్లు జరుగుతున్నాయి. ఇందులో భాగంగా గ్రేటర్ హైదరాబాద్ లోని 11 లక్షల మంది స్వయం సహాయక బృందాల కోసం జీహెచ్ఎంసీకి 11 లక్షల బతుకమ్మ చీరలను కేటాయించేందుకు సర్కార్ సిద్ధమవుతున్నది.
చీరల పంపిణీకి సర్కిళ్ల డిప్యూటీ కమిషనర్లను ఇన్ చార్జీలుగా నియమించనున్నట్టు సమాచారం. ఇప్పటి వరకు కేరళలో జరుపుకునే సామూహిక ఓనం పండుగ మాత్రమే ఈ రికార్డును సృష్టించగా, ఈసారి ఆ రికార్డును బ్రేక్ చేసేలా బతుకమ్మ ఉత్సవాలను జీహెచ్ఎంసీ ప్లాన్ చేస్తోంది. ఈ నెల 21 నుంచి బతుకమ్మ ఉత్సవాలు, నవరాత్రులు మొదలవుతున్న క్రమంలో 27న వరల్డ్ టూరిజం డే సందర్భంగా మాదాపూర్ లోని శిల్ప కళా వేదికలో ప్రత్యేక కార్యక్రమాలను నిర్వహించనున్నారు. 28న ఎల్బీ స్టేడియంలో 11 వేల మంది స్వయం సహాయక బృందాలకు చెందిన మహిళలతో బతుకమ్మ ఉత్సవాలను నిర్వహించేందుకు జీహెచ్ఎంసీ అర్బన్ కమ్యూనిటీ డెవలప్ మెంట్ విభాగం ఏర్పాట్లు మొదలుపెట్టింది.
కళాఖండాల ప్రదర్శన, ఫుడ్ ఫెస్టివల్..
బతుకమ్మ వేడుకలను సిటీలోని 30 సర్కిళ్ల నుంచి మహిళలను తరలించేందుకు 150 బస్సులను వినియోగించనున్నట్లు జీహెచ్ఎంసీ అడిషనల్ కమిషనర్ పంకజ తెలిపారు. వేడుకల్లో భాగంగా అప్పర్ ట్యాంక్ బండ్ పై స్పెషల్ పరేడ్ కార్యక్రమాన్ని నిర్వహించనున్నారు. తెలంగాణలోని వివిధ రకాల చేతివృత్తుల వారు తయారు చేసిన కళాఖండాలు, ఇతర ఉత్పత్తుల ప్రదర్శన, విక్రయాలకు ఏర్పాట్లు చేస్తున్నారు. తెలంగాణ వంటకాలతో నెక్లెస్ రోడ్డులో మూడు రోజుల పాటు స్పెషల్ ఫుడ్ ఫెస్టివల్ కు కూడా ప్లాన్ చేస్తున్నారు.
