రీసెంట్గా ‘షేర్ షా’ సినిమాతో హిట్ కొట్టాడు బాలీవుడ్ యంగ్ హీరో సిద్ధార్థ్ మల్హోత్రా. ఈ ఆరడుగుల అందగాడు మొదట మోడల్గా కెరీర్ స్టార్ట్ చేశాడు. ఇప్పటికే టీవీ షోలు, ఇంటర్నేషనల్ ప్రొడక్ట్స్ యాడ్స్, సూపర్హిట్ సినిమాలతో బాలీవుడ్లో తనకంటూ ఒక ప్లేస్ సంపాదించుకున్నాడు. అప్పుడప్పుడు పెట్ క్యాంపెయిన్స్లో పార్టిసిపేట్ చేసి జంతువుల మీద తనకి ఉన్న ప్రేమను తెలియజేస్తుంటాడు. టీనేజ్లోనే ఇండస్ట్రీలోకి అడుగుపెట్టినా.. తనకి అవకాశాలు మాత్రం అంత ఈజీగా రాలేదు. ప్రస్తుతం ‘మిషన్ మజ్ను’ అనే సినిమాతో మన ముందుకు రాబోతున్న ఈ యంగ్ హీరో పర్సనల్ లైఫ్, సినిమా కెరీర్ గురించి...
హ్యాండ్సమ్ లుక్తో, ఫిట్గా కనిపించే బాడీతో అట్రాక్ట్ చేసే ఈ హీరో మొదట మోడలింగ్ ట్రై చేశాడు. కానీ, అందులో చాలాసార్లు రిజెక్ట్ అయ్యాడు సిద్ధార్థ్ మల్హోత్రా. 1985, జనవరి 16న ఢిల్లీలో పుట్టిన సిద్ధార్థ్, బీకాం వరకు చదివాడు. సిద్ధార్థ్ నాన్న సునీల్ నేవీలో పని చేసి రిటైర్ అయ్యాడు. అమ్మ రిమ్మా హోమ్ మేకర్. సిద్ధార్థ్కి అన్న, అక్క ఉన్నారు. అన్న హర్షద్, బ్యాంక్ జాబ్ చేస్తాడు. సిద్ధార్థ్కి చిన్నప్పటి నుంచే డ్రామా, డాన్స్ షోల్లో పార్టిసిపేట్ చేయడమంటే ఇష్టం. వాళ్ల అమ్మానాన్నలు మాత్రం తనని ఇంజినీర్గా చూడాలనుకున్నారు. కానీ, స్కూల్, కాలేజీల్లో చదివేటప్పుడు స్టడీస్ అంటే ఇంట్రస్ట్ లేక స్పోర్ట్స్ ఆడటానికి వెళ్లేవాడు సిద్ధార్థ్. ఇప్పుడైతే ఖాళీ దొరికితే కార్టూన్స్ వేస్తాడు లేదంటే జిమ్ చేస్తాడు.
మోడల్గా, క్లాప్ బాయ్గా...
టీనేజ్లోనే మోడల్గా కెరీర్ స్టార్ట్ చేశాడు సిద్ధార్థ్. ఇంటర్నేషనల్ డిజైనర్ రాబర్టో కవల్లీ అడ్వర్టైజ్మెంట్ క్యాంపెయిన్లోనూ పని చేశాడు. దాంతో తనకి రెడ్ బుక్, గ్లాడ్రాగ్, మెన్స్హెల్త్ వంటి మంచి పేరున్న మ్యాగజైన్స్లో కనిపించే అవకాశాలు వచ్చాయి. ఆ తర్వాత 2006లో ‘ధర్తి కా వీర్ యోధ పృథ్వీరాజ్ చౌహాన్’ అనే టీవీ సీరియల్ ద్వారా బుల్లితెరకు పరిచయం అయ్యాడు సిద్ధార్థ్. 2007లో మిస్టర్ గుజరాత్ టైటిల్, గ్లాడ్రాగ్స్ మెగా మోడల్ కాంపిటీషన్లో సెకండ్ రన్నరప్గా నిలిచాడు.
అనుభవ్ సిన్హా చేస్తున్న సినిమా ఆడిషన్స్కి 22 వ ఏట వెళ్లాడు. సెలక్ట్ అయ్యాడు, దానికోసం ముంబై షిఫ్ట్ అయ్యాడు. కానీ, ఆ సినిమా మాత్రం పట్టాలెక్కలేదు. షారుక్ ఖాన్ నటించిన ‘రా–వన్’ సినిమాకి క్లాప్ బాయ్గా పనిచేశాడు సిద్ధార్థ్. ‘దోస్తానా’, ‘మై నేమ్ ఈజ్ ఖాన్’ సినిమాలకు అసిస్టెంట్ డైరక్టర్గా పని చేశాడు. తన సినీ కెరీర్లో ఎన్నో సమస్యలు ఫేస్ చేశాడు సిద్ధార్థ్. ఆ టైంలో ఫేమస్ డిజైనర్ మనీష్ మల్హోత్రా సిద్ధార్థ్కు చేదోడు వాదోడుగా ఉన్నాడు.
