- ప్రతిరోజూ ‘ప్రజాదర్బార్’
- ప్రజలకు అందుబాటులో సీఎం, ఎమ్మెల్యేలు
- ‘సుపరిపాలన’ పేరిట మేనిఫెస్టోలో ప్రత్యేక చాప్టర్
- బీఆర్ఎస్ అవినీతిపై రిటైర్డ్ జడ్జితో విచారణ
- జనానికి మెరుగైన సేవల కోసం పౌర సేవల హక్కుల చట్టం
- జనగామ జిల్లాకు సర్వాయి పాపన్న పేరు.. కొత్తగా ఏర్పాటు చేసే జిల్లాకు పీవీ పేరు
హైదరాబాద్, వెలుగు: రాష్ట్రంలో కేసీఆర్ పాలన అస్తవ్యస్తంగా ఉందన్నది కాంగ్రెస్ పార్టీ ప్రధాన ఆరోపణ. ప్రగతి భవన్లోకి కనీసం మంత్రులు, ఎమ్మెల్యేలకూ ప్రవేశం లేకుండా నియంతృత్వ పాలన సాగిస్తున్నారని విమర్శలు గుప్పిస్తున్నది. ఈ నేపథ్యంలో.. తాము అధికారంలోకి వస్తే సుపరిపాలన అందిస్తామని కాంగ్రెస్ తన మేనిఫెస్టోలో ప్రకటించింది. ముఖ్యమంత్రి క్యాంప్ ఆఫీసులోకి సామాన్యుడూ వచ్చేలా ‘ప్రజాదర్బార్’ను నిర్వహిస్తామని హామీనిచ్చింది. మేనిఫెస్టోలో తొలి ప్రాధాన్యాంశంగా (చాప్టర్ 1) ‘సుపరిపాలన’ అంశానికి చోటిచ్చింది.
బీఆర్ఎస్ ప్రభుత్వ నిరంకుశ పాలనకు స్వస్తి చెప్పి.. తెలంగాణ ప్రజల ఆకాంక్షల మేరకు పూర్తి స్థాయి ప్రజాస్వామిక పాలనను అందిస్తామని పేర్కొంది. గతంలో తమ ప్రభుత్వం (ఉమ్మడి రాష్ట్రంలో) సీఎం క్యాంప్ ఆఫీసులో పెట్టినట్టే ఇప్పుడు మళ్లీ అధికారంలోకి వస్తే ప్రతి రోజూ ‘ప్రజా దర్బార్’ను నిర్వహిస్తామని కాంగ్రెస్ హామీ ఇచ్చింది. ఎమ్మెల్యేలు నియోజకవర్గాల్లో ప్రజలకు నిరంతరం అందుబాటులో ఉంటూ ‘ప్రజదర్బార్’లు నిర్వహిస్తారని పేర్కొంది.
అంతేగాకుండా బీఆర్ఎస్ ప్రభుత్వ పాలనలోని కుంభకోణాలు, అవినీతి ఆరోపణలపై హైకోర్టు రిటైర్డ్ జడ్జి నేతృత్వంలో కమిటీ వేసి విచారణ జరిపిస్తామని, చట్టపరంగా కఠిన చర్యలు తీసుకుంటామని మేనిఫెస్టోలో కాంగ్రెస్ ప్రకటించింది.
కాంగ్రెస్ ‘సుపరిపాలన’ చాప్టర్లోని మరిన్ని అంశాలు
*ప్రజలకు మెరుగైన సేవలను అందించేందుకు పౌర సేవల హక్కుల చట్టం రూపకల్పన.
*ప్రజలు ఫిర్యాదు చేసేందుకు సమగ్రమైన పోర్టల్, టోల్ ఫ్రీ నంబర్ ఏర్పాటు. నిర్ణీత సమయంలో ఆయా ఫిర్యాదుల పరిష్కారం.
*అన్ని ప్రభుత్వ పథకాలను సమగ్రంగా అమలు చేసేందుకు గ్రామాల్లో వాలంటరీ వ్యవస్థ ఏర్పాటు.
*జిల్లాలు, మండలాల పునర్వ్యవస్థీకరణ. కొత్త జిల్లాలు, మండలాల ఏర్పాటు.
* జనగామ జిల్లాకు సర్దార్ సర్వాయి పాపన్న గౌడ్ పేరు. కొత్తగా ఏర్పాటు చేసే ఒక జిల్లాకు మాజీ ప్రధాని పీవీ నరసింహారావు పేరు.
