కరీంనగర్, వెలుగు: డెస్క్ జర్నలిస్టులకు గతంలో ఇచ్చినట్లే అక్రిడిటేషషన్ కార్డులే ఇవ్వాలని, రాష్ట్ర ప్రభుత్వం ఇటీవల జారీ చేసిన జీవో నంబర్ 252ను వెంటనే సవరించాలని డెస్క్ జర్నలిస్టులు డిమాండ్ చేశారు. శనివారం కలెక్టరేట్ ఎదుట ధర్నా చేపట్టారు. ఈ సందర్భంగా డెస్క్ జర్నలిస్ట్స్ఫెడరేషన్ ఆఫ్ తెలంగాణ(డీజేఎఫ్టీ) నాయకులు మాట్లాడుతూ.. ప్రభుత్వం జర్నలిస్టుల మధ్య విభజన తీసుకురావడం అన్యాయమన్నారు.
డెస్క్ జర్నలిస్టులకు మీడియా కార్డు ఇస్తామనడం తగదని, ఫీల్డ్, డెస్క్ జర్నలిస్టులు సమన్వయంతో పని చేస్తేనే ప్రజలకు నాణ్యమైన సమాచారం చేరుతుందని తెలిపారు. అందరికీ అక్రిడిటేషన్ కార్డులు ఇవ్వాలని కోరారు. -డెస్క్ జర్నలిస్టులకూ జిల్లా అక్రిడిటేషన్ కమిటీలో చోటు కల్పించాలని విజ్ఞప్తి చేశారు.
అనంతరం డిమాండ్లతో కూడిన వినతిపత్రాన్ని అడిషనల్ కలెక్టర్ లక్ష్మీకిరణ్ కు అందజేశారు. కార్యక్రమంలో టీయూడబ్ల్యూజే హెచ్ జిల్లా అధ్యక్షుడు చెరుకు గోపాలకృష్ణ, రాష్ట్ర నాయకులు ప్రకాశ్రావు, వేణుగోపాల్రావు, జిల్లా నాయకులు సంపత్, రామకృష్ణ, హృషికేష్, కొండల్ రెడ్డి, యాదగిరి, డెస్క్ జర్నలిస్ట్ నాయకులు సుభాష్, సంపత్, శ్రీనివాస్ తదితరులు పాల్గొన్నారు.
