- అవకాశమిచ్చిన కేంద్ర ఎన్నికల సంఘం
- 18 ఏండ్లు నిండాకే ఓటరు ఐడీ జారీ
- రాష్ట్ర ఎలక్షన్ కమిషనర్లకు సీఈసీ ఆదేశం
న్యూఢిల్లీ : పదిహేడేండ్ల వయసు ఉన్న ప్రతి ఒక్కరు ఒక్కరు ఓటర్ కార్డు కోసం అప్లై చేసుకోవచ్చని చీఫ్ ఎలక్షన్ కమిషనర్ రాజీవ్ కుమార్(సీఈసీ), కమిషనర్ అనూప్ చంద్రపాండే గురువారం ప్రకటించారు. అయితే 18 ఏండ్లు నిండిన తర్వాతే ఓటర్ కార్డును జారీ చేస్తామని స్పష్టం చేశారు. ఇప్పటిదాకా 18 ఏండ్లు నిండినోళ్లు .. ఓటర్ కార్డు కోసం అప్లై చేయాలంటే జనవరి 1దాకా వేచి చూడాల్సి ఉండేదన్నారు. ఈ నిర్ణయంతో ముందస్తుగానే ఓటర్ రిజిస్ట్రేషన్ చేసుకోవచ్చని వివరించారు. 17 ఏండ్లు ఉన్నప్పుడే ఓటర్ కార్డు కోసం అప్లై చేసుకుంటే ఏడాది కలిసి వస్తుందన్నారు. దీంతో పాటు ఎన్నికల చట్టంలో ఇంకిన్ని కీలక మార్పులు చేసినట్టు తెలిపారు. ఇకమీద జనవరి 1తో పాటు ఏప్రిల్ 1, జులై 1, అక్టోబర్ 1ను లెక్కలోకి తీసుకుంటామన్నారు.
ఆగస్టు 1 తర్వాత కొత్త ఫారాలు
ఈ నిర్ణయాన్ని వెంటనే అమల్లోకి తీసుకురావాలని రాష్ట్ర ఎన్నికల కమిషనర్లకు, ఈఆర్‌‌‌‌వో.. ఏఈఆర్‌‌‌‌వోలకు రాజీవ్ కుమార్ ఆదేశాలు జారీ చేశారు. 17 ఏండ్లు నిండినవారు ఎవరైనా ఎలక్షన్ కార్డు కోసం అప్లై చేస్తే యాక్సెప్ట్ చేయాలని సూచించారు. 18 ఏండ్లు నిండిన తరువాతే వారికి కార్డు జారీ చేయాలన్నారు. 2023లో ఏప్రిల్ 1 లేదా జులై 1 లేదా అక్టోబర్ 1 నాటికి 18 ఏండ్లు నిండే ప్రతీ ఒక్కరు అడ్వాన్స్‌‌‌‌గా ఓటర్ కార్డు కోసం అప్లై చేసుకునేందుకు అవకాశం కల్పించాలని ఆదేశించారు. ఇందుకోసం రిజిస్ట్రేషన్ ఆఫ్‌ ఎలక్టోర్స్ రూల్స్‌, చట్టాల్లో మార్పులు చేసినట్టు స్పష్టం చేశారు. ప్రతీ 3 నెలలకోసారి కొత్త ఓటర్ కార్డులతో పాటు కరెక్షన్ చేసుకునే వెసులుబాటు కల్పించామన్నారు. దరఖాస్తు ఫారాలు ఆగస్టు 1 తర్వాత అందుబాటులోకి తెస్తామని చెప్పారు. అప్పటి వరకు పాత దరఖాస్తు ఫారాలతో అప్లై చేసినా యాక్సెప్ట్ చేస్తామన్నారు.
