హైదరాబాద్, వెలుగు: ఇసుక జారడం వల్లే మేడిగడ్డ ప్రాజెక్టులోని ఏడో బ్లాక్ కుంగిందని ఎలక్ట్రో రెసిస్టివిటీ టెస్ట్ (ఈఆర్టీ) రిపోర్ట్ స్పష్టం చేసింది. ఈ రిపోర్ట్ కోసం ప్రభుత్వం పలు దఫాలుగా నిర్మాణ సంస్థ ఎల్ అండ్ టీని కోరుతూ వస్తున్నది. చాలా కాలంగా దీన్ని అందజేయడానికి విముఖత వ్యక్తం చేసిన సంస్థ ఎట్టకేలకు నీటి పారుదల శాఖకు దాన్ని అందజేసింది. పోయినేడాది జనవరి 4 నుంచి 9వ తేదీ నడుమ ఎలక్ట్రో రెసిస్టివిటీ టెస్ట్ జరిగింది. అప్పటి నుంచి ఈ రిపోర్ట్ గోప్యంగానే ఉంది. రిపోర్ట్లోని అంశాలను పరిశీలిస్తే బ్యారేజీలో ఎక్కువ రోజులు భారీగా నీటిని నిల్వ చేయడంతో ఒత్తిడి పెరిగిందనీ, రాఫ్ట్ సీకెంట్ పైల్స్ మధ్య ఉన్న ఇసుకపై ఆ ఒత్తిడి పడి అది జారిందని తేలింది.
ఇలా ఇసుకంతా జారడంతో బ్యారేజీలోని ఏడో బ్లాక్ కుంగిందని రిపోర్టులో పేర్కొంది. బ్యారేజీ సామర్థ్యం 16.17 టీఎంసీలు. అయితే ఏడో బ్లాక్లోని 19, 20, 21 పిల్లర్లు కుంగిపోయే సమయంలో అందులో 10.33 టీఎంసీల నీరు నిల్వ ఉంది. పెద్ద ఎత్తున నీరు ఉండడంతో ఒత్తిడి పెరిగి పిల్లర్లు కుంగిపోయాయని గుర్తించారు. 2019 జూన్లో బ్యారేజీని ప్రారంభించిన తర్వాత నవంబరులో వరదలు వచ్చాయి. అపుడు గేట్లు దించారు. నాటి వరద ప్రవాహంతో ప్రాజెక్టులోని సిమెంట్ కాంక్రీట్ బ్లాకులు చెల్లా చెదురయ్యాయి. ఆప్రాన్లు దెబ్బతిన్నట్లు కూడా గుర్తించారు. ఒకవేళ అదే ఏడాది నవంబర్లో రిపేర్లు చేపట్టి ఉంటే తాజా నష్టం సంభవించేది కాదని తేలింది.
