బంగాళాఖాతంలో చైనా షిప్పులు..రౌండప్ చేస్తున్న డ్రాగన్ కంట్రీ

దేశ భూభాగంలోకి చొచ్చుకొస్తున్న చైనా, మన సముద్ర జలాలపైనా కన్నేసింది. పొరుగు దేశాల సహకారంతో ఇండియాను చుట్టుముట్టేస్తోంది. ఇప్పటికే అరేబియా సముద్రం, హిందూ మహాసముద్రాల్లోకి తన షిప్పులను పంపిన డ్రాగన్​ కంట్రీ, ఇప్పుడు బంగాళాఖాతంలోకి షిప్పులను పంపి సముద్రాల లోపల డేటాను తీసుకుంటోంది. యుద్ధ నౌకలతో సర్వే చేస్తోంది. గత రెండేళ్లలో పీపుల్స్​ లిబరేషన్​ ఆర్మీ నేవీ (ప్లాన్​), మన సముద్ర జలాల్లో తన షిప్పులను పంపి సర్వే చేస్తున్న ఘటనలు మూడింతలు పెరిగాయి. అండమాన్​ నికోబార్​ దగ్గర ప్లాన్​ సమాచారాన్ని సేకరిస్తున్నట్టు ఈ నెల మొదట్లో ఇండియన్​ నేవీ గుర్తించింది. ఆయా ప్రాంతాల్లోని సముద్ర జలాల్లో ఉప్పు శాతం, సముద్ర ప్రవాహం వంటి డేటాను ప్లాన్​ సేకరిస్తోంది. దాని వల్ల సముద్ర యుద్ధాల్లో ఎదురు లేకుండా చేసుకునేందుకు ప్రయత్నిస్తోంది. ఐదు వార్​ షిప్పులతో బంగాళాఖాతంలో సర్వే చేస్తోంది.

షియాన్​01

ట్విన్​ హల్​ కలిగిన చిన్న స్మాల్​ వాటర్​ ప్లేన్​ యుద్ధ నౌక ఇది. దీన్నే స్వాత్​ అనీ పిలుస్తుంటారు. చైనా షిప్​ సైంటిఫిక్​ రీసెర్చ్​ సెంటర్​ తయారు చేసిన షియాన్​1, 2009 నుంచి సేవలందిస్తోంది. 60 మీటర్ల పొడవున్న ఈ షిప్పు హైడ్రోగ్రాఫిక్​ సర్వే (సముద్ర జలాల సర్వే) కోసం పదుల సంఖ్యలోని పరికరాలతో సర్వే చేస్తోంది. 3 వేల టన్నుల బరువుండే ఈ షిప్పు ఒక్కసారి నీళ్లలోకి దిగితే 40 రోజుల పాటు ఉండగలుగుతుంది. 15 నాట్స్​ స్పీడ్​తో 8 వేల నాటికల్​ మైళ్లు ప్రయాణిస్తుంది. అండమాన్​ నికోబార్​ వద్ద సర్వే చేస్తున్న ఈ షిప్పును ఇండియన్​ నేవీ గుర్తించింది.

జుకెఝెన్​ 872 (హయాంగ్​20)

దీనిని కేవలం హైడ్రోగ్రాఫిక్​ సర్వే కోసమే ప్రత్యేకంగా తయారు చేసింది చైనా స్టేట్​ షిప్​బిల్డింగ్​ కార్పొరేషన్​ (సీఎస్​ఎస్​సీ). 150 మంది సిబ్బంది అందులో పనిచేస్తున్నారు. శ్రీలంకలోని కొలంబో వద్ద అది ప్రస్తుతం సర్వే చేస్తోంది. నిజానికి దీని అసలు పేరు హయాంగ్​ 20. కానీ, దాని పేరును జుకెఝెన్​గా మార్చింది చైనా. సివిల్​ సర్వే షిప్​గా చెబుతున్నా, షిప్​లో 25 ఎంఎం ఎయిర్​ డిఫెన్స్​ గన్స్​ ఉండడం అనుమానాలను రేకెత్తిస్తోంది. అంతేకాదు, ఇటీవల అందులోని సిబ్బంది ఆ గన్నులతో ఫైరింగ్​నూ ప్రాక్టీస్​ చేశారు. 20 మెజర్​మెంట్​ సిస్టమ్స్​తో హిందూ మహాసముద్రం, బంగాళాఖాతం కలిసే చోట సర్వే చేస్తోంది. సబ్​మెరీన్​ జియోమార్ఫాలజీ, సబ్​మెరీన్​ సర్ఫేస్​ జియోలాజికల్​ సర్వే, ఓషన్​ గ్రావిటీ (సముద్రంలో గురుత్వాకర్షణ), టెంపరేచర్లు, నీటిలో ఉప్పుశాతం, సాంద్రత, అలల వంటి వాటి వివరాలను తీసుకుంటోంది.

షియాంగ్యాంగోంగ్​ 3 అండ్​ 6

ఈ ఏడాది నవంబర్​27న షియాంగ్యాంగోంగ్​ 6 షిప్పు మన సముద్ర జలాలకు అతి సమీపంలో అండమాన్​ నికోబార్​ వద్ద కనిపించింది. అంతేగాకుండా ఈ నెల 11న 2 మీటర్ల పొడవైన ఆరు అటానమస్​ అన్​మ్యాన్డ్​ వెహికిల్స్​ (ఏయూవీ)లను మోహరించింది. వాటిని హయీ అని పిలుస్తున్నారు. ఇవి సముద్ర నీటి టెంపరేచర్లు, ఉప్పు శాతం, టర్బిడిటీ (మందం), క్లోరోఫిల్​, ఆక్సిజన్​ స్థాయులను లెక్కిస్తాయి. ఇంకో విషయమేంటంటే విదేశీ జలాల్లో సైంటిఫిక్​ రీసెర్చ్​ చేస్తున్న తమ దేశ సంస్థలకు చైనా రక్షణ శాఖ వార్నింగ్​ ఇచ్చిన రెండు రోజులకే మన జలాలకు సమీపంలో చైనా ఆ షిప్పులను మోహరించింది. డిసెంబర్​ 11నే షియాంగ్యాంగోంగ్​ 3 షిప్పునూ మన జలాలకు సమీపంలో అధికారులు గుర్తించారు.

షియాంగ్యాంగోంగ్​ 10

చైనా సెకండ్​ ఇనిస్టిట్యూట్​ ఆఫ్​ ఓషనోగ్రఫీకి చెందినది ఈ షిప్పు. గత ఏడాది జులైలోనే హిందూ మహాసముద్రంలోకి ఎంటరైంది ఈ ఓడ. దాదాపు 250 రోజుల పాటు మన జలాలకు సమీపంలో సర్వే చేయనుంది. ఇప్పటికే సర్వే కోసం ఖియాంలాంగ్​2 అనే ఏయూవీని షిప్పు మోహరించింది. అమెరికా నేవీ రిపోర్టుల ప్రకారం సముద్రం లోపలికి తొమ్మిది సార్లు అది పొయ్యొచ్చింది. 257 గంటల పాటు మన జలాలను సర్వే చేసింది.