ఎజ్... దక్షిణ ఫ్రాన్స్లోని కొండప్రాంతంలో ఉన్న ఒక బుల్లి విలేజ్. పేరు ఎంత చిన్నగా ఉందో ఊరూ అంత చిన్నదే! కానీ... ఊరి విశేషాలు మాత్రం బోలెడు. ఈ ఊరి అందాలు సందర్శకులను మైమరిపిస్తాయి.ఊళ్లో బిల్డింగ్ల మీద కనిపించే ఆర్కిటెక్చర్, కళ్లు జిగేల్మనేలాంటి లొకేషన్స్ ఎన్నో ఉన్నాయి. మధ్య యుగ కాలానికి చెందిన ఊరి నిర్మాణం చూస్తుంటే నిజంగా ఆ కాలానికి వెళ్లొచ్చినట్టే అనిపించడం ఖాయం.
దక్షిణ ఫ్రాన్స్లోని కొండప్రాంతంలో దాదాపు 1,400 అడుగుల ఎత్తులో ఉంది ఎజ్. మరోలా చెప్పాలంటే మొనాకొ, నైస్ల మధ్య ఉంది ఈ ఊరు. అంటే... నైస్ సిటీ నుంచి కారులో వెళ్తే12 కిలోమీటర్ల దూరం ప్రయాణిస్తే ఎజ్ వచ్చేస్తుంది. అలాగే ఎజ్ నుంచి మొనాకోకి గంటన్నరపాటు నడవొచ్చు. అంతేకాదు, ఈ అందమైన ఊరంటే చాలామందికి ఇష్టం. వాళ్లలో అమెరికన్ యానిమేటర్, ప్రొడ్యూసర్, ఎంట్రప్రెనూర్ అయిన వాల్ట్ డిస్నీ కూడా ఒకరు. ఆయన చాలాకాలం ఎజ్లోనే ఉన్నారు.
ప్రకృతి ఒడిలో...
ఈ ఊళ్లో మధ్యదరాసముద్రం, దానికి దగ్గర్లో ఉన్న ఫ్రెంచ్ రివీయెర నది.. వాటి అందాలను చూడాలంటే రెండు కళ్లూ సరిపోవు. ఎజ్లో ఏ మూలకు వెళ్లి చూసినా ఊరి అందాలు కనిపిస్తాయి. ఊరు కొండపైన ఉంది కాబట్టి, పైనుంచి సముద్రాన్ని చూస్తుంటే ఆ అనుభూతి మాటల్లో చెప్పలేం. ప్రకృతి అందాలే కాదు... వీధుల్లో నడుస్తుంటే ఒక్కో బిల్డింగ్ కట్టిన తీరు, మధ్యయుగం నాటి ఆర్కిటెక్చర్ కళ్లను కట్టిపడేస్తాయి. వందల ఏండ్ల నాటి నిర్మాణమైన ఎజ్ బిల్డింగ్ చూడొచ్చు. దాన్ని చాపెల్ డి లా సెయింటె క్రాయిక్స్ (క్లాక్ టవర్) అని పిలుస్తారు. దీన్ని1300 కాలంలో కట్టించారు. ఎజ్కి టూరిస్ట్లు ఎక్కువగా రావడం వల్ల దీన్ని విలేజ్ ముసీ (మ్యూజియం విలేజ్) అని పిలుస్తున్నారు.
మొక్కలంటే ఇష్టమున్న వాళ్లు తప్పనిసరిగా వెళ్లాల్సిన ప్లేస్ ఇది. ఇక్కడ ఎగ్జోటిక్ గార్డెన్ ఉంది. దాన్ని ‘లె జార్డిన్ ఎగ్జోటిక్ డి ఎజ్’ అని పిలుస్తారు. అందులో ఎన్నో రకాలైన ఎగ్జోటిక్ కాక్టస్ మొక్కలతో పాటు రకరకాల వృక్షజాతులు కనిపిస్తాయి. సాధారణంగా కాక్టస్ జాతి మొక్కలు ఎడారి ప్రాంతంలో, ఊరి బయట కనిపిస్తుంటాయి. కానీ, ఈ ఊళ్లో మాత్రం ఎంచక్కా పూల చెట్ల తీగలు అల్లుకున్నట్టే గోడను ఆనుకుని కాక్టస్ మొక్కలు పెరిగాయి. అవి ముట్టుకుంటే గుచ్చుకుంటాయనే భయమే తప్ప.. వీధి వెంట నడిచేటప్పుడు చూడ్డానికి మాత్రం అందంగా కనిపిస్తాయి. కాకపోతే ఊళ్లో ఏ దారిలో నడిచినా అదంతా కొండప్రాంతమే కావడం వల్ల దారి మొత్తం ఎగుడుదిగుడుగా ఉంటుంది. కాబట్టి అక్కడ నడవగలిగేందుకు వీలుగా ఉండే బూట్లను వాడితే బెటర్.
నియజ్చ్ పాత్
సన్నని నడకదారుల వెంట వీధుల్లో నడుస్తుంటే మధ్యయుగకాలానికి వెళ్లొచ్చినట్లు ఉంటుంది. నియజ్చ్ పాత్.. 2.6 మైళ్ల దూరం ఉండే అందమైన రహదారి. అక్కడ నడుస్తుంటే మంచి ఎక్సర్సైజ్ అవుతుంది. అది కొండ ఎక్కినట్లు ఉంటుంది. కాబట్టి ఎక్కేటప్పుడు, దిగేటప్పుడు కచ్చితంగా హైకింగ్కి వీలుగా ఉండే షూ వేసుకోవాలి.
