మూడు ముళ్లేసి ఏడడుగులు నడిచి.. సగం జీవితం గడిపి.. ఇద్దరి ప్రేమకు ప్రతిరూపంగా పిల్లలను కన్న భార్య భర్తల మధ్య ఆ ప్రేమానురాగాలు ఎటు పోతున్నాయో అర్థం కాని పరిస్థితి ఉంది ఈ రోజుల్లో. ఒకరినొకరు మోసం చేసుకోవడం.. లేదంటే మోసం చేశారనే అనుమానంతో అతి క్రూరంగా చంపుకోవడం వంటి ఘటనలు దేశవ్యాప్తంగా ఎక్కడో ఒక చోట జరుగుతూనే ఉన్నాయి. లేటెస్టుగా భార్య మోసం చేస్తున్నదనే అనుమానంతో అతి కిరాతకంగా నరికిన భర్త.. సెల్ఫీని స్టేటస్ గా పెట్టిన ఘటన సోషల్ మీడియాలో వైరల్ గా మారింది.
వివరాల్లోకి వెళ్తే.. తమిళనాడు కోయంబతూరులో జరిగింది ఈ దారుణ ఘటన. తిరునెల్వేలికి చెందిన బాలమురుగన్, శ్రీప్రియ అనే దంపతులకు ముగ్గురు పిల్లలున్నారు. ఇద్దరి మధ్య ఉన్న విభేదాల కారణంగా కోయంబతూరులోని ఓ విమెన్స్ హాస్టల్ లో ఉంటూ ప్రైవేట్ జాబ్ చేసుకుంటుంది శ్రీప్రియ.
తన భార్య వేరే వ్యక్తితో వివాహేతర సంబంధం కలిగి ఉందనే అనుమానంతో హాస్టల్ కు వెళ్లి ఆమెను చంపినట్లు పోలీసులు అనుమానిస్తున్నారు. ఘటన జరిగిన రోజు హాస్టల్ కు వెళ్లిన బాలమురుగన్.. తన భార్యను ఇంటికి రమ్మని పిలిచినట్లు పోలీసులు తెలిపారు. ఆ క్రమంలో ఇద్దరి మధ్య వాగ్వాదం జరగటంతో.. ప్లాన్ ప్రకారం వెంట తెచ్చుకున్న కొడవలితో అత్యంత కర్కషంగా నరికి చంపేశాడు.
శవం పక్కనే దర్జాగా కాలుమీద కాలేసుకుని..
భార్యను అతి దారుణంగా నరికి చంపిన బాల మురుగన్ ఏదో ఘన కార్యం చేసినట్లు సెల్ఫీ దిగాడు. రక్తపు మడుగులో పడి ఉన్న భార్య శవం పక్కన కాలు మీద కాలేసుకుని కూర్చొని గంభీరంగా సెల్ఫీ దిగాడు. సెల్ఫీని స్టేటస్ పెట్టిన నిందితుడు.. ద్రోహానికి మూల్యం చెల్లించాల్సిందేనని స్టేటస్ పెట్టాడు. అంతే కాదు పోలీసులు వచ్చేవరకు అక్కడే కూర్చున్నాడు. సమాచారం తెలుసుకున్న పోలీసులు ఘటనా స్థలానికి చేరుకుని నిందితుడిని అరెస్టు చేశారు.
