నాలుగో క్వార్టర్లో చెల్లింపు
న్యూఢిల్లీ : వైట్గూడ్స్ తయారు చేసే కంపెనీలకు ఈ ఆర్థిక సంవత్సరం చివరి క్వార్టర్లో ప్రభుత్వం పీఎల్ఐ కింద రూ.79 కోట్ల విలువైన ఆర్థిక ప్రోత్సాహకాలను అందించనుంది. కొన్ని ఎంపిక చేసిన సంస్థలు ఇప్పటికే ఉత్పత్తిని ప్రారంభించాయని సీనియర్ అధికారి ఒకరు తెలిపారు. వైట్ గూడ్స్‌‌‌‌‌‌‌‌పై ప్రొడక్షన్ లింక్డ్ ఇన్సెంటివ్ (పీఎల్ఐ) పథకాన్ని దేశీయంగా ఎయిర్ కండిషనర్లు, ఎల్ఈడీ లైట్ కాంపోనెంట్ల తయారీని ప్రోత్సహించడానికి అమలు చేస్తున్నారు. ఈ పథకం కింద వివిధ రంగాలకు రూ.11 వేల కోట్ల ఇన్సెంటివ్స్ ఇవ్వాలని లక్ష్యంగా పెట్టుకున్నామని, ప్రస్తుత ఆర్థిక సంవత్సరంలో చెల్లింపులు తగ్గవచ్చని ఆయన తెలిపారు. వైట్ గూడ్స్ విభాగంలో పీఎల్ఐ పథకానికి ఎంపికైన 64 మంది లబ్ధిదారుల్లో 15 మంది ఉత్పత్తి ప్రారంభించారు.
ఈ 15 కంపెనీలు మార్చి 31, 2022 వరకు గెస్టేషన్ పీరియడ్ను (ఉత్పత్తికి సిద్ధమయ్యే దశ) ఎంచుకున్నారు. మార్చి 31, 2023 వరకు గెస్టేషన్ పీరియడ్ను ఎంచుకున్న మిగిలిన కంపెనీల పనులు వివిధ దశల్లో ఉన్నాయి. ఈ పథకం 2021–-22 నుంచి 2028–-29 వరకు అమలు అవుతుంది. దీనికింద ఇన్సెంటివ్స్ కోసం రూ. 6,238 కోట్లు ఖర్చు చేస్తారు. మొత్తం రూ.1.98 లక్షల కోట్ల పీఎల్ఐ పథకం కింద ఈ ఏడాది మార్చి వరకు రూ.2,900 కోట్ల విలువైన ప్రోత్సాహకాలను పంపిణీ చేశారు. ఎలక్ట్రానిక్స్ తయారీ కంపెనీలకు ఈ ఏడాదికి అదనంగా రూ.1,000 కోట్ల ప్రోత్సాహకాలు మంజూరు అయ్యాయి. ఎలక్ట్రానిక్స్, మొబైల్ తయారీ, ఫార్మా ఫుడ్ ప్రాసెసింగ్ వంటి రంగాల కోసం పీఎల్ఐ పథకాలు బాగా పనిచేస్తున్నాయని సీనియర్ అధికారి ఒకరు చెప్పారు.