ఇవీ ఉన్నాయి..
ఇక్కడ షాప్లు, హోటళ్లు, గ్యాలరీలు చాలా ఉంటాయి. రెండు పెద్ద హోటళ్లు ఇక్కడ పాపులర్. వాటిలో ఒకటి ‘చాటీ’ అనే బొటిక్ హోటల్. ఇది 400 ఏండ్ల నాటిది. కొండ ప్రాంతంలో ఉన్న ఈ హోటల్ రూమ్లు చాలా బాగుంటాయి. సముద్రాన్ని చూస్తూ హ్యాపీగా రిలాక్స్ అవ్వొచ్చు. రెండో హోటల్ పేరు ‘చాటీ డి లా చెవ్రె డి అర్’. ఇది బ్యూటిఫుల్ గార్డెన్లకు ఫేమస్. ఇక్కడ జంతువుల బొమ్మలు కూడా ఉన్నాయి. తినడానికి, తాగడానికి కొదవ ఉండదు.
ఎందుకెళ్లాలి?
ఎజ్.. మొనాకో, నైస్ సిటీకి మధ్యలో ఉంది. కాబట్టి ఒక్కరోజులో వెళ్లి రావచ్చు. ఆ రెండు సిటీల నుంచి ఎజ్ వెళ్లి, ఒక్కరోజులో ట్రిప్ కంప్లీట్ చేయొచ్చు. ఒక వేళ ఎజ్కి వెళ్లకుండా నైస్ లేదా మొనాకో ట్రిప్ వేసి, ఇంకా రెండు రోజులు స్టే చేయాలి అనుకుంటే అప్పుడైనా సరే ఎజ్ని చూడొచ్చు. అంతేకాదు ఒకే రోజులో వీధుల్లో నడుస్తూ, ఆర్కిటెక్చర్ గమనిస్తూ ట్రిప్ కంప్లీట్ చేయొచ్చు.
ఎలా వెళ్లాలి?
ముంబై, హైదరాబాద్ నుంచి ఫ్రాన్స్లోని నైస్ సిటీకి విమానంలో వెళ్లొచ్చు. నైస్ సిటీలో బస్టాప్ ట్రైన్ స్టేషన్కి దగ్గరే కాబట్టి ట్రైన్ లేదా బస్లో ఎజ్కి వెళ్లొచ్చు. ఈ ట్రిప్కి దాదాపు పాతిక నుంచి 75 వేల లోపు ఖర్చవుతుంది.
ఎజ్ అంటే...
ఎజ్ అనే పేరు ‘సెయింట్ లారెంట్ ఆఫ్ ఎజ్’ అని మొట్టమొదటిసారిగా సముద్రానికి సంబంధించిన పుస్తకాల్లో కనిపించింది. ఎజ్ జనాభా 2019 ప్రకారం 2,256 మంది. అక్కడ నివసించే వాళ్లని ‘ఎజస్కెస్’ అని పిలుస్తారు. ఆ పదం ఆడ, మగ ఇద్దరికీ వర్తిస్తుంది. ఫ్రెంచ్లో ఎజ్ అంటే కన్ను. ఈ విలేజ్కి ఒక స్లోగన్ ఉంది. అదేంటంటే... ‘ఐసిస్ మోరియెండొ రెనాస్కర్’ ‘చావులోనూ నేను తిరిగి జన్మిస్తా’ అని దాని అర్థం. ఈ ఊరి గుర్తు చావురాని ఫినిక్స్ అనే పక్షి. క్రీ.పూ. మూడో శతాబ్దానికి సంబంధించిన గ్రీక్ సిల్వర్ ఫియలె ఎజ్లో కనిపించింది. ఫియలె అంటే అలనాటి పాత్ర. అది ఇప్పుడు బ్రిటీష్ మ్యూజియంలో ఉంది.
ఎజ్ ఎలా ఏర్పడింది?
క్రీ.పూ. దాదాపు 2000 సంవత్సర కాలంలో ఎజ్లో ప్రజలు నివసించారు. అదే సమయంలో ఈ ప్రాంతానికి రోమన్లు, మూర్లు వచ్చారు. వాళ్లు దాదాపు 80 ఏండ్లు అక్కడే ఉన్నారు. ఆ తర్వాత విలియం ఆయన సహచరులతో వాళ్లని తరిమేశాడు.1388లో హౌస్ ఆఫ్ సవోయ్ అధికారంలోకి వచ్చింది. అప్పుడే నైస్‌‌‌‌‌‌‌‌కు దగ్గర్లో ఉంటుందని ఆ ఊరికి కోటను నిర్మించాడు.
1543లో హేరెద్దీన్ బార్బరోస్సా ఆదేశాల మేరకు ఫ్రెంచ్, టర్కిష్ దళాలు ఈ గ్రామాన్ని తమ స్వాధీనంలోకి తీసుకున్నాయి.1706లో స్పానిష్ వారసత్వ యుద్ధంలో లూయిస్ నగరం చుట్టూ ఉన్న గోడలను ధ్వంసం చేయడంతో చరిత్ర తరువాతి కొన్ని శతాబ్దాలలో చాలాసార్లు మారిపోయింది. చివరగా ఏప్రిల్1860లో, ప్రజల నిర్ణయంతో ఫ్రాన్స్‌‌‌‌‌‌‌‌లో భాగమైంది.
