న్యూఢిల్లీ, వెలుగు: రానున్న అసెంబ్లీ ఎన్నికల్లో కాంగ్రెస్ పార్టీకి తెలంగాణ సీఎం పదవి కావాలని, తమకు సీట్లు కావాలని సీపీఐ నేషనల్ సెక్రటరీ నారాయణ అన్నారు. ఈ విషయంలో కాంగ్రెస్ పార్టీయే ఆలోచించి నిర్ణయం తీసుకోవాలని సూచించారు. శుక్రవారం ఢిల్లీలోని తెలంగాణ భవన్ నారాయణ మీడియాతో మాట్లాడారు. జాతీయ స్థాయిలో ఇండియా కూటమిలోనే సీపీఐ ఉందన్నారు. అదే తరహాలో తెలంగాణలో కూడా అమలు చేయాలని మేం కోరుతున్నట్లు చెప్పారు.
కాంగ్రెస్తో సీపీఐ, సీపీఐ(ఎం) కలిసి పోటీ చేయాలని యోచిస్తున్నట్లు స్పష్టం చేశారు. ఈ విషయంపై ఇంకా చర్చలు జరుగుతున్నాయని తెలిపారు. మహిళా రిజర్వేషన్ల బిల్లుకు సీపీఐ మద్దతు ఇస్తున్నదన్నారు. కేంద్ర ప్రభుత్వం డీలిమిటేషన్ చేస్తే దేశం నార్త్, సౌత్గా విడిపోవడం ఖాయమన్నారు. డీలిమిటేషన్ పేరుతో రాష్ట్రాల మధ్య గొడవ పెడుతున్నదని ఆరోపించారు. ఎన్నికలను దృష్టిలో పెట్టుకొని మహిళల ఓట్ల కోసం ఈ బిల్లు తెచ్చినట్లు ఉందని విమర్శించారు.
