చెట్టూ చేమా, వాగులు వంకలు, కొండలు లోయలు... ఇలాంటి ప్లేస్లని మళ్లీ మళ్లీ చూడాలి అనిపిస్తుంది. అక్కడ రకరకాల అడవి జంతువులు, పక్షులు కూడా కనిపిస్తే... చాలా థ్రిల్లింగ్గా ఉంటుంది. అందుకోసమే శాంక్చురీలకు వెళ్తుంటారు చాలామంది. ప్రకృతి ఒడిని తలపించే ఈ వన్యప్రాణి సంరక్షణ కేంద్రాల్లో పచ్చని చెట్లని చూస్తూ సేద తీరతారు. మన రాష్ట్రంలోని ములుగు జిల్లాలో ఉన్న ఏటూరునాగారం శాంక్చురీ వీకెండ్ టూర్కి బాగుంటుంది. మన రాష్ట్రంలోని ఏడు వైల్డ్ లైఫ్ శాంక్చురీల్లో ఒకటైన ఈ ప్లేస్ గురించి...
ఏటూరునాగారం అంటేనే దట్టమైన చెట్లతో ఉన్న అడవి గుర్తుకొస్తుంది. రకరకాల అడవి జంతువులు తిరిగే ఈ ప్రాంతాన్ని 1953లో శాంక్చురీగా మార్చారు. మనరాష్ట్రంలోని మొట్ట మొదటి వైల్డ్లైఫ్ శాంక్చురీ ఇదే. మూడు రాష్ట్రాల సరిహద్దులో (తెలంగాణ, మహారాష్ట్ర, ఛత్తీస్గఢ్) ఉంది. కొండలు, లోయలతో చూడముచ్చటగా కనిపించే ఈ శాంక్చురీ దాదాపు 806 చదరపు కిలోమీటర్ల దూరం విస్తరించి ఉంది. ఇక్కడ ఉండే ‘దెయ్యంవాగు’ రెండు పాయలుగా ప్రవహిస్తుంది. ఈ వాగు శాంక్చురీని రెండు భాగాలుగా చేస్తుంది. దెయ్యంవాగు ప్రత్యేకత ఏంటంటే... ఇందులో ఏడాదంతా నీళ్లు ఉంటాయి.
ఫారెస్ట్ ఆఫీసర్ అనుమతితో...
ఈ శాంక్చురీలో 18 మీటర్ల ఎత్తైన చెట్లు ఉంటాయి. వాటిలో వెదురు, టేకు, నల్లమద్దితో పాటు రకరకాల ఔషధమొక్కలు కూడా కనిపిస్తాయి. పులి, చిరుత పులి, అడవి కుక్కలు, అడవిబర్రెలు, మచ్చలజింక, నీల్గై, కృష్ణజింక, నాలుగు కొమ్ముల దుప్పి వంటి వాటిని కూడా చూడొచ్చు. వీకెండ్లో ఇక్కడ బస చేయాలి అనుకునేవాళ్లు ఏటూరునాగారం ఊర్లో ఐటీడీఎ (ఇంటిగ్రేటెడ్ ట్రైబల్ డెవలప్మెంట్ ఏజెన్సీ) ఏర్పాటుచేసిన గెస్ట్ హౌస్లో ఉండొచ్చు. ఈ శాంక్చురీలో సఫారీలు ఉండవు. ఫారెస్ట్ ఆఫీసర్ అనుమతితో జీపు మాట్లాడుకొని అందులో వెళ్లొచ్చు. అక్టోబర్ నుంచి మే నెల మధ్యలో వెళ్తే పచ్చదనంతో నిండిన ఇక్కడి వాతావరణాన్ని ఎంజాయ్ చేయొచ్చు.
ఇలా వెళ్లాలి: వరంగల్ నుంచి 109 కి.మీటర్ల దూరంలో ఉంది ఏటూరునాగారం శాంక్చురీ. హైదరాబాద్ నుంచి 250 కి.మీటర్ల జర్నీ.టైమింగ్స్: ఉదయం 8 గంటల నుంచి సాయంత్రం 5 గంటల వరకు. టికెట్: పిల్లలకు రూ. 5, పెద్దలకు రూ. 10
