జన్నారం, వెలుగు: వారిద్దరు ఒకే పార్టీలో సీనియర్ నాయకులు.. ఒకరు జడ్పీటీసీగా, మరొకరు మేజర్ గ్రామపంచాయతీ సర్పంచ్గా పనిచేశారు. పదేండ్లుగా ఎడముఖం,పెడముఖంగా ఉన్న వారిద్దరు ఇప్పుడు సర్పంచ్ ఎన్నికల కోసం ఒక్కటయ్యారు. ఆ ఇద్దరు మంచిర్యాల జిల్లా జన్నారం మాజీ జడ్పీటీసీ ఎర్ర చంద్రశేఖర్ కాగా, మరొకరు మండలంలోని పొనకల్ మాజీ సర్పంచ్ జక్కు భూమేశ్. ఇప్పుడు పొనకల్ మేజర్ గ్రామపంచాయతీ జనరల్ మహిళకు కేటాయించడంతో ఎర్ర చంద్రశేఖర్ కుటుంబసభ్యులు రెండు రోజుల క్రితం వరకు పోటీ చేస్తారని ప్రచారం జరిగింది.
మరో పక్క జక్కు భూమేశ్ సతీమణి సుష్మాను పోటీలోకి దించేందుకు ఇదివరకే నిర్ణయించారు. వీరిద్దరు ఒకే సామాజికవర్గానికి చెందినవారు కావడంతో ఓట్లు చీలిపోతాయని భావించి కొంత మంది మధ్యవర్థిత్వంతో వీరిద్దరూ ఒక్కటయ్యారు. శనివారం ఖానాపూర్ ఎమ్మెల్యే వెడ్మ బొజ్జు పటేల్ సమక్ష్యంలో కాంగ్రెస్ లో చేరారు.జక్కు భూమేశ్ సతీమణి సుష్మాను కాంగ్రెస్ మద్దుతుతో సర్పంచ్ అభ్యర్థిగా నామినేషన్ వేయించారు. కొన్నేండ్లుగా పచ్చిగడ్డి వేస్తే భగ్గుమనే స్థాయిలో ఉన్న చంద్రశేఖర్, భూమేశ్ ఇప్పుడు సర్పంచ్ పదవి కోసం ఒక్కటి కావడం స్థానికంగా చర్చనీయాశమైంది.
