కరోనా వచ్చినప్పుడు ఎన్ని అనుమానాలో? ఇప్పుడు వ్యాక్సిన్ మీద అన్ని అనుమానాలున్నాయి. వీళ్లు తీసుకోవచ్చు, వాళ్లు తీసుకోకూడదంటూ రకరకాల ప్రచారాలు సోషల్ మీడియాలో చక్కర్లు కొడుతున్నాయి. ఈ వ్యాక్సిన్ మంచిది. ఆ వ్యాక్సిన్ పనిచేయదు.. అని, వ్యాక్సిన్తోనీ కొవిడ్ రావచ్చనే పుకార్లు ఎన్నో? ఒక్క వ్యాక్సిన్ చుట్టూ ఎన్నో సందేహాలు, భయంతో కూడా వ్యాక్సిన్కి దూరంగా ఉన్నారెందరో. ప్రచారాలు నిజమేనా? వ్యాక్సిన్ ఎలా పనిచేస్తోంది? ఎవరికి అవసరమో చెబుతున్నారు డాక్టర్ రవి కిరణ్ బరిగల.
వ్యాక్సిన్పై అందరికీ రకరకాల సందేహాలున్నాయి. చాలా రకాల సందేహాలతోపాటు భయం కూడా ఉంది. కానీ అలాంటి భయాలేమీ పెట్టుకోనక్కర్లేదు. బీపీ, షుగర్, క్యాన్సర్, హార్ట్ ప్రాబ్లమ్, హెచ్ఐవీ, అవయవ మార్పిడి చేయించుకున్నవాళ్లు కోవిడ్ వ్యాక్సిన్ తీసుకోవచ్చు. ట్రాన్స్ప్లాంట్ పేషెంట్స్ కూడా వేయించుకోవచ్చు. సాధారణ వ్యక్తుల కన్నా ఇలాంటి వాళ్లకే వ్యాక్సిన్ ఎక్కువ అవసరం. వీళ్లే అందరికన్నా ముందు తీసుకోవాలి. కొవిడ్ వ్యాక్సిన్కి తట్టుకుంటామో? లేదో? అన్న సందేహంతో 30 శాతం మంది వ్యాక్సినేషన్కి దూరంగా ఉన్నారు. అన్ని రకాల దీర్ఘకాలిక వ్యాధులు ఉన్నవాళ్లు కొవిడ్ వ్యాక్సిన్ తీసుకోవచ్చు. మందులు వాడుతుంటే ఆ మందులు ఆపాల్సిన అవసరం కూడా లేదు. వ్యాక్సిన్ తీసుకుని, మెడిసిన్స్ని కంటిన్యూగా వాడొచ్చు. డాక్టర్ సలహా కూడా అవసరం లేదు. కొంతమంది రక్త సమస్యలతో మందులు వాడుతూ ఉంటారు. రక్తం పలుచబడే మందులు వాడుతున్న వాళ్లు కూడా కొవిడ్ వ్యాక్సిన్ తీసు కోవచ్చు. వ్యాక్సిన్ తీసుకున్న తర్వాత కూడా ఆ మందులు రెగ్యులర్గా వాడొచ్చు. గర్భవతులు మాత్రమే కొవిడ్ వ్యాక్సిన్ తీసుకోకూడదు. కొవిడ్ వ్యాక్సిన్ తీసుకుంటే కొవిడ్19 బారిన పడే ప్రమాదం ఉంటుందని వాట్సాప్, ఫేస్బుక్ పోస్టులు చదివి కొందరు నమ్ముతున్నారు. ఆ డౌట్ వల్లే చాలామంది వ్యాక్సినేషన్కి దూరంగా ఉన్నారు. వ్యాక్సిన్ తీసుకుంటే కోవిడ్ రాదు. కానీ కొన్ని సైడ్ ఎఫెక్ట్స్ ఉంటాయి. జ్వరం, తలనొప్పి లాంటి సాధారణ సమస్యలే ఉంటాయి. కానీ తీవ్రమైన ఆరోగ్య సమస్యలు రావు. కొవిడ్ ప్రమాదం ముందు ఈ సమస్యలు చిన్నవి. కాబట్టి భయపడకుండా వ్యాక్సిన్ తీసుకోవాలి.
