విదేశాంగ మంత్రిని తొలగించిన చైనా..!

చైనా విదేశాంగ మంత్రి క్విన్ గాంగ్ చాలా రోజులుగా కనిపించడం లేదు. అధ్యక్షుడు జిన్‌పింగ్‌కి ఎంతో సన్నిహితుడైన ఆయన.. గల నెల రోజులుగా కనిపించకపోవడంతో పలు అనుమానాలు చెలరేగుతున్నాయి. ఆయన ఎక్కడికి వెళ్లిపోయారో ఇప్పటికీ సమాచారం లేదు. విదేశాంగ మంత్రి కనిపించకుండా పోవడం సాధారణ విషయం కాదు. చైనా కావాలనే సీక్రెట్‌గా ఆయనను దాచి ఉంచిందా అన్న అనుమానాలూ వ్యక్తమవుతున్నాయి. ఈ క్రమంలోనే అతన్ని చైనా.. పదవి నుంచి తొలగించిందని తాజాగా గ్లోబల్ టైమ్స్ నివేదించింది. గ్యాంగ్ స్థానంలో కొత్త చైనా విదేశాంగ మంత్రి త్వరలో నియామకం అవుతారని వెల్లడించింది.  

క్విన్ గాంగ్ చివరిసారి ఆయన జూన్ 25న కనిపించారు. అప్పటి నుంచి మళ్లీ జాడ లేదు. ఏషియన్ సమ్మిట్ హెడ్‌గా ముందుగా క్విన్‌ని నియమించినా ఆ తరవాత తొలగించారు. "అనారోగ్యం వల్లే ఆయన తప్పుకున్నారు" అని చైనా ప్రభుత్వం ప్రచారం చేసినా అది నమ్మశక్యంగా అనిపించడం లేదనే వాదనలు వినిపిస్తున్నాయి. ఈ క్రమంలోనే కొందరు యురోపియన్ యూనియన్‌ ప్రతినిధులతో చర్చలు జరగాల్సి ఉన్నా...వాటినీ కారణం లేకుండానే పోస్ట్‌పోన్ చేసింది చైనా.

చైనా అధ్యక్షుడు జిన్‌పింగ్ ఫిలిప్పైన్స్ మాజీ అధ్యక్షుడితో సమావేశమైనప్పటి నుంచి క్విన్ గాంగ్ మిస్ అయ్యారని ప్రచారం జరుగుతోంది. ఇప్పటి వరకూ ప్రభుత్వం దీనిపై ఎలాంటి ప్రకటన చేయలేదు. పైగా..చైనా సోషల్ మీడియాలోనూ ఈ విషయంపై చర్చించతుండా సెన్సార్ చేసింది ప్రభుత్వం. అక్కడ "where is Qin Gang" అని సోషల్ మీడియాలో సెర్చ్ చేస్తే... సింపుల్‌గా No Results అని చూపిస్తోంది. అంటే ఎంత సీక్రెసీ మెయింటేన్ చేస్తున్నారో అర్థం చేసుకోవచ్చు.

ఇక మరో పక్క క్విన్ గాంగ్ కనిపించకుండా పోవడానికి ఓ జర్నలిస్ట్‌తో ఉన్న ఎఫైరే కారణమన్న వాదన కూడా వినిపిస్తోంది. సాధారణంగా...చైనాలోని కమ్యూనిస్ట్ పార్టీ ఏ లీడర్ అయినా వివాహేతర సంబంధం పెట్టుకుంటే అసలు సహించదు. వెంటనే ఆ పదవి నుంచి తప్పించేస్తుంది. నిషేధం విధిస్తుంది. క్విన్ గాంగ్ కూడా ఇలాంటి ఎక్స్‌ట్రా మారిటల్ ఎఫైర్ పెట్టుకోవడం వల్లే ప్రభుత్వం దూరం పెట్టిందని తెలుస్తోంది. దీనిపై చైనా విదేశాంగ ప్రతినిధులను మీడియా ప్రశ్నించినా.."మాకు ఎలాంటి సమాచారం లేదు" అని సమాధానం చెప్పకుండా దాట వేస్తున్నారు. ఇక చైనా పౌరులు కూడా ఆయన కనిపించకుండా పోవడానికి రకరకాల కారణాలు చెబుతున్నారు. మరో ఇంట్రెస్టింగ్ విషయం ఏంటంటే... అక్కడి మీడియాలో ఇప్పటి వరకూ ఆన్‌లైన్‌లో పబ్లిష్ అయిన ఆర్టికల్స్‌ లో Qin Gang అనే పేరు ఎక్కడ ఉన్నా వాటిని ప్రభుత్వం తొలగించేసింది. అంటే.. పబ్లిక్‌గా ఎవరూ ఆయన గురించి మాట్లాడకూడదని చైనా డైరెక్ట్‌గానే హెచ్చరిస్తోందన్నమాట.