భూపాలపల్లి రూరల్, వెలుగు: విద్యార్థులకు ప్రత్యేకంగా హెల్త్ ప్రొఫైల్ ను తయారు చేయాలని జయశంకర్ భూపాలపల్లి కలెక్టర్ రాహుల్ శర్మ ఆదేశించారు. గురువారం భూపాలపల్లి మండలంలోని అటవీ గ్రామమైన ఆజంనగర్లో కలెక్టర్ ఆకస్మికంగా పర్యటించారు. గ్రామంలోని ఆయుష్మాన్ ఆరోగ్య కేంద్రం, జడ్పీహై స్కూల్, అంగన్వాడీ కేంద్రం, ఇందిరమ్మ ఇండ్ల నిర్మాణాలను పరిశీలించారు.
ఆరోగ్య కేంద్రాన్ని పరిశీలించి, వివరాలు అడిగి తెలుసుకున్నారు. స్కూల్ విద్యార్థుల ఆరోగ్యంపై ప్రత్యేక శ్రద్ధ చూపాలన్నారు. సీజనల్ వ్యాధులపై అప్రమత్తంగా ఉండాలని, సరిపడా మందులు నిల్వ ఉంచుకోవాలని సూచించారు. జడ్పీహెచ్ఎస్ను తనిఖీ చేసి బోధనా విధానాన్ని, మధ్యాహ్న భోజనాన్ని పరిశీలించారు.
అనంతరం విద్యార్థులతో కలిసి భోజనం చేశారు. అంగన్వాడీ కేంద్రాన్ని పరిశీలించి సమస్యలు అడిగి తెలుసుకున్నారు. కరెంట్ సరఫరా సమస్య ఉన్నదని తెలుసుకుని వెంటనే పరిష్కరించాలని అధికారులకు తెలిపారు. ఇందిరమ్మ ఇండ్ల నిర్మాణాలను పరిశీలించి పనులు త్వరగా పూర్తి చేయాలని తెలిపారు.