ఇది తినాలనేం లేదు
‘వ్యాక్సిన్ తీసుకున్నాక యాంటీబాడీస్ పెరగాలంటే ఎలాంటి వ్యాయామాలు చేయాలి? ఏమి తినాలి?’ అని చాలా మంది ఆలోచిస్తున్నారు. యాంటీబాడీస్ కోసం ప్రత్యేకంగా తినాల్సినవంటూ ఏదీ లేదు. అన్నీ తినాలి. తినొచ్చు. అలాగే వ్యాయామాలు చేస్తే పెరుగుతుందని లేదు. కానీ, ఆరోగ్యంగా ఉండటానికి వ్యాయామం సాయపడుతుంది.
వ్యాక్సిన్ పనితీరు ఎంత?
వ్యాక్సిన్ తీసుకున్నవాళ్లు కొవిడ్ బారినపడితే వ్యాక్సిన్ పనిచేయనట్లు కాదు. వ్యాక్సిన్ సెకండ్ డోస్ తీసుకున్న రెండు వారాల తర్వాత ఇమ్యూనిటీ వస్తుంది. ఈ లోగా కరోనా బారినపడొచ్చు. కాబట్టి వ్యాక్సిన్ పనిచేయట్లేదని అనుకోవద్దు. వ్యాక్సిన్ తీసుకుంటే కోవిడ్ రాదని నూటికి నూరు పాళ్లు హామీ ఇవ్వలేము. కానీ, కొవిడ్ బారినపడి హాస్పిటల్లో చేరిన పేషెంట్స్లో వ్యాక్సిన్ తీసుకున్నవాళ్లు చాలా తక్కువమంది ఉన్నారు. వ్యాక్సిన్ కరోనా బారిన పడకుండా కాపాడుతుంది. కొంత మందిలో వ్యాక్సిన్ తీసుకున్న తర్వాత తగినన్ని యాంటీబాడీస్ బాడీలో తయారు కాకపోవడం, తయారైన యాంటీ బాడీస్ ఎక్కువకాలం ఉండకపోవడం వల్ల వ్యాక్సిన్ తీసుకున్నా కొవిడ్ బారినపడ్డారు. వ్యాక్సిన్ తీసుకున్న వాళ్లలో 99 శాతం మంది సేఫ్గా ఉన్నారు. ఒకరిద్దరి సంగతి ఆలోచిస్తూ లక్షల మంది సేఫ్గా ఉన్న విషయాన్ని మరచిపోవద్దు.
వ్యాక్సిన్ తీసుకున్నాక కొవిడ్ వస్తే..
ఇప్పుడు కొవిడ్ రోగుల లెక్కలను బట్టి చూస్తే వ్యాక్సిన్ చాలామందిని కొవిడ్ బారినపడకుండా కాపాడింది. కొవిడ్ బారినపడి, హాస్పిటల్లో చేరాల్సి వచ్చిన వాళ్లలో 99 శాతం మంది వ్యాక్సిన్ తీసుకోని వాళ్లే ఉన్నారిప్పుడు. ఒకవేళ కొవిడ్ వచ్చినా ప్రాణాపాయ పరిస్థితి రాకుండా చేసింది వ్యాక్సిన్. వ్యాక్సిన్ తీసుకున్నవాళ్లు కొవిడ్ బారిన పడినా తొందరగా కోలుకోవడానికి అవకాశం ఉంది. వ్యాక్సిన్ తీసుకున్నవాళ్లలో తీవ్రమైన సమస్యలు లేవు. తీవ్రమైన జ్వరం, ఆయాసం రావట్లేదు. అంటే వ్యాక్సిన్ లైఫ్ని సేవ్ చేస్తున్నట్లే కదా. సింగిల్ డోస్ తీసుకున్న కొవిడ్ పేషెంట్స్కి 50 శాతం ప్రొటక్షన్, వ్యాక్సిన్ ఉత్పత్తి చేసిన యాంటీ బాడీస్ వల్ల దొరుకుతుంది. డబుల్ డోస్ తీసుకున్న వారికి 99శాతం ప్రొటక్షన్ ఉంటుంది. సింగిల్ డోస్ తీసుకున్న వాళ్లు కూడా కోవిడ్ బారినుంచి 3-–4 రోజుల్లోనే కోలుకున్నారు. కాబట్టి వ్యాక్సిన్ మీద అనుమానా లొద్దు. అందరూ వ్యాక్సిన్ తీసుకోవచ్చు.
ఒక్కడోసుకే ఆపేస్తే..
