నేరడిగొండ, వెలుగు: నేరడిగొండ మండలంలోని నాగ మల్యాల గ్రామానికి చెందిన బీఆర్ఎస్నేత, మాజీ సర్పంచ్ భీముడుతో పాటు గ్రామ పటేళ్లు, గ్రామస్తులు ఉదయం కాంగ్రెస్లో చేరి.. సాయంత్రానికి తిరిగి సొంత గూటికి వెళ్లారు. బోథ్ నియోజకవర్గ కాంగ్రెస్ ఇన్ చార్జ్ ఆడే గజేందర్ ఆధ్వర్యంలో శనివారం ఉదయం వారంతా కాంగ్రెస్ లో చేరారు. వారికి కండువాలు కప్పి పార్టీలోకి ఆహ్వానించారు.
ఈ సందర్భంగా గజేందర్ మాట్లాడుతూ.. అభివృద్ధిని చూసి కాంగ్రెస్ లో చేరుతున్నారని, గ్రామాభివృద్ధి కాంగ్రెస్ తోనే సాధ్యమన్నారు. ఇదిలా ఉండగా, ఉన్నట్టుండి వారంతా సాయంత్రం బోథ్ ఎమ్మెల్యే అనిల్ జాదవ్ సమక్షంలో తిరిగి బీఆర్ఎస్ లో చేరారు. తమకు బలవంతంగా పార్టీ కండువా కప్పి కాంగ్రెస్ చేర్చుకున్నారని మాజీ సర్పంచ్ భీముడు ఆరోపించారు. ఎమ్మెల్యే మాట్లాడుతూ.. బీఆర్ఎస్ నాయకులను బలవంతంగా కాంగ్రెస్ లో చేర్చడం సిగ్గుచేటని, బలవంతపు చేరికలు మానుకోవాలన్నారు.
