జమ్మూకశ్మీర్‌లోని రాజౌరీ జిల్లాలో ఇటీవల హిందూ కుటుంబాలపై ఉగ్రవాదులు దాడి చేసిన తర్వాత మరిన్ని బలగాలను మోహరించాలని కేంద్రం నిర్ణయించింది. కశ్మీర్కు అదనంగా 20 కంపెనీల పారామిలటరీ బలగాలను పంపిస్తున్నట్లు సీఆర్‌పీఎఫ్‌ (సెంట్రల్ రిజర్వ్ పోలీస్ ఫోర్స్) ప్రకటించింది. 1800 మందితో కూడిన ఈ బలగాలను ఎక్కువగా పూంచ్,రాజౌరీ జిల్లాలో మోహరించనున్నట్లు పేర్కొంది.
రాజౌరిలోని డాంగ్రి గ్రామంలో ఈ నెల 1న ఉగ్రవాదులు పౌరులపై విచక్షణారహితంగా కాల్పులు జరిపారు. ఆ కాల్పుల్లో నలుగురు ప్రాణాలు కోల్పోగా మరికొందరు గాయపడ్డారు. ఈ సంఘటన జరిగిన మరుసటి రోజునే అదే జిల్లాలోని మరో గ్రామంలో ఉగ్రవాదులు అమర్చిన మందుపాతర పేలి చిన్నారి సహా ఇద్దరు మరణించారు. ఈ దాడి వెనుక ఉగ్రవాదుల ఆచూకీ కోసం గత మూడు రోజులుగా భద్రతా బలగాలు భారీ సెర్చ్ ఆపరేషన్‌లో నిమగ్నమయ్యాయి.ఉగ్రదాడులు జరిగిన వెంటనే సైన్యం, పోలీసులు. సీఆర్‌పీఎఫ్‌ సంయుక్తంగా ఆపరేషన్ ను ప్రారంభించాయి.
