ఖమ్మం కాంగ్రెస్ లో ఎన్ని గ్రూపులో.. అన్ని ఆఫీసులు

• నేనే పోటీ చేస్తా...లేదు నేనే పోటీ చేస్తా..

భద్రాద్రికొత్తగూడెం, వెలుగు : అసెంబ్లీ ఎన్నికలు సమీపిస్తున్న వేళ జిల్లా కాంగ్రెస్​ పార్టీలో  అంతర్గత రాజకీయాలు ఒక్కొక్కటిగా బయటపడుతున్నాయి. తాజాగా ఓ వర్గం పార్టీ జిల్లా ఆఫీసును ఏర్పాటు చేయడంతో మరోమారు వర్గ రాజకీయాలు రచ్చకెక్కాయి.

ఎవరికి వారే..

జిల్లా కాంగ్రెస్​ పార్టీలో అందరిదీ ఒకే మాట. టికెట్​ నాదే, నేనే పోటీ చేస్తా అంటూ ఆశావహులు ఎవరికి వారే ప్రచారం చేసుకుంటున్నారు. ఇందులో భాగంగానే పార్టీ ఆఫీస్​లను తామే ఏర్పాటు చేసుకుంటున్నారు. జిల్లా కేంద్రమైన కొత్తగూడెంలో ఇప్పటికే మూడు కాంగ్రెస్ ఆఫీస్​లుండగా ఇప్పుడు కొత్తగా చుంచుపల్లి మండలంలో  పార్టీ జిల్లా ఆఫీస్​ను ఏర్పాటు చేయడం, దాన్ని డీసీసీ అధ్యక్షుడు పొదెం వీరయ్య ప్రారంభించడం పార్టీలో చర్చానీయాంశంగా మారింది. జిల్లా అధ్యక్షులే గ్రూపులను ప్రోత్సహిస్తున్నారనే ఆరోపణలు వినిపిస్తున్నాయి.

ఆఫీస్​ల కుంపట్లు..

కాంగ్రెస్​లో గ్రూపు రాజకీయాలు రోజు రోజుకు  పెరుగుతున్నాయి.    కొత్తగూడెంలోని బస్టాండ్ సెంటర్​లో జిల్లా పార్టీ ఆఫీస్​ కొనసాగుతోంది. ఈ ఆఫీస్​ను   సీఎల్పీ నేత భట్టి అనుచరులు నిర్వహిస్తున్నారు. ఇదే జిల్లా ఆఫీస్​అంటూ పేర్కొంటుంటారు. కాగా బస్టాండ్​ సెంటర్లోనే జిల్లా పార్టీ ఆఫీస్​కు కూత వేటు దూరంలో రేణుక చౌదరి క్యాంప్​ ఆఫీస్​ పేర పార్టీ కార్యక్రమాలను టీపీసీసీ కార్యదర్శి ఎడవల్లి కృష్ణ నిర్వహిస్తున్నారు.  చుంచుపల్లి మండలంలో ఇప్పటికే మాజీ ఎమ్మెల్సీ పోట్ల నాగేశ్వరరావు క్యాంప్​ ఆఫీస్​ పేర పార్టీ ఆఫీస్​ను గతేడాది ఏర్పాటు చేశారు. ఇప్పుడు ఇదే మండలంలో పార్టీ సీనియర్​ నేత నాగ సీతారాములు జిల్లా పార్టీ ఆఫీస్​ను ఏర్పాటు చేశారు. 

కార్యకర్తల్లో అయోమయం..

నిన్నటి వరకు బస్టాండ్​ సెంటర్లోని ఆఫీస్​కు వచ్చిన పార్టీ జిల్లా అధ్యక్షుడు పొదెం వీరయ్య నాగ సీతారాములు ఏర్పాటు చేసిన జిల్లా ఆఫీస్​ను బుధవారం  ప్రారంభించారు. దీంతో వర్గపోరుకు మరింత ఆజ్యం పోసినట్లైంది.  కొత్తగూడెం నియోజకవర్గం నుంచి టికెట్ ఆశిస్తున్న వారు ఎవరికి వారే జిల్లా ఆఫీస్ లు ఏర్పాటు చేసుకుంటుండడంతో కార్యకర్తల్లో అయోమయం నెలకొంది. 

మహిళ కాంగ్రెస్​ కోసం మరో ఆఫీస్​?

నిన్న మొన్నటి దాకా బస్టాండ్​ సెంటర్లోని జిల్లా ఆఫీస్​లోనే మహిళా కాంగ్రెస్​ కార్యక్రమాలు నిర్వహిస్తుండేవారు. కాగా ఆఫీస్​కు మీరు రావద్దంటూ మహిళా కాంగ్రెస్​ నాయకులకు పార్టీ ఆఫీస్​ సిబ్బంది చెప్పడంతో ఖంగుతిన్నారు. దీంతో తాము ఒక ఆఫీస్​ను ఏర్పాటు చేసుకునే దిశగా ప్లాన్​ చేస్తున్నారు. టికెట్​ను ఆశిస్తున్న ఎడవల్లి కృష్ణ, పోట్ల నాగేశ్వరరావు, నాగ సీతారాములు, మోత్కూరి ధర్మారావులను సమన్వయం చేయాల్సిన డీసీసీ ప్రెసిడెంట్, భద్రాచలం ఎమ్మెల్యే పొదెం వీరయ్య  నాగ సీతారాములు ఏర్పాటు చేసిన జిల్లా ఆఫీస్​ను ప్రారంభించడం పార్టీలో చర్చనీయాంశమైంది.

గ్రూపు రాజకీయాలు..

టీపీసీసీ అధ్యక్షుడు రేవంత్​ రెడ్డి, సీఎల్పీ లీడర్​ భట్టి విక్రమార్క, రేణుక చౌదరి వర్గాలుగా జిల్లా కాంగ్రెస్​ నేతలు చీలిపోయారు. మరో వైపు సీనియర్​ నాయకులు డాక్టర్​ శంకర్​ నాయక్​, లక్కినేని సురేందర్​ మరో గ్రూపుగా పార్టీ కార్యక్రమాలు నిర్వహిస్తున్నారు. వీరితో పాటు పలు మండలాల అధ్యక్షులు, సీనియర్​ నాయకులు ఇటీవలి కాలంలో సమావేశమై జిల్లా అధ్యక్షుడే పార్టీలో వర్గపోరును ప్రోత్సహిస్తున్నారంటూ ధ్వజమెత్తారు.

ఇల్లెందులోనూ అదే తీరు..

ఇల్లెందు నియోజకవర్గంలో చాలా మంది కాంగ్రెస్​ టికెట్​ను ఆశిస్తూ ఎవరికి వారే కార్యక్రమాలను నిర్వహిస్తున్నారు. ఇల్లెందు పార్టీ ఆఫీస్​లో ఇటీవలి కాలంలో నాయకులు కొట్టుకున్న సందర్భాలున్నాయి.  జిల్లాలోని కొత్తగూడెం, ఇల్లెందు నియోజకవర్గాల్లో  బలంగా  ఉన్న కాంగ్రెస్​ లో నాయకుల వర్గ పోరుతో  కార్యకర్తల్లో ఆందోళన కలిగిస్తుంది.