దేశంలో కరోనా పాజిటివ్ కేసులు రోజు రోజుకూ భారీ సంఖ్యలో నమోదవుతున్నాయి. దీంతో ట్రీట్ మెంట్ కోసం ఆస్పత్రులకు వచ్చేవారు కూడా ఎక్కువగానే ఉంటున్నారు. ఈ క్రమంలో ఆస్పత్రుల్లో ఆక్సిజన్ కొరత ఏర్పడుతోంది. చికిత్స కోసం వచ్చిన పేషంట్లు తీవ్ర ఇబ్బందులు పడుతున్నారు. దీనిపై కేంద్ర ప్రభుత్వం కీలక నిర్ణయం తీసుకుంది. మూడు నెలల పాటు ఆక్సిజన్, ఆక్సిజన్ సంబంధిత పరికరాల దిగుమతులపై సుంకాలను పూర్తిగా ఎత్తివేయాలని నిర్ణయించింది. ఈ విషయాన్ని కేంద్ర ఆర్థిక శాఖ సహాయమంత్రి అనురాగ్ ఠాకూర్ ట్విట్టర్ ద్వారా తెలిపారు.
విదేశాల నుంచి దిగుమతి చేసుకునే ఆక్సిజన్ పైనా, ఆక్సిజన్ పైనా 3 నెలల వరకు సాధారణ కస్టమ్స్ సుంకం, హెల్త్ సెస్ లకు పూర్తిగా మినహాయింపు ఇస్తున్నట్టు చెప్పారు. ప్రధాని మోడీ అధ్యక్షతన జరిగిన అత్యున్నత స్థాయి సమావేశంలో ఈ నిర్ణయం తీసుకున్నారు. ఈ నిర్ణయం తక్షణమే అమల్లోకి వస్తుందని తెలిపారు.
