నల్గొండ, వెలుగు: మునుగోడు ఉప ఎన్నిక ఓట్ల లెక్కింపులో తొలిరౌండ్లు ఉత్కంఠ రేపాయి. పోస్టల్ బ్యాలెట్ ఓట్లతో పాటు మొదటి రౌండ్లో టీఆర్ఎస్పైచేయి సాధించగా.. మూడు, నాలుగు రౌండ్లలో బీజేపీ ఆధిక్యత చూపింది. ఈ రెండు రౌండ్ల తర్వాత ఒక్కసారిగా టీఆర్ఎస్శిబిరంలో కలవరం మొదలుకాగా.. బీజేపీలో జోష్ కనిపించింది. కానీ, ఆ తర్వాత 4వ రౌండ్ నుంచి 14వ రౌండ్ దాకా టీఆర్ఎస్ లీడ్ కొనసాగింది. చివరి 15 రౌండ్లో మాత్రం బీజేపీకి 88 ఓట్ల మెజారిటీ వచ్చినా అప్పటికే టీఆర్ఎస్ గెలుపు ఖాయమైంది.
నాలుగో రౌండ్ నుంచి వరుసగా..
ఆదివారం ఉదయం పోస్టల్ బ్యాలెట్ ఓట్ల లెక్కింపు ఫలితాల్లో అధికార పార్టీ పైచేయి సాధించింది. టీఆర్ఎస్కు 405 ఓట్లు పోలవగా.. బీజేపీకు 211 ఓట్లు, కాంగ్రెస్కు 41 ఓట్లు వచ్చాయి. దీంతో బీజేపీపై- టీఆర్ఎస్ 195 ఓట్ల లీడ్ సాధించినట్లయింది. తర్వాత ఈవీఎం ఓట్ల లెక్కింపు మొదలైంది. మొదటి రౌండ్లో కూసుకుంట్ల 6,418 ఓట్లు సాధించగా.. రాజగోపాల్ రెడ్డికి 5,126 ఓట్లు వచ్చాయి. దీంతో టీఆర్ఎస్కు 1,292 ఓట్ల లీడ్ రాగా, టీఆర్ఎస్ శిబిరంలో సంబురాలు నెలకొన్నాయి. రెండో రౌండ్ ఫలితాల్లో కూసుకుంట్లకు 7,781 ఓట్లు, రాజగోపాల్ రెడ్డి కి- 8,622 ఓట్లు, మూడో రౌండ్లో కూసుకుంట్లకు 7,390 ఓట్లు, రాజగోపాల్ రెడ్డికి 7426 ఓట్లు వచ్చాయి. వరుసగా రెండు రౌండ్లలో బీజేపీకి లీడ్ రావడంతో టీఆర్ఎస్ శిబిరంలో కాస్త కలవరం మొదలుకాగా.. బీజేపీ శిబిరంలో ఆశలు చిగురించాయి. కానీ ఆ తర్వాత నాలుగో రౌండ్ నుంచి 14వ రౌండ్వరకు అన్ని రౌండ్లలోనూ టీఆర్ఎస్ అభ్యర్థి లీడ్కొనసాగించడంతో కూసుకుంట్ల ప్రభాకర్రెడ్డి విజయం ఖాయమైంది. నిజానికి చౌటుప్పల్, చండూరు మున్సిపాలిటీల్లో బీజేపీకి భారీ మెజార్టీ వస్తుందని ఆ పార్టీ లీడర్లు ఆశించారు. ఈ రెండు మున్సిపాలిటీలు, మండలాల్లో బీజేపీకి మంచి ఆదరణ ఉందని, ఓట్లు కూడా పడ్డాయని సర్వేలు, ఎగ్జిట్పోల్స్ అంచనా వేశాయి. కానీ మున్సిపాలిటీలతోపాటు గ్రామాల్లోనూ బీజేపీ, టీఆర్ఎస్ మధ్య నువ్వా నేనా అన్నట్లుగా పోటీ సాగింది. చౌటుప్పల్ కౌంటింగ్ టైంలో రెండు రౌండ్లలో బీజేపీకి లీడ్ వచ్చినా తర్వాత కొనసాగించ లేకపోయింది. చివర్లో 15 రౌండ్లో బీజేపీకి 88 ఓట్ల మెజారిటీ వచ్చినా అప్పటికే టీఆర్ఎస్ గెలుపు ఖరారైంది. 10,309 ఓట్ల మెజార్టీతో (పోస్టల్ బ్యాలెట్ ఓట్లతో కలిపి) టీఆర్ఎస్ విజయం సాధించింది.
