కొనుగోలు కేంద్రాల్లో పేరుకుపోతున్న నిల్వలు
మహాముత్తారం, వెలుగు: 1001 రకం వడ్లను కొనుగోలు కేంద్రాల్లో తీసుకోకపోవడంతో రైతులు రూ. 1,500 కే దళారులకు అమ్ముకోవాల్సి వస్తోంది. జయశంకర్ భూపాలపల్లి జిల్లా మహాముత్తారం మండలంలో పీఏసీఎస్ఆధ్వర్యంలో 9, జీసీసీ ఆధ్వర్యంలో 4, డీసీఎంఎస్ ఆధ్వర్యంలో 8, మ్యాక్స్ ఆధ్వర్యంలో 4 వడ్ల కొనుగోలు కేంద్రాలను ఏర్పాటు చేశారు. కొనుగోలు కేంద్రాల్లో ‘ఏ’ గ్రేడ్ రకానికి క్వింటాలుకు రూ. 2,060, కామన్ గ్రేడ్1001 రకానికి క్వింటాలుకు రూ. 2,040 మద్దతు ధర నిర్ణయించారు.
అయితే మిల్లు యజమానులు కామన్ గ్రేడ్1001 రకం వడ్లను తీసుకునేందుకు నిరాకరిస్తుండడంతో రైతులు క్వింటాలుకు రూ. 1,500కే దళారులకు అమ్ముకుంటున్నారు. దీంతో పెట్టుబడులు కూడా చేతికి రావడం లేదని రైతులు వాపోతున్నారు. మండలంలో సగానికి పైగా రైతులు కామన్ గ్రేడ్ 1001 రకం వడ్లను సాగు చేశారు. మిల్లర్లు కొనుగోలు చేయకపోవడంతో తీవ్రంగా నష్టపోతున్నామని కన్నీరుమున్నీరవుతున్నారు. సెంటర్లలో వడ్లు కాంటా చేయకపోవడంతో కల్లాలన్నీ నిండిపోయాయి. ఇప్పటికైనా అధికారులు కాంటాలు త్వరగా వేయాలని, 1001 రకం కొనుగోలు చేయాలని రైతులు కోరుతున్నారు.
