కామారెడ్డి, వెలుగు : రెండు నెలలుగా జీతాలు వేయకుండా అధికారులు ఇబ్బందులకు గురిచేస్తున్నారని కామారెడ్డి మున్సిపల్ కార్మికులు వాపోయారు. మంగళవారం ఉదయం స్థానిక ఎమ్మెల్యే కాటిపల్లి వెంకటరమణారెడ్డి క్యాంప్ఆఫీస్ఎదుట ధర్నాకు దిగారు. ఎమ్మెల్యే స్పందించి పెండింగ్ జీతాలు ఇప్పించాలని కోరారు. ఈ సందర్భంగా కార్మికులు మాట్లాడుతూ.. నెలనెలా ఇన్టైంలో జీతాలు రాక తీవ్ర ఇబ్బందులు పడుతున్నామన్నారు.
కుటుంబ ఖర్చులకు అప్పులు చేయాల్సి వస్తోందని వాపోయారు. అయితే క్యాంప్ఆఫీసులో ఎమ్మెల్యే లేరని, అక్కడి సిబ్బంది చెప్పారు. కార్మికులతో ఫోన్లో మాట్లాడించారు. బుధవారం కమిషనర్తో మాట్లాడి, సమస్యను పరిష్కరిస్తానని ఎమ్మెల్యే హామీ ఇవ్వడంతో కార్మికులు ఆందోళన విరమించారు.
