- రాష్ట్ర వైద్య, ఆరోగ్యశాఖ మంత్రి దామోదర రాజనర్సింహా
సంగారెడ్డి టౌన్, వెలుగు : ప్రభుత్వ పథకాలు అర్హులైన ప్రజలకు అందేవిధంగా అధికారులు, ప్రజా ప్రతినిధులు సమన్వయంతో పనిచేయాలని రాష్ట్ర వైద్య ఆరోగ్యశాఖ మంత్రి దామోదర రాజనర్సింహా సూచించారు. సోమవారం సంగారెడ్డి కలెక్టర్ఆఫీసులో జిల్లా స్థాయి సమన్వయ సమావేశం మంత్రి దామోదర రాజనర్సింహా అధ్యక్షతన నిర్వహించారు. ఈ సందర్భంగా ఆయన మాట్లాడుతూ.. ప్రభుత్వం చేసిన వాగ్దానాలు, వాటి ఆచరణ, అమలులో అధికారుల పాత్ర కీలకమన్నారు. ప్రజలకు జవాబుదారీగా అధికారుల పనితీరు ఉండాలన్నారు.
ఈనెల 28 నుంచి జనవరి 6 వరకు నిర్వహించే ప్రజా పాలన కార్యక్రమంలో అధికారులు ప్రజల నుంచి అప్లికేషన్లు స్వీకరించాలన్నారు. నారాయణఖేడ్ ఎమ్మెల్యే సంజీవరెడ్డి మాట్లాడుతూ ప్రజా సంక్షేమాన్ని దృష్టిలో పెట్టుకుని ప్రభుత్వం ఆరు గ్యారంటీలను అమలుచేస్తుందన్నారు. అధికారులు నిబద్ధతతో పనిచేయాలని, స్వీకరించిన ప్రతి అప్లికేషన్కు రశీదు ఇవ్వాలని సూచించారు. అంతకుముందు జిల్లా కలెక్టర్ శరత్ ప్రజా పాలన కార్యక్రమ నిర్వహణ కు సంబంధించి తీసుకుంటున్న చర్యలు, ఏర్పాట్లపై మంత్రికి వివరించారు.
కార్యక్రమానికి సంబంధించిన పూర్తి వివరాలను పవర్ పాయింట్ ప్రజెంటేషన్ ద్వారా అడిషనల్ కలెక్టర్ చంద్రశేఖర్ అధికారులకు తెలియజేశారు. ఈ కార్యక్రమంలో జిల్లా అధికారులు, మున్సిపల్ కమిషనర్లు, రెవెన్యూ డివిజనల్ అధికారులు, ప్రజాప్రతినిధులు, తహసీల్దార్లు, ఎంపీడీవోలు, ఆయా శాఖల అధికారులు పాల్గొన్నారు.
