సుడిగాలి సుధీర్ హీరోగా న‌టించిన పక్కా మాస్ అండ్‌ యాక్షన్ ఎంట‌ర్‌టైన‌ర్ `గాలోడు`. గెహ్నా సిప్పి హీరోయిన్‌గా న‌టించిన ఈ చిత్రానికి రాజశేఖర్ రెడ్డి పులిచ‌ర్ల ద‌ర్శక‌త్వం వ‌హించారు. ప్రకృతి స‌మ‌ర్పణ‌లో సంస్కృతి ఫిలింస్ ఈ చిత్రాన్ని నిర్మించింది. ఈ చిత్రం నవంబర్ 18న విడుదలై సూపర్ హిట్ టాక్ తో విజయవంతంగా ప్రదర్శించబడుతోంది. ఈ సందర్భంగా దర్శకుడు రాజశేఖర్ రెడ్డి మీడియాతో ముచ్చటించారు.
విజయాన్ని ముందే నేను ఊహించాను
"గాలోడు సినిమా పక్కా కమర్షియల్ కంటెంట్ కావడంతో ఈ విజయాన్ని ముందే నేను ఊహించాను. నేను ఇది వరకు కమర్షియల్ డైరెక్టర్ల వద్దే పని చేశాను. నేను పని చేసిన చిత్రాలన్నీ కూడా దాదాపుగా హిట్ అయ్యాయి. అందుకే ఈ సినిమా మీద ముందు నుంచి నమ్మకంగానే ఉన్నాను. నేను ముందు డైలాగ్ రైటర్‌గా పని చేశాను. కాబట్టి కథలో ఎక్కడైనా స్లోగా అనిపిస్తే డైలాగ్స్‌తో మ్యానేజ్ చేశాను. అది చాలా ప్లస్ అయింది. నేను ఎక్కువగా ఘోస్ట్ రైటర్‌గానే పని చేశాను. కానీ ఎప్పటికైనా సక్సెస్ అవుతాను అనే నమ్మకంతోనే ఉన్నాను.
ముందు వేరే హీరోతో అనుకున్నా
సాఫ్ట్ వేర్ సుధీర్ సినిమాను ముందు వేరే హీరోతో అనుకున్నాను. కానీ ఆ హీరో డేట్స్ అడ్జస్ట్ కాకపోవడంతో.. ఓ కామెడీ టచ్ ఉన్న హీరో కావాలని అనుకున్న సమయంలో సుధీర్ ఈ ప్రాజెక్ట్‌లోకి వచ్చారు. అలా ఆయనతో జర్నీ మొదలైంది. నేను మాములుగా అయితే ముందు గాలోడు సినిమాను చేయాలి. సాఫ్ట్ వేర్ సుధీర్ కథ, ఈ గాలోడు కథను సింగిల్ సిట్టింట్‌లో ఓకే అయింది. ఈ సినిమాను ఎక్కడా కాంప్రమైజ్ కాకుండా చేశాను. సాఫ్ట్ వేర్ సుధీర్ కమర్షియల్‌గానూ ఆడింది. మిగతా సినిమాల పోటీలో మా సినిమా కనిపించలేదు అంతే. నేను ఆంధ్రా ఏరియాను తీసుకుని డిస్ట్రిబ్యూషన్ కూడా చేశాను. అందులో ప్రాఫిట్ వచ్చింది కాబట్టే.. ఈ సినిమాను కూడా నిర్మించాను.
సుధీర్ ఇమేజ్ అంతగా తెలియదు
మొదటి సినిమా సమయంలో సుధీర్ ఇమేజ్ నాకు అంతగా తెలియదు. ఫస్ట్ లుక్, మోషన్ పోస్టర్ రిలీజ్ చేసిన సమయంలో ఆయన క్రేజ్ తెలిసింది. ఈయనకు మంచి క్రేజ్ ఉందని నాకు అర్థమైంది. అప్పుడు విజయంపై మరింత నమ్మకం పెరిగింది. సాఫ్ట్ వేర్ సుధీర్, గాలోడు సినిమా కథలను రష్మీకి చెప్పాం. కానీ డేట్స్ అడ్జస్ట్ అవ్వడం లేదు. రష్మీ, సుధీర్ ఇద్దరితో నేను ఓ ప్రాజెక్ట్ చేయాలని అనుకుంటున్నాను. త్వరలో కచ్చితంగా చేస్తాను. ఆ ఇద్దరితో గజ్జల గుర్రం అనే సినిమాను చేయాలని అనుకుంటున్నాను. కొన్ని డైలాగ్స్, సీన్లకు ఆడియెన్స్‌ను ఊహించని మంచి రియాక్షన్స్ వచ్చాయి. ముఖ్యంగా పాటలు, సుధీర్ డాన్స్ కి, ఫైట్స్ కి అద్భుతమైన రెస్పాన్స్ వస్తోంది.
సుధీర్ కి సూట్ అవుతాయ్
నా దగ్గర బౌండ్ స్క్రిప్ట్‌లున్నాయి.. అవి సుధీర్ కి సూట్ అవుతాయ్ కాబట్టే ఆయనతో సినిమాలు చేశాను. ఇప్పుడు గజ్జల గుర్రం అనేది కథగానే ఉంది. బౌండ్ స్క్రిప్ట్ లేదు. అందుకే కాస్త లేట్ అవుతుంది. ఆయనతో నాకు.. నాకు ఆయనతో మంచి కంఫర్ట్ లెవెల్స్ ఉన్నాయి. మనకన్నా కూడా ఆయన చాలా అడ్వాన్స్డ్‌గా ఉంటారు. సుధీర్ రష్మీ కాంబినేషన్ సెట్ చేయాలని అనుకుంటున్నాను. ఇప్పుడు కాకపోతే ఇంకెప్పుడూ చేయలేం. ఆ తరువాత పెద్ద కథలు కూడా ఉన్నాయి. గాలోడు అనేది విజిటింగ్ కార్డ్‌లా చేసుకున్నాను.
ఎంటర్టైన్మెంట్ ఉండాల్సిందే
డైరెక్షన్ తో పాటు, ప్రొడక్షన్ కూడా చేయడం అనేది చాలా కష్టమైన పని. మా కెమెరామెన్ రామ్ ప్రసాద్ చాలా బిజీ. ఆయన కోసం ఆరు నెలలు ఆగాను. ఎలాగైనా సినిమా బాగా రావాలని ఆయన కోసం ఆగాం. ఇప్పుడు థియేటర్స్ లో ఆయన విజువల్స్ కి మంచి రెస్పాన్స్ వస్తుంది. ఎంత కొత్తదనంతో సినిమాలు వస్తున్నా కూడా అందులో ఎంటర్టైన్మెంట్ ఉండాల్సిందే. కంటెంట్ లేకుండా ఎంత బడ్జెట్ పెట్టినా కూడా వృథానే. అందుకే ఒక కమర్షియల్ డైరెక్టర్ గా పేరు తెచ్చుకోవాలని ఉంది. గాలోడు సినిమాకు మంచి ప్రశంసలు వచ్చాయి. విమర్శలు కూడా వచ్చాయి. వాటిని సరిదిద్దుకుంటాను. సప్తగిరి, మిగతా ఆర్టిస్టులు కాల్ చేసి మెచ్చుకున్నారు" అని ముగించారు.