ఫస్ట్ డోస్ తీసుకున్నవాళ్లలో 30 శాతం మంది సెకండ్ డోస్కి రావట్లేదు. ఫస్ట్ డోస్ తీసుకున్నప్పుడు జ్వరం, వళ్లు నొప్పులు, తలనొప్పి వస్తున్నాయి. ఈ భయంతో సెకండ్ డోస్కి రావట్లేదు. కరోనా రాకుండా ఇంటిపట్టునే ఉందాం అనుకుంటున్నారు. వృద్ధులు ఇంటి పట్టునే ఉన్నా పిల్లలు అటూ ఇటూ తిరిగి వస్తారు. వాళ్ల ద్వారా కరోనా సోకే ప్రమాదం ఉంది. కాబట్టి వ్యాక్సిన్ రెండు డోసులూ తీసుకోవాలి.
యాంటీ బాడీస్ లైఫ్ టైమ్
వ్యాక్సిన్ తీసుకున్నాక ఎంతకాలం వరకు కొవిడ్ బారిన పడరో ఇప్పటికైతే తెలియదు. యాంటీ బాడీస్ ఎంతకాలం బాడీలో ఉంటాయో అప్పటి వరకు కొవిడ్ బారినపడరు. కాకపోతే కరోనా వైరస్, కొవిడ్ వ్యాక్సిన్ ఈ మధ్యనే వచ్చాయి. కాబట్టి వీటిమీద స్టడీ జరగలేదు. తగ్గితే మాత్రం బూస్టర్ డోస్ (మరోసారి వ్యాక్సిన్) తీసుకోవాలి. బూస్టర్ డోస్ అవసరమా? లేదా అనేది తర్వాత పరిశోధనల ఆధారంగా చెబుతారు. ఈ మహమ్మారిని దాటడానికి మాత్రం ఇప్పుడీ వ్యాక్సిన్ సాయపడుతుంది.
ఏ వ్యాక్సిన్ మంచిది?
పద్దెనిమిదేళ్లు దాటిన ప్రతి ఒక్కరూ వ్యాక్సిన్ తీసుకోవాలి. కో–వ్యాగ్జిన్ కావాలని, కోవిషీల్డ్ కావాలని, విదేశాల నుంచి ఇంకేదో వస్తుందని అనుకోవద్దు. ఫలానా వ్యాక్సినే కావాలని ఎదురు చూస్తే నష్టపోతారు. రెండింటితో కూడా ప్రొటక్షన్ కనిపిస్తోంది. ఇప్పుడు లక్షల మంది సేవ్ అయ్యారు. కాబట్టి ఏ వ్యాక్సిన్ అందుబాటులో ఉంటే అది తీసుకోండి.
డాక్టర్ రవి కిరణ్ బరిగల, ఇన్ఫెక్షన్ డిసీజ్ స్పెషలిస్ట్, అపోలో హాస్పిటల్, హైదరాబాద్
పీరియడ్స్ ఉన్నా వేయించుకోవచ్చు
18 ఏండ్లు పైబడిన వారికి మే 1 నుంచి టీకా అని కేంద్రం ప్రకటించినప్పటి నుంచి టీకాపై చాలా వార్తలు సర్క్యులేట్‌ అవుతున్నాయి. దాంట్లో అమ్మాయిల పీరియడ్స్‌‌కు సంబంధించిన న్యూస్‌ ఒకటి. పీరియడ్స్‌‌లో ఉన్న అమ్మాయిలు టీకా తీసుకోవద్దని, ఇమ్యూనిటీ పోతుందనేది ఆ మెసేజ్‌ సారాంశం. పీరియడ్ వచ్చే ముందు రోజు, పీరియడ్‌‌లో ఉన్నప్పుడు కూడా వ్యాక్సిన్ తీసుకోవచ్చు. ప్రికాషన్స్ ఏమీ అవసరం లేదు. ఎవరికి ప్రాబ్లమ్ రాలేదు. ఏదైనా సమస్య ఉండి మందులు వాడేవాళ్ళు కూడా నిర్భయంగా తీసుకోవచ్చు.
పుకార్లు సైన్స్ కాదు
వాట్సాప్, టీవీల్లో వచ్చే వార్తలు చూసి భయపడొద్దు. డాక్టర్లు, నర్సులు ఈ వ్యాక్సిన్ తీసుకున్నారు. ఆరోగ్యంగా ఉన్నారని తెలుసుకోండి. కొవిడ్ నుంచి బయటపడే మార్గం ఇది. కొవిడ్కు మందు లేదు. లేని మందు కోసం పాట్లుపడుతూ తిరిగే కంటే వ్యాక్సిన్ తీసుకోవడం మంచిది. ఉన్న అవకాశం ఒక్కటే. వ్యాక్సిన్.