సల్మాన్ ఖాన్ వాచ్ గిఫ్ట్
2012లో వచ్చిన ‘స్టూడెంట్ ఆఫ్ ది ఇయర్’ సినిమాలో ఇద్దరు హీరోల్లో ఒకడిగా సిద్ధార్థ్ నటించాడు. అదే తన మొదటి సినిమా కూడా. ఇందులో హీరోయిన్ అలియా భట్. ఈ సినిమాలో సిద్ధార్థ్ చేసిన యాక్టింగ్కి 2013లో ‘స్టార్డస్ట్’, ‘సౌత్ ఆఫ్రికా ఫిల్మ్ అండ్ టెలివిజన్’ అవార్డ్లు దక్కాయి. అలా మొదటి సినిమాకే రెండు డెబ్యూ అవార్డ్లను తన ఖాతాలో వేసుకున్నాడు సిద్ధార్థ్ మల్హోత్రా. 2014లో ‘హస్సీ తో ఫస్సీ’ అనే సినిమాలో నటించాడు. దానికిగానూ ‘బిగ్ స్టార్ ఎంటర్టైనర్’, ‘మోస్ట్ ఎంటర్టైనింగ్ యాక్టర్ ఇన్ రొమాంటిక్ ఫిల్మ్’ కేటగిరీలో అవార్డ్లు సొంతం చేసుకున్నాడు. 2014లో ‘ఏక్ విలన్’ సినిమా ద్వారా ఆడియెన్స్కి మరింత దగ్గరయ్యాడు సిద్ధార్థ్. ఆ సినిమా చూసి బాలీవుడ్ హీరో సల్మాన్ ఖాన్ సిద్ధార్థ్ని మెచ్చుకున్నాడు. రిస్ట్ వాచ్ను గిఫ్ట్గా ఇచ్చాడు.
ఆ సినిమాకోసం పది కేజీలు పెరిగాడు
ప్రతి సినిమాకి ఎంతో కష్టపడి పని చేస్తాడు సిద్ధార్థ్. 2015లో ‘బ్రదర్స్’ సినిమాలో అక్షయ్ కుమార్కి బ్రదర్గా చేసే రోల్ వచ్చింది. అందులో అక్షయ్ ఫిజిక్కి తగ్గట్టు ఉండాలని, ఏకంగా పది కేజీల బరువు పెరిగాడు సిద్ధార్థ్. దాని తర్వాత2016లో వచ్చిన ‘కపూర్ అండ్ సన్స్’ సినిమా కూడా తన కెరీర్లో బెస్ట్ హిట్గా నిలిచింది. సినిమాలతోపాటు ఇప్పటికే చాలా బ్రాండ్లకు, ప్రొడక్ట్స్కి అంబాసిడర్గా ఉన్నాడు సిద్ధార్ధ్. కోకొకోలా, కార్నెటో అమెరికన్ స్వాన్ వంటి ఇంటర్నేషనల్ ప్రొడక్ట్స్యాడ్స్లో కూడా కనిపిస్తుంటాడు. ప్రస్తుతం రెండు సినిమాల ప్రి– ప్రొడక్షన్ జరుగుతుండగా, ‘మిషన్ మజ్ను’ అనే మరో సినిమాతో రాబోతున్నాడు సిద్ధార్థ్.
షారుక్, హాట్ చాకొలెట్స్
సిద్ధార్థ్కి హాట్ చాకొలెట్స్ అంటే ఎంత ఇష్టమో, షారుక్ ఖాన్ అంటే కూడా అంతే ఇష్టం. హాట్ చాకొలెట్స్ కోసం వాళ్ల అమ్మమ్మకి అబద్ధాలు చెప్పి డబ్బులు తీసుకునేవాడట. అలాగే ‘దిల్ వాలే దుల్హనియా లేజాయేంగే’ సినిమా చూసి అందులో షారుక్ హెయిర్ స్టైల్ ఎలా ఉందో అలా తన హెయిర్ స్టైల్ మార్చుకున్నాడు. సిద్ధార్థ్కి కుక్కలంటే కూడా బాగా ఇష్టం. తను బాక్సర్ అనే కుక్కను పెంచుకుంటున్నాడు. అంతేకాదు, ‘పెటా’ అనే యానిమల్ వెల్ఫేర్ ఎన్జీవోకి క్యాంపెయిన్ చేస్తుంటాడు ఈ పెట్ లవర్.
