ప్లాస్టిక్ వాడడం వల్ల ఏమవుతుందో అనే అవేర్నెస్ కల్పించడానికి చాలామంది చాలా రకాలుగా ప్రయత్నాలు చేస్తున్నారు. ఇజ్రాయెల్కు చెందిన బెవర్లి బర్కత్ అనే ఒక ఆర్టిస్ట్ కూడా ఆ కాన్సెప్ట్ మీద ఒక పెయింటింగ్ వేయాలనుకుంది. అందుకోసం కొన్ని విషయాలను తెలుసుకునేటప్పుడే ఆమెకి ఒక ఐడియా వచ్చింది. అదేంటంటే ప్లాస్టిక్తోనే అది ఎంత ప్రమాదకరమో చెప్పాలి అనుకుంది. అందుకే వేరే దేశాల నుంచి వేస్ట్ ప్లాస్టిక్ కలెక్ట్ చేసి మరీ గ్లోబ్ తయారుచేసింది. దాని పేరు ‘ఎర్త్ పొయెటిక’.
ఈ ప్రాజెక్ట్ కోసం...
ఇజ్రాయెల్లోని జెరూసలేంలో ఉంటోంది బెవర్లి బర్కత్. మూడేండ్లుగా వేరే వేరే ప్రాంతాలు తిరిగి ప్లాస్టిక్ వేస్ట్ను కలెక్ట్ చేయడమే పనిగా పెట్టుకుంది. అయితే మధ్యలో కరోనా వైరస్ వల్ల రాకపోకలు నిలిచిపోయాయి. దాంతో ఆమె ఎక్కడికీ వెళ్లలేకపోయింది. అయితే ఆమె చేస్తున్న ప్రాజెక్ట్ గురించి తెలిసిన కొందరు, వాళ్ల దేశాల నుంచి ఆమెకు ప్లాస్టిక్ వేస్ట్ను పంపేవాళ్లు. వాటితోపాటు ఇజ్రాయెల్లోని మెడిటేరియన్ తీరాల్లో కనిపించిన తెగిపోయి, ఒడ్డుకు కొట్టుకొచ్చిన వలల్ని కలెక్ట్ చేసుకుంది. ప్లాస్టిక్ కూడా వైరస్ లాంటిదే. ప్లాస్టిక్ వేస్ట్ పెరిగేకొద్దీ అది ప్రపంచాన్నే నాశనం చేస్తుంది. వైరస్ వల్ల శరీరం దెబ్బతిన్నట్టే, ప్లాస్టిక్ వల్ల ఎకోసిస్టం దెబ్బతింటుందనే విషయాలు ప్రజలకు ప్యాండెమిక్లో బాగా అర్థమయ్యాయి అంటోంది బెవర్లి.
55 ఏండ్ల వయసులో ఈ ప్రాజెక్ట్ చేయడం అవసరమా? అని అడిగితే... ‘‘ఈ ప్రాజెక్ట్ నాకు చాలా ఇంపార్టెంట్. నా క్రియేటివిటీతో, నా పద్ధతిలో ఈ విషయాన్ని ప్రపంచానికి చెప్పాలనుకున్నా. అందుకే ఎర్త్ పొయెటిక అనే ప్రాజెక్ట్ను సెలక్ట్ చేసుకున్నా. ఈ ప్రాజెక్ట్ కోసం గ్లోబ్స్, గూగుల్ మ్యాప్స్, నాసా ఇమాజినరీ ఫొటోలను కలెక్ట్ చేశా. ఈ గ్లోబ్ను తయారుచేసేటప్పుడు ప్రపంచంలో ఏ ప్రదేశం ఎలా ఉంటుందో? గమనించి, దానికి తగినట్టు మెటీరియల్ డిజైన్ చేసుకున్నా. నాకు గ్లాస్ బోయింగ్ కూడా వచ్చు. ఎర్త్ పొయెటికను తయారుచేయడానికి మెటల్ ఫ్రేమ్ ప్యానెల్స్, లోపలి వైపు వెదురు బొంగులు, రకరకాల ప్లాస్టిక్ వేస్ట్లను వాడాను. బయటి నుంచి చూస్తే సముద్రాలు, ఖండాలు, అన్నీ మ్యాప్లో చూసినట్టే కనిపిస్తాయి. ఈ గ్లోబ్ మొత్తం నాలుగు మీటర్ల వ్యాసం ఉంటుంది. దగ్గరికి వెళ్లి చూస్తే చిన్న చిన్న రంధ్రాలు కనిపిస్తాయి. వాటిలో నుంచి చూస్తే లోపల ఉన్న రకరకాల ప్లాస్టిక్ మెటీరియల్స్ కనిపిస్తాయి. ఈ ‘ఎర్త్ పొయెటిక’ను ఇజ్రాయెల్లోనే కాకుండా, ఇటలీ, తైవాన్, జపాన్, అమెరికాల్లో ఎగ్జిబిషన్లో పెట్టా. దీన్ని ఇజ్రాయెల్ అక్వేరియంలో ఆరు నెలలు ఉంచారు. ఆ అక్వేరియం పిల్లల ఎడ్యుకేషనల్ ప్రోగ్రాంకు ఉపయోగపడింది. ఇన్స్టాలేషన్ టూర్లు కూడా ప్లాన్ చేసుకునేలా చేసింది. ఇంతకు ముందు స్కూల్స్లో లైబ్రరీలు పెట్టించా” అని ఎర్త్ పొయెటిక గురించి చెప్పింది.
ఫ్యామిలీ లైఫ్
జొహన్నెస్బర్గ్లో సెరామిస్ట్లుగా పనిచేసే వాళ్లు బెవర్లి పేరెంట్స్. 1976లో బెవర్లీ వాళ్ల అమ్మానాన్నలకు ఆర్ట్స్ అండ్ డిజైన్ అనే బెజలెల్ అకాడమీలో ఒక ఏడాది పనిచేసే అవకాశం వచ్చింది. దాంతో ఆమెకి పదేండ్లున్నప్పుడే వాళ్ల ఫ్యామిలీ ఇజ్రాయెల్కు వచ్చేసింది. ఆ తర్వాత కూడా వాళ్లు అక్కడే ఇజ్రాయెల్లోనే ఉండిపోయారు. బెవర్లి, జువెలరీ డిజైన్ చదువుకునేటప్పుడు ఆమె చిన్ననాటి ఫ్రెండ్ అయిన నిర్ బర్కత్ను పెండ్లి చేసుకుంది. ఆయన జెరూసలెం మేయర్ అయ్యాడు. అంతకుముందు అతను ఎంట్రప్రెనూర్. అప్పుడప్పుడు ఆమె స్టూడియోకి వెళ్లి
ఆమెకి పనుల్లో సాయం చేస్తుంటాడు కూడా.