బెల్లంపల్లి/బెల్లంపల్లి రూరల్, వెలుగు: సీఎం కేసీఆర్ రైతులు పంట నష్టపోతే పరిహారం ఇయ్యట్లేదు కానీ చనిపోతే మాత్రం రూ.5 లక్షల బీమా ఇస్తున్నారని వైఎస్సార్టీపీ చీఫ్ షర్మిల విమర్శించారు. సోమవారం ప్రజాప్రస్థానం పాదయాత్ర మంచిర్యాల జిల్లా బెల్లంపల్లి మండలం లంబాడితండా నుంచి బట్వాన్పల్లి, మన్నెగూడెం, పెర్కపల్లి, నెన్నెల మండల గుండ్లసోమారం, నర్వాయిపేట, మెట్పల్లి మీదుగా చిత్తాపూర్, ఆవడం వరకు కొనసాగింది. ఈ సందర్భంగా పెర్కపల్లి, ఆవడం గ్రామాల్లో ప్రజలనుద్దేశించి ఆమె మాట్లాడారు.
‘‘సీఎం కేసీఆర్కు అధికార పిచ్చి తప్ప మరొకటి లేదు. అధికారాన్ని అడ్డం పెట్టుకొని తెలంగాణను దోచుకుంటున్నడు. టీఆర్ఎస్ ఎనిమిదేండ్ల పాలనలో ప్రజల సమస్యలను పరిష్కరించిన పాపాన పోలేదు”అని అన్నారు. దళితులకు మూడెకరాల భూమి, పేదలకు డబుల్ బెడ్రూం ఇండ్లు, ఇంటికో ఉద్యోగం, నిరుద్యోగభృతి, ప్రతి నియోజకవర్గంలో లక్ష ఎకరాలకు సాగునీరు వంటి ఏ ఒక్క హామీని నెరవేర్చలేదన్నారు. ఎన్నికల్లో లబ్ధిపొందడానికి దళితబంధు, గిరిజనబంధు, మైనారిటీ రిజర్వేషన్లు, గిరిజన రిజర్వేషన్లు అంటూ మోసం చేస్తున్నారని, ఆయన పాలనలో దగాపడని వర్గం లేదని విమర్శించారు. రూ.4లక్షల కోట్ల అప్పులు చేసి రాష్ట్రాన్ని అప్పుల కుప్పగా మార్చారన్నారు. ‘టీఆర్ఎస్ పార్టీ బ్యాంక్ అకౌంట్లో రూ.860 కోట్లు ఉన్నాయట.. దీన్నిబట్టి తెలంగాణ ఎవరికి బంగారుం అయ్యిందో ప్రజలు ఆలోచించాలి’ అని అన్నారు. కేసీఆర్కు, ఆయన కుటుంబసభ్యులు, మంత్రులు, ఎమ్మెల్యేలకు మాత్రమే బంగారు తెలంగాణ అయ్యిందన్నారు. కేసీఆర్ రాష్ట్ర ప్రజల సమస్యలను గాలికొదిలి దేశాన్ని ఉద్ధరిస్తానంటూ బయల్దేరడం హాస్యాస్పదంగా ఉందన్నారు. బీఆర్ఎస్కు బందిపోట్ల రాష్ట్ర సమితి పేరు సరిగ్గా సూటవుతుందని ఎద్దేవా చేశారు.
